ఏఐ అందరికీ చేరాలి: టెక్నాలజీపై మోదీ కీలక వ్యాఖ్యలు

సాంకేతిక పరిజ్ఞానం కొందరికే పరిమితం కాకుండా ప్రపంచవ్యాప్తంగా దాని ప్రజాస్వామ్యీకరణ జరగాలని ప్రధాన మంత్రి నరేంద్ర మోదీ ఆకాంక్షించారు. ఐరోపాలో అతిపెద్ద టెక్నాలజీ ఈవెంట్‌ ‘వివాటెక్‌ 2026’లో ఫ్రాన్స్‌ అధ్యక్షుడు ఇమ్మాన్యుయేల్‌ మెక్రాన్‌తో కలిసి పాల్గొన్న మోదీ, సాంకేతికత, ఏఐలపై కీలక ప్రసంగం చేశారు. “సాంకేతికత అందరికీ అందుబాటులోకి వచ్చినప్పుడే అది నిజమైన పురోగతికి దారితీస్తుంది. భారత్‌కు ఏఐ (కృత్రిమ మేధ) అంటే అందరినీ కలుపుకొని పోయేది (ఆల్-ఇన్‌క్లూజివ్‌)” అని ప్రధాని స్పష్టం చేశారు.

అమెరికా ఇటీవల ఆంథ్రోపిక్‌కు చెందిన ఏఐ మోడల్స్‌ను విదేశీ పౌరులు వాడకుండా ఆంక్షలు విధించిన నేపథ్యంలో, మోదీ వ్యాఖ్యలు ప్రాధాన్యత సంతరించుకున్నాయి. ఏఐ కేవలం వ్యాపారాలకే పరిమితం కాకుండా సామాన్యుల జీవితాలను మెరుగుపరచడానికి, వృద్ధికి, ఆరోగ్యకరమైన ప్రపంచానికి దోహదపడాలని ఆయన పిలుపునిచ్చారు.

ప్రపంచ డిజిటల్ లావాదేవీల్లో భారత్ ఆధిపత్యం
ప్రపంచంలో జరుగుతున్న మొత్తం డిజిటల్‌ లావాదేవీల్లో సగం భారత్‌లోనే జరుగుతున్నాయని మోదీ తెలిపారు. ఆధార్, యూపీఐ ద్వారా ఆర్థిక సేవలు, విద్య, టెలిమెడిసిన్, వ్యవసాయ రంగాల్లో భారత్‌ విప్లవాత్మక మార్పులు తీసుకొచ్చిందన్నారు. ఈసారి వివాటెక్‌ 2026లో భారత్‌ అధికారిక ఏఐ కంట్రీ పార్టనర్‌గా వ్యవహరిస్తోంది. ఐరోపా–భారత్‌ ఇన్నోవేషన్‌ భాగస్వామ్యానికి గుర్తుగా అతిపెద్ద పెవిలియన్‌ను ఏర్పాటు చేసింది.

గ్లోబల్ సీఈఓలతో మోదీ భేటీలు
అంతర్జాతీయ దిగ్గజ కంపెనీల సీఈఓలతో ప్రధాని మోదీ వరుస సమావేశాలు నిర్వహించారు. నౌకాయానం, లాజిస్టిక్స్, రైల్వేలు, నిర్మాణం, కృత్రిమ మేధ రంగాల్లో భారత్‌లో ఉన్న పెట్టుబడి అవకాశాలపై చర్చలు జరిగాయి. రాడాల్ఫ్‌ సాడే (CMA CGM), బెనాయిట్‌ బాజిన్ (Saint-Gobain), మార్టిన్ సియాన్ (Alstom), ఆర్థర్ మెన్ష్ (Mistral AI) తదితరులు మోదీతో భేటీ అయ్యారు.