‘బబితా సింగ్‌ రిపోర్టింగ్‌’.. నిమిష సజయన్‌ క్రైమ్‌ డ్రామా ఎలా ఉందంటే!

ఓటీటీ వేదికలపై క్రైమ్‌ థ్రిల్లర్లు, పోలీస్‌ ఇన్వెస్టిగేషన్‌ కథలకు మంచి ఆదరణ ఉంది. ఈ నేపథ్యంలో తాజాగా అమెజాన్‌ ప్రైమ్‌ వీడియోలో నేరుగా స్ట్రీమింగ్‌కు వచ్చిన చిత్రం ‘బబితా సింగ్‌ రిపోర్టింగ్‌’. నిమిష సజయన్‌ ప్రధాన పాత్రలో నటించిన ఈ సినిమాలో ఓ మహిళా పోలీస్‌ అధికారి తన వృత్తి, కుటుంబ బాధ్యతల మధ్య ఎదుర్కొనే సవాళ్లతో పాటు ఓ హత్య కేసు మిస్టరీని ఛేదించే అంశాలను చూపించారు. మరి ఈ సినిమా ప్రేక్షకులను ఎంతవరకు ఆకట్టుకుంది?

బబితా సింగ్‌ అలియాస్‌ బేబీ (నిమిష సజయన్‌) ఏఎస్సైగా పనిచేస్తుంటుంది. ఇంట్లో ఓ ముఖ్యమైన వేడుక ఉండటంతో సెలవు కావాలని తన పై అధికారి సేథి (రాజేశ్‌ కుమార్‌)ని అడుగుతుంది. అయితే స్టేషన్‌లో కేసులు, ఇతర బాధ్యతలు ఉండటంతో సెలవు ఇవ్వడం సాధ్యం కాదని సేథి చెబుతాడు. అదే సమయంలో తాను చేసిన ఓ తప్పును బేబీ తనపై వేసుకుంటే రెండు వారాల పాటు సస్పెన్షన్‌కు గురయ్యే అవకాశం ఉందని సూచిస్తాడు. అలా చేస్తే ఇంటికి వెళ్లేందుకు సమయం దొరుకుతుందని చెబుతాడు.

కుటుంబంలో తప్పక పాల్గొనాల్సిన కార్యక్రమం కావడంతో ఇష్టం లేకపోయినా బేబీ ఆ సూచనను అంగీకరిస్తుంది. సస్పెన్షన్‌ కారణంగా ఊరికి వెళ్లిన ఆమెకు అక్కడ ఊహించని పరిణామం ఎదురవుతుంది. రైల్వేస్టేషన్‌లో భర్త శరద్‌ (అన్షుమాన్‌ పుష్కర్‌) కోసం ఎదురుచూస్తున్న సమయంలో చిన్ననాటి స్నేహితుడు బన్సి సింగ్‌ (బరున్‌ సోబ్తీ) ఆమెను కలుస్తాడు.

తనతో ఓ ముఖ్యమైన విషయం మాట్లాడాలని బన్సి చెబుతాడు. అయితే ఆ సమయంలో బేబీ తనకు సమయం లేదని, సాయంత్రం కలుద్దామని చెబుతుంది. కానీ మరుసటి రోజే బన్సి హత్యకు గురవుతాడు. దీంతో బేబీ అనుమానాలకు తావిచ్చే పరిస్థితులు ఏర్పడతాయి.

బన్సి తనతో ఏం చెప్పాలనుకున్నాడు? అతడి హత్య వెనుక అసలు కారణమేంటి? హత్యకు పాల్పడింది ఎవరు? సస్పెన్షన్‌లో ఉన్న బేబీ ఈ కేసు గురించి ఎందుకు ఆరా తీసింది? అధికారిక దర్యాప్తుకు దూరంగా ఉంటూనే ఆమె మిస్టరీని ఎలా ఛేదించింది? ఈ ప్రశ్నలకు సమాధానమే సినిమా.

క్రైమ్‌ ఇన్వెస్టిగేషన్‌ కథగా ‘బబితా సింగ్‌ రిపోర్టింగ్‌’ను ఆసక్తికరంగా ప్రారంభించారు. బబితా పోలీస్‌ అధికారిగా పనిచేసే విధానం, ఆమె ఎదుర్కొనే వృత్తిపరమైన ఒత్తిళ్లను పరిచయం చేస్తూ కథ ముందుకు సాగుతుంది. కుటుంబ కార్యక్రమానికి వెళ్లేందుకు ఆమె సస్పెన్షన్‌ను ఎంచుకోవడం, ఊరికి వెళ్లిన తర్వాత బన్సిని కలవడం.. ఆ వెంటనే అతడు హత్యకు గురికావడం కథలో ఆసక్తిని పెంచుతాయి.

బన్సి మృతదేహాన్ని చూసిన బబితకు అతడి చేతికి ఉన్న గాయం అనుమానాన్ని కలిగిస్తుంది. దీంతో అధికారికంగా తనకు ఎలాంటి బాధ్యత లేకపోయినా కేసు వివరాలను తెలుసుకునేందుకు ప్రయత్నిస్తుంది. పోలీస్‌ స్టేషన్‌కు వెళ్లి కేసుకు సంబంధించిన విషయాలను ఆరా తీస్తూ, తనదైన కోణంలో దర్యాప్తు మొదలు పెడుతుంది.

ఇక్కడి వరకు కథనం ఆసక్తికరంగానే అనిపిస్తుంది. అయితే ప్రేక్షకుడు ఆశించే స్థాయిలో ఇన్వెస్టిగేషన్‌ సన్నివేశాలను విస్తరించకపోవడం కొంత నిరాశ కలిగిస్తుంది. బన్సి హత్య వెనుక ఉన్న మిస్టరీని ఛేదించే క్రమంలో మరిన్ని ఉత్కంఠభరితమైన మలుపులు ఉంటాయని భావిస్తే.. కథనం మాత్రం నెమ్మదిగా సాగుతుంది.

సినిమాలో ప్రధానంగా బబితా వ్యక్తిగత జీవితాన్ని కూడా దర్శకురాలు అంబికా పండిట్‌ చూపించే ప్రయత్నం చేశారు. ఒకవైపు పోలీస్‌ ఉద్యోగం.. మరోవైపు కుటుంబ బాధ్యతలు.. అత్తారింట్లో ఎదురయ్యే ఆంక్షలు.. ఇలా ఆమె జీవితంలోని వివిధ కోణాలను తెరపైకి తీసుకొచ్చారు.

ఈ అంశాలు కథకు మరో పార్శ్వాన్ని అందించినప్పటికీ, ప్రధానమైన హత్య కేసు దర్యాప్తు నుంచి కథనం పలుమార్లు పక్కకు వెళ్లినట్లు అనిపిస్తుంది. ప్రేక్షకుడు బన్సి హత్య మిస్టరీపై దృష్టి పెట్టిన సమయంలో కుటుంబ సమస్యలు తెరపైకి రావడంతో థ్రిల్లర్‌ వేగం తగ్గుతుంది.

అలాగే బబితా, బన్సి చిన్ననాటి స్నేహితులని చెబుతారు. కానీ వారి మధ్య ఉన్న అనుబంధాన్ని బలంగా చూపించే సన్నివేశాలు పెద్దగా కనిపించవు. దీంతో బన్సి మరణం బబితపై చూపించే ప్రభావం కూడా ప్రేక్షకుడికి పూర్తిస్థాయిలో అనుభూతి చెందదు.

మర్డర్‌ మిస్టరీ నేపథ్యంలో సినిమా సాగుతున్నప్పటికీ కథనంలో వరుస ట్విస్టులు కనిపించవు. బబితా దర్యాప్తు చేసే విధానం కూడా మరీ తెలివైన పోలీస్‌ ఇన్వెస్టిగేషన్‌లా అనిపించదు. దీంతో మిస్టరీ ఛేదించే సన్నివేశాల్లో ఉత్కంఠ ఆశించిన స్థాయిలో ఉండదు.

అయితే బన్సి మరణానికి అసలు కారణం ఏంటన్న విషయాన్ని చివరి వరకు దాచి ఉంచడంలో చిత్రబృందం కొంతవరకు విజయం సాధించింది. క్లైమాక్స్‌లో వచ్చే అంశాలు సినిమాకు కొంత బలాన్ని చేకూరుస్తాయి.

ఏఎస్సై బబితా సింగ్‌ పాత్రలో నిమిష సజయన్‌ ఆకట్టుకున్నారు. ముఖ్యంగా కుటుంబం, ఉద్యోగ బాధ్యతల మధ్య ఇబ్బంది పడే సాధారణ మహిళగా ఆమె నటన సహజంగా ఉంటుంది. పోలీస్‌ అధికారిగా కనిపించే సన్నివేశాలతో పాటు ఇంట్లో ఎదురయ్యే పరిస్థితుల్లోనూ పాత్రకు తగ్గ భావోద్వేగాలను చక్కగా పలికించారు.

మిగిలిన నటీనటులు కూడా తమ పరిధి మేరకు పాత్రలకు న్యాయం చేశారు. రాజేశ్‌ కుమార్‌, బరున్‌ సోబ్తీ, అన్షుమాన్‌ పుష్కర్‌ తదితరులు కథకు తగ్గట్లుగా కనిపించారు.

సాంకేతికంగా సినిమా ఫర్వాలేదనిపిస్తుంది. కథలో ఉన్న క్రైమ్‌ ఎలిమెంట్‌ మరింత బలంగా ఉంటే కథనం ఇంకాస్త ఆసక్తికరంగా మారేది. దర్శకురాలు అంబికా పండిట్‌ ఒకే కథలో పోలీస్‌ డ్రామా, మర్డర్‌ మిస్టరీ, కుటుంబ సమస్యలు, మహిళా సాధికారత వంటి పలు అంశాలను కలిపి చెప్పే ప్రయత్నం చేశారు.

అయితే ఈ అంశాలన్నింటినీ సమతూకంగా నడిపించడంలో కొంత తడబాటు కనిపిస్తుంది. ఫలితంగా మొదట పోలీస్‌ ఇన్వెస్టిగేషన్‌ డ్రామాగా మొదలైన సినిమా క్రమంగా కుటుంబ, సామాజిక అంశాల వైపు మళ్లుతుంది.

‘బబితా సింగ్‌ రిపోర్టింగ్‌’లో నిమిష సజయన్‌ నటన ప్రధాన ఆకర్షణ. క్రైమ్‌ కథను ఆసక్తికరమైన మలుపులతో నడిపించే అవకాశం ఉన్నప్పటికీ.. నెమ్మదైన కథనం, బలమైన భావోద్వేగాలు లేకపోవడం సినిమాకు ప్రతికూలంగా మారాయి. పెద్దగా అంచనాలు లేకుండా ఓ సాధారణ క్రైమ్‌ డ్రామాగా చూస్తే ఒకసారి ప్రయత్నించొచ్చు.