విద్యార్థుల భవిష్యత్తుతో చెలగాటమాడొద్దు: ఈటల రాజేందర్

తెలంగాణలో విద్యార్థుల ఫీజు రీయింబర్స్‌మెంట్‌ బకాయిలపై భాజపా పోరాటాన్ని ఉధృతం చేసింది. ‘ఫీజు బకాయి–భాజపా లడాయి’ పేరుతో చేపట్టిన కార్యక్రమంలో మల్కాజిగిరి ఎంపీ ఈటల రాజేందర్‌ పాల్గొని రాష్ట్ర ప్రభుత్వంపై తీవ్ర విమర్శలు చేశారు.

ముఖ్యమంత్రి రేవంత్‌రెడ్డిపై ఈటల రాజేందర్‌ ఘాటు వ్యాఖ్యలు చేశారు. ముఖ్యమంత్రి అంటే కేవలం పదవి కాదని, నాలుగు కోట్ల తెలంగాణ ప్రజల సంక్షేమం, భవిష్యత్తు గురించి ఆలోచించాల్సిన బాధ్యత అని అన్నారు. రాష్ట్రంలోని విద్యార్థుల పరిస్థితిని ప్రభుత్వం ఒకసారి ఆలోచించాలని సూచించారు.

సుమారు 20 లక్షల మంది విద్యార్థుల భవిష్యత్తుతో చెలగాటమాడొద్దని ఈటల అన్నారు. పెండింగ్‌లో ఉన్న ఫీజు రీయింబర్స్‌మెంట్‌ బకాయిలను వెంటనే విడుదల చేయాలని డిమాండ్‌ చేశారు. ఫీజులు సకాలంలో అందకపోవడంతో విద్యార్థులు, వారి తల్లిదండ్రులు ఎదుర్కొంటున్న ఇబ్బందులను ప్రభుత్వం గుర్తించాలని కోరారు.

పేద కుటుంబాలకు చెందిన విద్యార్థులు ఉన్నత విద్యను అభ్యసించి డాక్టర్లు, ఇంజినీర్లు, న్యాయవాదులు, ఉన్నతాధికారులుగా ఎదగాలన్నదే వారి తల్లిదండ్రుల కల అని ఈటల పేర్కొన్నారు. విద్యార్థుల విద్యకు అడ్డంకులు లేకుండా చూడటమే నిజమైన తెలంగాణ అభివృద్ధికి బాట వేస్తుందని అన్నారు.

విద్యార్థులు, యువత నాణ్యమైన విద్యతో ఆరోగ్యవంతమైన భవిష్యత్తును నిర్మించుకోవాలన్న లక్ష్యంతో ప్రధాని నరేంద్ర మోదీ పనిచేస్తున్నారని ఈటల తెలిపారు. ఇదే స్ఫూర్తితో తెలంగాణ విద్యార్థుల భవిష్యత్తును కాపాడేందుకు భాజపా ముందుకు వచ్చిందన్నారు.

విద్యార్థుల భవిష్యత్తు కోసం రామచందర్‌రావు చేపట్టిన 48 గంటల దీక్షకు భాజపా పూర్తి మద్దతు ఇస్తుందని ఈటల స్పష్టం చేశారు. ఫీజుల బకాయిలు పూర్తిగా చెల్లించే వరకు, తెలంగాణ విద్యార్థులకు న్యాయం జరిగే వరకు భాజపా పోరాటం కొనసాగుతుందని ప్రకటించారు.