రక్తహీనత ప్రభావం మెదడుపై ఎలా ఉంటుంది?

రక్తహీనత ఉన్నవారికి జ్ఞాపకశక్తి సమస్యలు వచ్చే అవకాశం ఎక్కువగా ఉండొచ్చని తాజాగా జరిగిన ఒక అధ్యయనం ప్రకారం వెల్లడైంది. ముఖ్యంగా వృద్ధులపై చేసిన పరిశోధనలో, రక్తహీనత కేవలం శారీరక బలహీనత మాత్రమే కాకుండా మెదడు ఆరోగ్యాన్ని కూడా ప్రభావితం చేయగలదని తెలిసింది.

రక్తహీనత వల్ల మెదడుకు సంబంధించిన కొన్ని మార్పులు (బయోమార్కర్లు) ప్రభావితమవుతాయి. దీనివల్ల మతిమరుపు వచ్చే ప్రమాదం పెరగవచ్చని నిపుణులు చెబుతున్నారు. అయితే దీన్ని నేరుగా కారణంగా కాకుండా ఒక ప్రమాద కారకంగా మాత్రమే పరిగణిస్తున్నారు.

రక్తహీనత – మతిమరుపు మధ్య సంబంధం

ఒక అధ్యయనం ప్రకారం, 60 ఏళ్లు పైబడిన వారిలో రక్తహీనత ఉన్నవారికి మతిమరుపు వచ్చే అవకాశం ఎక్కువగా ఉండొచ్చని తేలింది. రక్తహీనత వల్ల హిమోగ్లోబిన్ స్థాయిలు తగ్గుతాయి. దాంతో మెదడుకు సరైన ఆక్సిజన్ అందకపోవచ్చు. దీర్ఘకాలంగా ఆక్సిజన్ లోపం ఉంటే మెదడు కణాలు బలహీనపడతాయి. దాని ప్రభావంగా జ్ఞాపకశక్తి తగ్గడం, ఆలోచనా సామర్థ్యం తగ్గడం వంటి సమస్యలు రావచ్చు. రక్తహీనత లేని వారితో పోలిస్తే, రక్తహీనత ఉన్నవారిలో మతిమరుపు ప్రమాదం ఎక్కువగా ఉన్నట్లు పరిశోధనలో తేలింది.

అధ్యయనంలో ఏమి తేలింది?

ఈ పరిశోధనలో 2,000 మందికి పైగా వృద్ధులను సుమారు 9 సంవత్సరాలు పరిశీలించారు. ప్రారంభంలో రక్తహీనత ఉన్నవారికి తర్వాతి కాలంలో మతిమరుపు వచ్చే అవకాశం ఎక్కువగా ఉన్నట్లు గుర్తించారు. అలాగే, అల్జీమర్స్ వంటి వ్యాధులతో సంబంధం ఉన్న కొన్ని బయోమార్కర్లు కూడా వీరిలో ఎక్కువగా ఉన్నట్లు కనుగొన్నారు. ఇది మెదడులో మార్పులు జరుగుతున్న సంకేతంగా భావిస్తారు.

నిపుణుల ప్రకారం, రక్తహీనతను మతిమరుపుకు నేరుగా కారణంగా చెప్పలేము. ఇది కేవలం ఒక ప్రమాద కారకం మాత్రమే. అంటే రక్తహీనత ఉన్న ప్రతి ఒక్కరికీ మతిమరుపు వస్తుందన్నది కాదు. వయస్సు, జీవనశైలి, ఇతర ఆరోగ్య సమస్యలు కూడా దీనిపై ప్రభావం చూపుతాయి. అందుకే రక్తహీనతను నిర్లక్ష్యం చేయకుండా సమయానికి గుర్తించి చికిత్స తీసుకోవడం చాలా అవసరం. దీంతో మెదడు ఆరోగ్యంపై వచ్చే ప్రభావాన్ని తగ్గించుకోవచ్చు.