ధీరజ్‌ బొమ్మదేవర చరిత్ర సృష్టించారు.. చంద్రబాబు అభినందనలు

ఆర్చరీ ప్రపంచకప్ ఫైనల్‌లో వ్యక్తిగత విభాగంలో స్వర్ణ పతకం సాధించి చరిత్ర సృష్టించిన భారత ఆర్చర్‌ ధీరజ్‌ బొమ్మదేవరపై ముఖ్యమంత్రి చంద్రబాబు నాయుడు ప్రశంసలు కురిపించారు. వ్యక్తిగత విభాగంలో ప్రపంచకప్ ఫైనల్‌ స్వర్ణం సాధించిన తొలి భారత పురుష ఆర్చర్‌గా ధీరజ్‌ నిలిచారని కొనియాడారు. విజయవాడ ఆర్చరీ గ్రౌండ్స్‌ నుంచి మెక్సికోలోని ప్రపంచ వేదిక వరకు ఆయన సాగించిన ప్రస్థానం ఎంతో స్ఫూర్తిదాయకమని పేర్కొన్నారు.

పట్టుదల, ఏకాగ్రత, క్రమశిక్షణతో కూడిన కఠోర సాధనతో ధీరజ్‌ ఈ అరుదైన విజయాన్ని అందుకున్నారని చంద్రబాబు అన్నారు. అంతర్జాతీయ స్థాయిలో భారత క్రీడా ప్రతిభను చాటడంతో పాటు ఆంధ్రప్రదేశ్‌లోని యువ క్రీడాకారులకు ఆయన స్ఫూర్తిగా నిలిచారని పేర్కొన్నారు. భవిష్యత్తులో ధీరజ్‌ మరిన్ని విజయాలు సాధించి దేశానికి, రాష్ట్రానికి మరింత పేరు తీసుకురావాలని ఆకాంక్షించారు.

ధీరజ్‌ బొమ్మదేవరకు మంత్రి నారా లోకేశ్‌ కూడా అభినందనలు తెలిపారు. ప్రపంచ ఆర్చరీ వేదికపై ధీరజ్‌ సాధించిన విజయం ఆంధ్రప్రదేశ్‌ క్రీడా కీర్తిని అంతర్జాతీయ స్థాయికి తీసుకెళ్లిందని అన్నారు. కఠోర శ్రమ, అంకితభావం, లక్ష్యంపై ఏకాగ్రతతో సాధించిన ఈ విజయం యువ క్రీడాకారులకు ప్రేరణగా నిలుస్తుందని పేర్కొన్నారు.

ఇదే సందర్భంగా మహిళల ఆసియా కప్‌ టీ20 విజేతగా నిలిచిన భారత మహిళల క్రికెట్‌ జట్టుకు లోకేశ్‌ హృదయపూర్వక అభినందనలు తెలిపారు. ఫైనల్‌లో అద్భుతంగా రాణించి భారత జట్టు ఎనిమిదోసారి టైటిల్‌ను కైవసం చేసుకోవడం అభినందనీయమన్నారు. భారత జట్టు విజయానికి తోడ్పడిన ఆంధ్రప్రదేశ్‌కు చెందిన శ్రీ చరణి నాలుగు వికెట్లు తీసి సత్తా చాటడం రాష్ట్రానికి గర్వకారణమని పేర్కొన్నారు.

ధీరజ్‌ బొమ్మదేవర, శ్రీ చరణి వంటి క్రీడాకారుల విజయాలు రాష్ట్రంలోని యువతలో క్రీడల పట్ల మరింత ఆసక్తిని పెంచుతాయని, ప్రతిభకు ప్రోత్సాహం అందితే అంతర్జాతీయ వేదికలపై మరిన్ని విజయాలు సాధించవచ్చని ఈ సందర్భంగా పలువురు అభిప్రాయపడ్డారు.