ఐదేళ్ల తర్వాత టీమిండియాలోకి కీలక ప్లేయర్‌.. అక్షర్‌ స్థానంలో కృనాల్‌?

శ్రీలంకపై 1-0 తేడాతో టెస్టు సిరీస్‌ను గెలుచుకున్న టీమిండియా.. తదుపరి సొంతగడ్డపై అఫ్గానిస్థాన్‌తో జరిగే మూడు టీ20ల సిరీస్‌కు సిద్ధమవుతోంది. సెప్టెంబరు 13, 15, 17 తేదీల్లో ఈ మూడు మ్యాచ్‌లు జరగనున్నాయి. ఈ సిరీస్‌కు ఓ ప్రత్యేకత ఉంది. అఫ్గానిస్థాన్‌లో నెలకొన్న పరిస్థితుల కారణంగా అక్కడ అంతర్జాతీయ మ్యాచ్‌ల నిర్వహణకు అనుకూల వాతావరణం లేకపోవడంతో.. భారత్‌ వేదికగా అఫ్గానిస్థాన్‌ ఆతిథ్యం ఇవ్వనుంది.

ఈ సిరీస్‌ కోసం భారత జట్టులో ఊహించని మార్పు చోటుచేసుకునే అవకాశం ఉన్నట్లు తెలుస్తోంది. దాదాపు ఐదేళ్ల తర్వాత కృనాల్‌ పాండ్యాకు టీమిండియాలోకి తిరిగి వచ్చే అవకాశం ఉందన్న వార్తలు వినిపిస్తున్నాయి.

ఓ జాతీయ మీడియా కథనం ప్రకారం.. స్పిన్‌ బౌలింగ్‌ ఆల్‌రౌండర్‌ అక్షర్‌ పటేల్‌ స్థానంలో కృనాల్‌ పాండ్యాను ఎంపిక చేయాలని సెలెక్టర్లు భావిస్తున్నట్లు సమాచారం. ఇంగ్లండ్‌, ఐర్లాండ్‌ పర్యటనల్లో అక్షర్‌ ప్రదర్శనపై సెలెక్టర్లు సంతృప్తిగా లేరని, దీంతో లెఫ్ట్‌ ఆర్మ్‌ స్పిన్నర్‌ కోసం ప్రత్యామ్నాయాలను పరిశీలిస్తున్నట్లు తెలుస్తోంది. ఈ క్రమంలోనే కృనాల్‌ పాండ్యా పేరు పరిశీలనలోకి వచ్చినట్లు సమాచారం.

కృనాల్‌ పాండ్యా 2018లో అంతర్జాతీయ క్రికెట్‌లోకి అరంగేట్రం చేశాడు. 2021లో టీమిండియా తరఫున చివరి మ్యాచ్‌ ఆడాడు. ఇప్పటివరకు భారత్‌ తరఫున ఐదు వన్డేలు, 19 టీ20 మ్యాచ్‌లు ఆడాడు. వన్డేల్లో 130 పరుగులు, టీ20ల్లో 124 పరుగులు చేశాడు. బౌలింగ్‌లో వన్డేల్లో రెండు, టీ20ల్లో 15 వికెట్లు పడగొట్టాడు.

ప్రస్తుతం 35 ఏళ్ల కృనాల్‌ పాండ్యా ఐపీఎల్‌లో తన సత్తా చాటుతున్నాడు. 2025, 2026 సీజన్లలో రాయల్‌ ఛాలెంజర్స్‌ బెంగళూరు తరఫున అతడు అద్భుత ప్రదర్శన కనబరిచాడు. ముఖ్యంగా కీలక సమయాల్లో బంతితో పాటు బ్యాట్‌తోనూ జట్టుకు ఉపయోగపడటం సెలెక్టర్ల దృష్టిని ఆకర్షించినట్లు తెలుస్తోంది.

లెఫ్ట్‌ ఆర్మ్‌ స్పిన్‌తో పాటు బ్యాటింగ్‌ చేయగల సామర్థ్యం ఉండటంతో కృనాల్‌ను ఎంపిక చేస్తే జట్టుకు అదనపు ఆల్‌రౌండర్‌ ఆప్షన్‌ లభిస్తుంది. అయితే తుది జట్టులో అతడి ఎంపికపై సెలక్షన్‌ కమిటీ నిర్ణయం తీసుకోవాల్సి ఉంది. నిజంగానే అవకాశం దక్కితే.. 2021 తర్వాత కృనాల్‌ పాండ్యా మళ్లీ అంతర్జాతీయ క్రికెట్‌లోకి అడుగుపెట్టనున్నాడు.