నేను బాధ్యత తీసుకుంటున్నా: సీబీఎస్‌ఈ ఓఎస్‌ఎం వివాదంపై ధర్మేంద్ర ప్రధాన్‌

సీబీఎస్‌ఈ 12వ తరగతి ఆన్‌స్క్రీన్ మార్కింగ్ (OSM) విధానంపై కొనసాగుతున్న వివాదం నేపథ్యంలో కేంద్ర విద్యాశాఖ మంత్రి ధర్మేంద్ర ప్రధాన్ కీలక వ్యాఖ్యలు చేశారు. విద్యార్థులు, తల్లిదండ్రుల ఆందోళనలపై స్పందిస్తూ, మూల్యాంకన ప్రక్రియలో ఎలాంటి అవకతవకలు జరిగినా బాధ్యులను వదిలిపెట్టబోమని ఆయన స్పష్టం చేశారు.

ఈ సమస్యలపై తాను పూర్తి బాధ్యత తీసుకుంటున్నానని పేర్కొన్న మంత్రి, “వాటిని సరిచేస్తాం, సరైన పరిష్కారాలు కనుగొంటాం” అని హామీ ఇచ్చారు. దిల్లీలో సీబీఎస్‌ఈ అధికారులతో జరిగిన సమావేశం అనంతరం ఆయన మీడియాతో మాట్లాడారు.

ఆన్‌స్క్రీన్ మార్కింగ్ విధానాన్ని సమర్థించిన ఆయన, ఇది అంతర్జాతీయంగా ఉపయోగిస్తున్న ఆధునిక డిజిటల్ వ్యవస్థ అని వివరించారు. 98 లక్షల జవాబు పత్రాల స్కానింగ్ కాపీలు ఆన్‌లైన్‌లో అందుబాటులో ఉంచామని, ఒక్కో పత్రంలో సుమారు 40 పేజీలు ఉండటంతో మొత్తం కోట్ల సంఖ్యలో పేజీలను డిజిటల్‌గా ప్రాసెస్ చేసినట్లు తెలిపారు.

విద్యార్థుల మార్కుల విషయంలో పారదర్శకత కోసం ఈ వ్యవస్థను తీసుకువచ్చామని చెప్పారు. అయితే కొందరు దీన్ని తప్పుగా అర్థం చేసుకుంటూ ఆందోళన కలిగించేలా ప్రకటనలు చేస్తున్నారని ఆయన విమర్శించారు.

ఇదిలా ఉండగా, సీబీఎస్‌ఈ కూడా ఈ వ్యవస్థ సురక్షితమైన ఐటీ ప్లాట్‌ఫామ్ అని స్పష్టం చేసింది. మూల్యాంకన పోర్టల్‌లో ఎలాంటి సాంకేతిక లోపాలు లేవని తెలిపింది. సమాధాన పత్రాల స్కానింగ్, ప్రాసెసింగ్ కోసం బలమైన డిజిటల్ వ్యవస్థను ఉపయోగిస్తున్నామని బోర్డు వెల్లడించింది.

కొత్త విధానంపై కొందరు విద్యార్థులు తమ సమాధాన పత్రాలు తారుమారయ్యాయని ఆరోపించడంతో వివాదం మరింత పెరిగింది. దీనిపై దర్యాప్తు కొనసాగుతుందని, ఫిర్యాదులను పరిష్కరిస్తామని సీబీఎస్‌ఈ హామీ ఇచ్చింది.