రాజమహేంద్రవరం లో చైన్ స్నాచర్ల హల్‌చల్.. వృద్ధురాలిని ఈడ్చుకెళ్లి దోపిడీ

రాజమహేంద్రవరం నగరంలో చైన్ స్నాచర్లు రెచ్చిపోయారు. పలు ప్రాంతాల్లో బైక్‌లపై సంచరిస్తూ మహిళల మెడలోని బంగారు గొలుసులను లాక్కొని పరారయ్యారు. ఈ ఘటనలతో నగరంలో ఉద్రిక్తత వాతావరణం నెలకొంది.

దానవాయిపేట పార్క్, లాలా చెరువు సర్వీస్ రోడ్డుతో పాటు ఇతర ప్రాంతాల్లో ఉదయం వేళలో వరుసగా చైన్ స్నాచింగ్ ఘటనలు చోటుచేసుకున్నాయి. రెడ్, బ్లాక్ రంగు పల్సర్ బైకులపై వచ్చిన దుండగులు వేగంగా వచ్చి మహిళల మెడలోని బంగారు గొలుసులను లాక్కొని పరారైనట్లు స్థానికులు తెలిపారు.

ఒక ఘటనలో ఉదయం వాకింగ్‌కు వెళ్లి తిరిగి వస్తున్న ఓ వృద్ధురాలు దుండగుల దాడికి గురయ్యారు. ఆమె కిందపడిపోయినప్పటికీ నిందితులు ఆమెను కొంత దూరం వరకు ఈడ్చుకెళ్లి మెడలోని గొలుసును బలవంతంగా తస్కరించారు. మరో ఘటనలో మూడు కాసుల బంగారు గొలుసుతో నడుచుకుంటూ వెళ్తున్న మహిళను లక్ష్యంగా చేసుకుని దొంగలు చోరీకి పాల్పడ్డారు.

ఈ ఘటనలపై బాధితులు వెంటనే పోలీసులకు ఫిర్యాదు చేశారు. కేసులు నమోదు చేసిన పోలీసులు దర్యాప్తు ప్రారంభించారు. నిందితుల కదలికలను గుర్తించేందుకు సమీపంలోని సీసీ కెమెరా ఫుటేజీలను పరిశీలిస్తున్నారు. ప్రత్యేక పోలీసు బృందాలు రంగంలోకి దిగి దుండగులను పట్టుకునేందుకు గాలింపు చర్యలు ముమ్మరం చేశాయి.

నగరంలో వరుస చైన్ స్నాచింగ్ ఘటనల నేపథ్యంలో ప్రజలు అప్రమత్తంగా ఉండాలని పోలీసులు సూచిస్తున్నారు.