జ్వరం వచ్చినప్పుడు ఆకలి ఎందుకు తగ్గుతుంది? కారణాలు, తీసుకోవాల్సిన ఆహారం ఇవే

జ్వరం అనేది శరీరంలోకి ప్రవేశించిన వైరస్‌లు, బ్యాక్టీరియా వంటి సూక్ష్మక్రిములతో రోగనిరోధక వ్యవస్థ పోరాడుతున్నప్పుడు కనిపించే సహజ ప్రతిస్పందన. ఇన్ఫెక్షన్‌ను ఎదుర్కొనే క్రమంలో శరీర ఉష్ణోగ్రత పెరగడంతో పాటు తలనొప్పి, ఒళ్లు నొప్పులు, అలసట, నీరసం వంటి లక్షణాలు కనిపిస్తాయి. వీటితో పాటు చాలా మందిలో ఆకలి తగ్గడం కూడా సాధారణంగా జరుగుతుంది.

ఇన్ఫెక్షన్‌ సమయంలో ఆకలి ఎందుకు తగ్గుతుంది?

ఆరోగ్య నిపుణుల ప్రకారం.. శరీరం ఇన్ఫెక్షన్‌తో పోరాడుతున్న సమయంలో సైటోకైన్లు అనే రసాయనాలను విడుదల చేస్తుంది. ఇవి మెదడులో ఆకలిని నియంత్రించే భాగంపై ప్రభావం చూపుతాయి. దాంతో తినాలనే ఆసక్తి తగ్గుతుంది.

ఇది శరీరం తీసుకునే సహజ రక్షణ చర్యలో భాగమని నిపుణులు చెబుతున్నారు. జీర్ణక్రియకు ఎక్కువ శక్తిని వినియోగించకుండా, ఆ శక్తిని ఇన్ఫెక్షన్‌పై పోరాడేందుకు శరీరం ఉపయోగించుకునేలా ఈ మార్పు జరుగుతుంది.

రుచి, వాసన తగ్గడం కూడా ఒక కారణం

కొన్ని వైరల్‌, బ్యాక్టీరియా ఇన్ఫెక్షన్ల సమయంలో రుచి, వాసనను గుర్తించే సామర్థ్యం తగ్గుతుంది. దీంతో ఆహారం రుచిగా అనిపించకపోవచ్చు. అలాగే గొంతునొప్పి, వికారం, కండరాల నొప్పులు, అధిక అలసట వంటి సమస్యలు కూడా ఆహారం తీసుకోవాలనే ఆసక్తిని తగ్గిస్తాయి.

జ్వరంలో ఆహారం పూర్తిగా మానేయకూడదు

జ్వరం సమయంలో ఆకలి లేకపోయినా పూర్తిగా ఆహారం మానేయడం సరైన పద్ధతి కాదని నిపుణులు సూచిస్తున్నారు. ఇన్ఫెక్షన్‌తో పోరాడేందుకు శరీరానికి శక్తి, ప్రోటీన్లు, విటమిన్లు, ఖనిజాలు అవసరం అవుతాయి.

ఎక్కువ సమయం ఆహారం తీసుకోకుండా ఉంటే బలహీనత పెరిగి, కోలుకోవడానికి ఎక్కువ సమయం పట్టే అవకాశం ఉంటుంది. అందుకే ఒకేసారి ఎక్కువగా తినడం కంటే.. కొద్దికొద్దిగా తేలికగా జీర్ణమయ్యే ఆహారాన్ని పలుమార్లు తీసుకోవడం మంచిది.

జ్వరం వచ్చినప్పుడు తీసుకోవాల్సిన ఆహారం

పెసరపప్పు కిచిడీ:
తేలికగా జీర్ణమవుతుంది. శరీరానికి అవసరమైన శక్తి, పోషకాలను అందిస్తుంది.

గంజి లేదా ఓట్స్:
శరీరానికి తగినంత శక్తిని అందించడంతో పాటు కడుపుపై భారం ఉండదు.

కూరగాయల సూప్‌:
వేడి వేడి సూప్‌ శరీరానికి ద్రవాలు, పోషకాలు అందిస్తుంది.

కొబ్బరి నీరు:
శరీరంలో నీటి శాతాన్ని నిలబెట్టి, ఎలక్ట్రోలైట్ల సమతుల్యతకు సహాయపడుతుంది.

నీరు, ఓఆర్‌ఎస్‌:
జ్వరం సమయంలో చెమట, నీరసం కారణంగా తగ్గే ద్రవాలను భర్తీ చేయడానికి ఉపయోగపడతాయి.

పండ్లు:
అరటిపండు, యాపిల్‌, బొప్పాయి వంటి సులభంగా జీర్ణమయ్యే పండ్లు తీసుకోవచ్చు.

పెరుగు:
గొంతు సమస్యలు లేకపోతే, వైద్యుల సూచన మేరకు పెరుగు తీసుకోవచ్చు.

జ్వరంలో దూరంగా ఉంచాల్సినవి

జ్వరం ఉన్నప్పుడు ఎక్కువగా నూనెలో వేయించిన పదార్థాలు, మసాలా ఎక్కువగా ఉన్న ఆహారం, జీర్ణం కావడానికి కష్టమైన పదార్థాలను తగ్గించడం మంచిది. అలాగే శరీరానికి అవసరమైనంత నీరు తీసుకోవడం చాలా ముఖ్యం.

ఎప్పుడు వైద్యులను సంప్రదించాలి?

జ్వరం కొన్ని రోజుల పాటు తగ్గకపోతే
అధిక ఉష్ణోగ్రత కొనసాగితే
ఆకలి పూర్తిగా లేకపోతే
తరచూ వాంతులు వస్తే
తీవ్రమైన నీరసం, డీహైడ్రేషన్‌ లక్షణాలు కనిపిస్తే
శ్వాస తీసుకోవడంలో ఇబ్బంది ఉంటే

వెంటనే వైద్యులను సంప్రదించడం అవసరం.

సరైన విశ్రాంతి, తగినంత ద్రవాలు, పోషకాహారం తీసుకోవడం ద్వారా చాలా వరకు జ్వరం నుంచి త్వరగా కోలుకునే అవకాశం ఉంటుంది. అయితే జ్వరం వెనుక ఉన్న అసలు కారణాన్ని గుర్తించి అవసరమైన చికిత్స తీసుకోవడం కూడా అంతే ముఖ్యం.