నీటి కొరత నివారణకు కార్యాచరణ.. ఎల్‌నినోపై అప్రమత్తమైన ప్రభుత్వం

ఎల్‌నినో ప్రభావం కారణంగా భవిష్యత్‌లో నీటి లభ్యతపై ప్రభావం పడే అవకాశం ఉన్న నేపథ్యంలో శ్రీశైలం జలాలను జాగ్రత్తగా వినియోగించుకోవాలని ఏపీ ప్రభుత్వం నిర్ణయించింది. రాయలసీమ ప్రాంత ప్రజల తాగునీటి అవసరాలను దృష్టిలో ఉంచుకుని శ్రీశైలం రిజర్వాయర్‌ నుంచి నీటిని విడుదల చేస్తున్నట్లు మంత్రి నిమ్మల రామానాయుడు తెలిపారు.

బుధవారం మీడియాతో మాట్లాడిన మంత్రి.. 2027 జూన్‌ వరకు తాగునీటి అవసరాలను దృష్టిలో ఉంచుకుని శ్రీశైలం జలాలను భద్రపరచుకోవాల్సిన అవసరం ఉందన్నారు. ప్రస్తుతం శ్రీశైలం జలాశయంలో 119 టీఎంసీల నీటి నిల్వ ఉందని, రాబోయే 10 రోజుల్లో మరో 100 టీఎంసీల వరకు ఇన్‌ఫ్లో వచ్చే అవకాశం ఉందని అంచనా వేస్తున్నట్లు చెప్పారు.

కృష్ణా జలాల్లో ఆంధ్రప్రదేశ్‌కు లభించే 63 శాతం వాటాలో మొదటి ప్రాధాన్యత తాగునీటికే ఇస్తున్నామని మంత్రి స్పష్టం చేశారు. ఎల్‌నినో పరిస్థితులను దృష్టిలో ఉంచుకుని శ్రీశైలం నీటిని ప్రణాళికాబద్ధంగా వినియోగిస్తున్నట్లు తెలిపారు.

హంద్రీనీవా పరిధిలోని రిజర్వాయర్ల తాగునీటి అవసరాల కోసం 13 టీఎంసీల నీరు అవసరమని మంత్రి వెల్లడించారు. పోతిరెడ్డిపాడు పరిధిలోని రిజర్వాయర్లకు తాగునీటి అవసరాల కోసం 10 టీఎంసీల నీటిని విడుదల చేయనున్నట్లు తెలిపారు. అలాగే తెలుగుగంగ ద్వారా చెన్నై నగర తాగునీటి అవసరాలకు 10 టీఎంసీల నీరు అందించాల్సి ఉందన్నారు.

నాగార్జునసాగర్‌ కుడి, ఎడమ కాలువల పరిధిలో తాగునీటి అవసరాలకు 32 టీఎంసీల నీరు అవసరమని మంత్రి వివరించారు. వర్షాలు, వరదల పరిస్థితులను ఎప్పటికప్పుడు సమీక్షిస్తూ ఎల్‌నినో ప్రభావాన్ని ఎదుర్కొనేలా చర్యలు చేపడతామని తెలిపారు.

జిల్లాల కలెక్టర్లు, నీటిపారుదల, రెవెన్యూ, వ్యవసాయ శాఖ అధికారులు సమన్వయంతో పనిచేసి నీటి భద్రతకు చర్యలు తీసుకోవాలని మంత్రి నిమ్మల రామానాయుడు ఆదేశించారు.