ఐఫోన్‌ అంటే ఇంత క్రేజా?.. ఈ ఫీచర్లే అసలు కారణం

ఐఫోన్‌ కొనాలనే ఆసక్తి టెక్‌ ప్రియుల్లో ఎప్పటినుంచో కనిపిస్తోంది. కొత్త సిరీస్‌ విడుదల అవుతుందంటే చాలు.. ఫీచర్లు, ధర, డిజైన్‌, కెమెరా, పనితీరుపై భారీగా చర్చ జరుగుతుంది. కొందరికి ఇది స్టేటస్‌ సింబల్‌గా కనిపిస్తే.. మరికొందరు భద్రత, పనితీరు, సాఫ్ట్‌వేర్‌ అప్‌డేట్ల కోసం ఐఫోన్‌ను ఎంచుకుంటారు.

ఐఫోన్‌లో యాప్‌ల భద్రతకు యాపిల్‌ అధిక ప్రాధాన్యం ఇస్తుంది. యాప్‌ స్టోర్‌లోకి వచ్చే అప్లికేషన్లను పరిశీలించిన తర్వాతే అందుబాటులోకి తీసుకువస్తారు. యూజర్‌ అనుమతి లేకుండా వ్యక్తిగత సమాచారాన్ని యాప్‌లు వినియోగించకుండా అనేక నియంత్రణలు ఉంటాయి.

ఐఫోన్‌ హార్డ్‌వేర్‌, సాఫ్ట్‌వేర్‌ను యాపిల్‌ స్వయంగా రూపొందించడం మరో ప్రత్యేకత. సొంత చిప్‌లు, ఆపరేటింగ్‌ సిస్టమ్‌తో పరికర పనితీరు స్థిరంగా ఉండేలా సంస్థ ప్రయత్నిస్తుంది. బ్యాటరీ నిర్వహణ, వేడి నియంత్రణ, సాఫ్ట్‌వేర్‌ అప్‌డేట్లు కూడా యూజర్లకు అదనపు ప్రయోజనాలుగా నిలుస్తాయి.

ఫేస్‌ ఐడీ, సెక్యూర్‌ ఎన్‌క్లేవ్‌ వంటి సాంకేతికతలు ఐఫోన్‌లో భద్రతను పెంచుతాయి. యాపిల్‌ ఖాతా ద్వారా యూజర్‌కు చెందిన వివిధ పరికరాలను అనుసంధానించుకోవచ్చు. వ్యక్తిగత సమాచారం రక్షణకు యాపిల్‌ అనేక స్థాయిల భద్రతా వ్యవస్థలను ఉపయోగిస్తుంది.

ఐఫోన్‌తో పాటు ఐప్యాడ్‌, మ్యాక్‌, యాపిల్‌ వాచ్‌ వంటి పరికరాలు ఉపయోగించే వారికి ఎకోసిస్టమ్‌ పెద్ద ప్లస్‌. ఒక పరికరంలో ప్రారంభించిన పనిని మరో పరికరంలో కొనసాగించడం, ఫైళ్లను పంచుకోవడం వంటి పనులు సులభంగా చేయవచ్చు.

ఐఫోన్‌ కెమెరాలకు ప్రపంచవ్యాప్తంగా మంచి పేరు ఉంది. ఫొటోలు, వీడియోల నాణ్యతతో పాటు వీడియో రికార్డింగ్‌, రంగుల నిర్వహణ, స్థిరీకరణ వంటి అంశాల్లోనూ ఐఫోన్‌ ప్రత్యేక గుర్తింపు తెచ్చుకుంది.

ఐఫోన్లకు సాధారణంగా ఇతర స్మార్ట్‌ఫోన్లతో పోలిస్తే మంచి రీసేల్‌ విలువ ఉంటుందని మార్కెట్‌లో భావిస్తారు. పాత ఫోన్‌ను ట్రేడ్‌-ఇన్‌ చేయడం లేదా విక్రయించడం ద్వారా కొత్త పరికరానికి మారడం కొంత సులభమవుతుంది.

ఐఫోన్‌కు ఉన్న ప్రత్యేకతలతో పాటు కొన్ని పరిమితులూ ఉన్నాయి. ఇతర ప్రీమియం ఫోన్లతో పోలిస్తే ధర ఎక్కువగా ఉండటం, మెమొరీ కార్డు ద్వారా స్టోరేజ్‌ పెంచుకునే అవకాశం లేకపోవడం, కస్టమైజేషన్‌ పరిమితంగా ఉండటం వంటివి ప్రధానమైనవి. అలాగే కొన్ని ఉపకరణాలను విడిగా కొనుగోలు చేయాల్సి రావడం అదనపు ఖర్చుగా మారొచ్చు.