బీర్ తాగితే విటమిన్ B6 లభిస్తుందా? తాజా పరిశోధన ఏం చెబుతోంది

మన శరీరానికి విటమిన్లు, మినరల్స్ ఎంత అవసరమో ప్రత్యేకంగా చెప్పనక్కర్లేదు. ముఖ్యంగా విటమిన్ B6 మెదడు పనితీరు, రక్త ప్రసరణ, నాడీ వ్యవస్థ ఆరోగ్యం మరియు రోగనిరోధక శక్తి కోసం కీలక పాత్ర పోషిస్తుంది. సాధారణంగా ఈ విటమిన్ మాంసం, చేపలు, గుడ్లు, ఓట్స్, ధాన్యాలు మరియు పచ్చికూరగాయల ద్వారా శరీరానికి లభిస్తుంది. అయితే ఇటీవల బీర్ తాగడం ద్వారా కూడా విటమిన్ B6 పొందవచ్చా? అనే అంశంపై శాస్త్రవేత్తలు ఆసక్తికరమైన పరిశోధన నిర్వహించారు. జర్మనీలోని సూపర్‌మార్కెట్లలో లభించే సుమారు 65 రకాల బీర్లపై చేసిన ఈ అధ్యయనం ఇప్పుడు చర్చనీయాంశంగా మారింది.

పరిశోధనల ప్రకారం, ఒక గ్లాస్ బీర్ తాగితే రోజువారీ అవసరమైన విటమిన్ B6లో సుమారు 15 శాతం వరకు లభించే అవకాశం ఉందని తేలింది. ముఖ్యంగా ‘బాక్ బీర్’ రకంలో ఈ విటమిన్ స్థాయిలు ఎక్కువగా ఉన్నట్లు గుర్తించారు. దీని తర్వాత లాగర్ బీర్లు, గోధుమ బీర్లలో కూడా కొంతమేర విటమిన్ B6 ఉండటం గమనించారు. అయితే బియ్యంతో తయారయ్యే బీర్లలో ఈ విటమిన్ చాలా తక్కువగా ఉంటుందని పరిశోధనలో వెల్లడైంది. ఆశ్చర్యకరంగా, ఆల్కహాల్ లేని లాగర్ బీర్ ద్వారా దాదాపు 59 శాతం వరకు విటమిన్ B6 లభించే అవకాశం ఉందని శాస్త్రవేత్తలు చెబుతున్నారు.

బీర్ తయారీలో ఉపయోగించే బార్లీ, గోధుమలు, ఈస్ట్ వంటి ముడి పదార్థాల్లో సహజంగానే విటమిన్ B6 ఉంటుంది. బ్రూయింగ్ ప్రక్రియలో ఈ విటమిన్ పూర్తిగా నశించకుండా కొంతమేర బీర్‌లో నిలిచి ఉండటమే దీనికి కారణం. బ్రిటన్ నేషనల్ హెల్త్ సర్వీస్ ప్రకారం, పురుషులకు రోజుకు 1.4 మిల్లీగ్రాములు, మహిళలకు 1.2 మిల్లీగ్రాముల విటమిన్ B6 అవసరం. ఒక లీటర్ బీర్‌లో సుమారు 0.3 నుంచి 1 మిల్లీగ్రామ్ వరకు ఈ విటమిన్ ఉండే అవకాశం ఉంది.

అయితే, పోషకాహార నిపుణులు మాత్రం విటమిన్ల కోసం బీర్‌ను ఆధారపడటం సరైన పద్ధతి కాదని స్పష్టం చేస్తున్నారు. శరీరానికి అవసరమైన విటమిన్లు ఆరోగ్యకరమైన ఆహార పదార్థాల ద్వారా పొందడం ఉత్తమమని, ఆల్కహాల్ వినియోగం ఆరోగ్యంపై ప్రతికూల ప్రభావాలు చూపే అవకాశం ఉందని వారు హెచ్చరిస్తున్నారు.