కేసీఆర్‌ వెంటనే రాజీనామా చేయాలి: సీఎం రేవంత్‌రెడ్డి

మాజీ సీఎం, భారాస అధినేత కేసీఆర్‌ వెంటనే రాజీనామా చేయాలని ముఖ్యమంత్రి రేవంత్‌రెడ్డి డిమాండ్‌ చేశారు. ఈ డిమాండ్‌తో సెప్టెంబరు 1 నుంచి 5వ తేదీ వరకు మండల, జిల్లా కేంద్రాల్లో కాంగ్రెస్‌ కార్యకర్తలు ర్యాలీలు, నిరసన కార్యక్రమాలు నిర్వహించాలని పిలుపునిచ్చారు. సెప్టెంబరు 6న హైదరాబాద్‌లోని ఇందిరాపార్కు వద్ద భారీ సభ నిర్వహించాలని సూచించారు. సెప్టెంబరు 7 నుంచి ప్రారంభమయ్యే అసెంబ్లీ సమావేశాలకు కేసీఆర్‌ హాజరై చర్చకు రావాలని సవాల్‌ చేశారు.

అంబర్‌పేట నియోజకవర్గంలో మూసీ నదిపై రూ.52 కోట్లతో నిర్మించిన అంబర్‌పేట-మూసారాంబాగ్‌ వంతెనను సీఎం రేవంత్‌రెడ్డి ప్రారంభించారు. అనంతరం అంబర్‌పేట క్రీడా మైదానంలో జరిగిన సభలో ఆయన మాట్లాడారు. కేసీఆర్‌ గత మూడేళ్లుగా ఫాంహౌస్‌కే పరిమితమయ్యారని, ప్రజల సమస్యలపై ప్రతిపక్ష నేతగా స్పందించడంలో విఫలమయ్యారని విమర్శించారు.

ఉద్యోగి ఏడాది పాటు విధులకు హాజరుకాకపోతే ఉద్యోగం నుంచి తొలగిస్తారని రేవంత్‌రెడ్డి వ్యాఖ్యానించారు. కేసీఆర్‌ మూడేళ్లుగా మాజీ ముఖ్యమంత్రి హోదాలో జీతం, ఇతర ప్రభుత్వ సదుపాయాలు పొందుతున్నప్పటికీ ప్రజల కోసం పనిచేయలేదని ఆరోపించారు. ఆయన జీతం, వాహనాలు, భద్రత సిబ్బంది కోసం ప్రభుత్వం భారీగా ఖర్చు చేస్తోందని పేర్కొన్నారు.

కేసీఆర్‌ కుటుంబ సభ్యులు, మనవడి కోసం మాత్రమే బయటకు వస్తున్నారని రేవంత్‌ విమర్శించారు. ప్రతిపక్ష నేతగా ప్రజా సమస్యలను అసెంబ్లీలో ప్రస్తావించాల్సిన బాధ్యత ఆయనపై ఉందన్నారు. పదేళ్ల భారాస పాలనలో జరిగిన విధ్వంసం, కాంగ్రెస్‌ ప్రభుత్వం అందిస్తున్న వెయ్యి రోజుల సుపరిపాలనపై అసెంబ్లీలో చర్చిద్దామని కేసీఆర్‌కు సవాల్‌ విసిరారు.

కేసీఆర్‌ తన కుటుంబ సభ్యులకు కీలక పదవులు ఇచ్చారని రేవంత్‌రెడ్డి ఆరోపించారు. తాను మాత్రం కాంగ్రెస్‌ పార్టీ కోసం పనిచేసిన కార్యకర్తలు, సామాజిక వర్గాల ప్రతినిధులకు అవకాశాలు కల్పిస్తున్నానని చెప్పారు. భట్టి విక్రమార్క, సీతక్క, పొన్నం ప్రభాకర్‌, అడ్లూరి లక్ష్మణ్‌, వాకిటి శ్రీహరి తదితరులను మంత్రులుగా చేశానని పేర్కొన్నారు.

శ్రీకాంతాచారి తల్లి శంకరమ్మకు మహిళా కమిషన్‌లో అవకాశం కల్పించామని, కోఠి మహిళా విశ్వవిద్యాలయానికి వీరనారి చాకలి ఐలమ్మ పేరు పెట్టామని చెప్పారు. ఆమె మనుమరాలికి కూడా మహిళా కమిషన్‌లో అవకాశం ఇచ్చామని తెలిపారు. అనిల్‌కుమార్‌ను రాజ్యసభకు పంపించామని, అద్దంకి దయాకర్‌ను ఎమ్మెల్సీ చేశామని వివరించారు.

2023 డిసెంబరు 7న ముఖ్యమంత్రిగా ప్రమాణస్వీకారం చేసిన అనంతరం సచివాలయంలో రాష్ట్ర ఆర్థిక పరిస్థితిపై అధికారులతో సమీక్షించినప్పుడు పరిస్థితి తీవ్రంగా ఉందని తెలిసిందని రేవంత్‌రెడ్డి చెప్పారు. ఉద్యోగులకు జీతాలు చెల్లించేందుకు కూడా ఇబ్బందులు ఉన్నాయని అధికారులు తెలిపారని పేర్కొన్నారు.

రాష్ట్ర విభజన సమయంలో తెలంగాణకు మిగులు బడ్జెట్‌ ఉండగా, భారాస పాలనలో భారీగా అప్పులు పెరిగాయని రేవంత్‌రెడ్డి ఆరోపించారు. తొమ్మిదిన్నరేళ్లలో రాష్ట్రాన్ని రూ.8.11 లక్షల కోట్ల అప్పుల్లోకి నెట్టారని విమర్శించారు. అప్పులు, వాటిపై అసలు-వడ్డీ చెల్లింపుల భారం గణనీయంగా పెరిగిందన్నారు.

కాంగ్రెస్‌ ప్రభుత్వం అధికారంలోకి వచ్చిన తర్వాత ఉద్యోగులకు ప్రతి నెలా ఒకటో తేదీన జీతాలు చెల్లిస్తున్నామని సీఎం తెలిపారు. కాంట్రాక్టు, ఔట్‌సోర్సింగ్‌ ఉద్యోగులకు కూడా నిర్ణీత సమయంలో వేతనాలు చెల్లిస్తున్నామని చెప్పారు.

ఆర్టీసీ ఉద్యోగుల సమస్యలను పరిష్కరించడంతో పాటు కారుణ్య నియామకాలు చేపట్టామని పేర్కొన్నారు. మహిళలకు ఉచిత బస్సు ప్రయాణం కల్పిస్తున్నామని, రైతుల కోసం భారీగా నిధులు ఖర్చు చేస్తున్నామని చెప్పారు. మూడేళ్లలో 72 వేల మందికి ప్రభుత్వ ఉద్యోగాలు కల్పించినట్లు వివరించారు.

హైదరాబాద్‌లోని టిమ్స్‌ ఆసుపత్రులకు తెలంగాణ చరిత్రలో కీలక పాత్ర పోషించిన నేతల పేర్లు పెట్టనున్నట్లు సీఎం రేవంత్‌రెడ్డి ప్రకటించారు. సనత్‌నగర్‌ టిమ్స్‌కు మాజీ సీఎం మర్రి చెన్నారెడ్డి పేరు పెట్టిన విషయాన్ని ప్రస్తావించారు.

త్వరలో ప్రారంభించనున్న అల్వాల్‌ టిమ్స్‌కు మాజీ సీఎం టి.అంజయ్య పేరు, ఎల్బీనగర్‌ టిమ్స్‌కు తొలి తెలంగాణ ఉద్యమకారుడు కొండా లక్ష్మణ్‌ బాపూజీ పేరు, వరంగల్‌ టిమ్స్‌కు ప్రొఫెసర్‌ జయశంకర్‌ పేరు పెడతామని వెల్లడించారు.

రూ.3 వేల కోట్లతో 2 వేల పడకల సామర్థ్యంతో ఉస్మానియా ఆసుపత్రిని నిర్మిస్తున్నామని, వచ్చే ఏడాది దానిని కూడా ప్రారంభిస్తామని తెలిపారు.

ఈ కార్యక్రమంలో జీహెచ్‌ఎంసీ, సైబరాబాద్‌ మున్సిపల్‌ కార్పొరేషన్‌, మల్కాజిగిరి మున్సిపల్‌ కార్పొరేషన్‌ల కొత్త లోగోలను సీఎం ఆవిష్కరించారు. కోర్‌ అర్బన్‌ రీజియన్‌ ఎకానమీ పరిధిలో మూడు కార్పొరేషన్లను ఏర్పాటు చేసి ప్రజలకు మెరుగైన పట్టణ పాలన అందిస్తున్నామని చెప్పారు.

కార్యక్రమంలో ఎంపీ అసదుద్దీన్‌ ఒవైసీ, రాజ్యసభ సభ్యుడు అనిల్‌కుమార్‌ యాదవ్‌, ఎమ్మెల్యేలు కాలేరు వెంకటేశ్‌, అహ్మద్‌ బలాల, మల్‌రెడ్డి రంగారెడ్డి, నవీన్‌యాదవ్‌, శ్రీగణేశ్‌, ప్రభుత్వ సలహాదారు వి.హనుమంతరావు, మాజీ ఎంపీ మధుయాస్కీగౌడ్‌ తదితరులు పాల్గొన్నారు.