డీఎంకేలో 'వారసత్వ' సెగలు: కాబోయే సీఎం కనిమొళి అంటూ నినాదాల హోరు!

టీనగర్:డీఎంకేలో వారసత్వ రాజకీయాలపై కొత్త చర్చ మొదలైంది. తూత్తుక్కుడి ఎంపీ కనిమొళి తిరునెల్వేలి జిల్లా పాళయంగోట్టయ్‌లో పార్టీ అభ్యర్థికి మద్దతుగా ప్రచారం చేస్తుండగా… కార్యకర్తలు ఆకస్మికంగా “కాబోయే సీఎం కనిమొళి” అంటూ నినాదాలు చేయడం రాజకీయంగా హాట్‌టాపిక్‌గా మారింది. ఈ నినాదాలపై కనిమొళి స్పందించకుండా వేదికపైకి వెళ్లిపోయినప్పటికీ, ఈ ఘటన పార్టీ అంతర్గత పరిస్థితులపై ప్రశ్నలు లేవనెత్తుతోంది.

వారసత్వ రాజకీయం… కొత్త మలుపు?

దివంగత నేత కరుణానిధి కుమార్తెగా, పార్లమెంట్‌లో చురుకైన నేతగా కనిమొళికి ప్రత్యేక గుర్తింపు ఉంది. అయితే ఇటీవల పార్టీలో ఆమెకు తగిన ప్రాధాన్యం దక్కడం లేదన్న భావన మద్దతుదారుల్లో పెరుగుతున్నట్లు సమాచారం.

ఇదే సమయంలో ఉదయనిధి స్టాలిన్‌ను భవిష్యత్తు నాయకుడిగా ముందుకు తీసుకురావడానికి ప్రయత్నాలు జరుగుతుండగా… కనిమొళి పేరుతో వినిపించిన నినాదాలు డీఎంకేలో అంతర్గత సమీకరణాలను బయటపెట్టాయి.

సమావేశాల రద్దు… మరిన్ని అనుమానాలు

ఇటీవల తిరునెల్వేలి, కోవిల్‌పట్టిలో జరగాల్సిన యువజన విభాగ సమావేశాలు చివరి నిమిషంలో రద్దవడం కూడా చర్చనీయాంశమైంది. కనిమొళిని ఆహ్వానించకపోవడమే దీనికి కారణమని పార్టీ వర్గాల్లో ప్రచారం జరుగుతోంది.

దక్షిణ తమిళనాడు బాధ్యతలు చూసే కనిమొళికి తెలియకుండానే కొన్ని పర్యటనలు ప్లాన్‌ కావడం కూడా పార్టీ అంతర్గత అసమ్మతిని సూచిస్తున్నట్లు విశ్లేషకులు భావిస్తున్నారు

మొత్తంగా, కనిమొళికి ఉన్న మాస్‌ ఫాలోయింగ్ నినాదాల రూపంలో బయటపడడం… డీఎంకేలో భవిష్యత్ నాయకత్వంపై కొత్త చర్చలకు దారితీస్తోంది.