జపాన్‌ చక్రవర్తి వారసత్వ చట్టంలో కీలక సవరణ

జపాన్‌ పార్లమెంట్‌ చక్రవర్తి వారసత్వానికి సంబంధించిన ఇంపీరియల్‌ హౌస్‌ చట్టంలో కీలక మార్పులకు ఆమోదం తెలిపింది. అయితే శతాబ్దాలుగా కొనసాగుతున్న పురుష వారసులకే చక్రవర్తి పదవి దక్కాలనే సంప్రదాయంలో ఎలాంటి మార్పు చేయలేదు. దీంతో ప్రస్తుత చక్రవర్తి నరుహిటో కుమార్తె యువరాణి అయికో భవిష్యత్‌ చక్రవర్తి అవుతారనే అంచనాలకు తెరపడింది.

19వ శతాబ్దంలో రూపొందించిన ఇంపీరియల్‌ హౌస్‌ చట్టానికి చేసిన తాజా సవరణ ప్రకారం.. రాజవంశంలో తండ్రి వైపు నుంచి రక్తసంబంధం ఉన్న పురుషులకే సింహాసన వారసత్వ హక్కు కొనసాగుతుంది. అంతేకాకుండా రాజ కుటుంబంతో దూరపు రక్తసంబంధం ఉన్న పురుషులను దత్తత తీసుకుని, వారి వారసులను భవిష్యత్‌ చక్రవర్తులుగా తీర్చిదిద్దేందుకు కూడా కొత్త నిబంధనలు అవకాశం కల్పిస్తున్నాయి.

ప్రస్తుత చక్రవర్తి నరుహిటోకు కుమారుడు లేరు. ఆయన ఏకైక సంతానమైన యువరాణి అయికోకు ప్రజల్లో మంచి ఆదరణ ఉంది. ఆమెను తదుపరి చక్రవర్తిగా నియమించాలని జపాన్‌లోని కొంతమంది ప్రజలు, నిపుణులు గతంలో డిమాండ్‌ చేశారు. మహిళలకు కూడా సింహాసన వారసత్వ హక్కు కల్పించాలనే చర్చలు చాలాకాలంగా కొనసాగుతున్నాయి.

అయితే తాజా చట్ట సవరణతో మహిళా వారసత్వానికి అవకాశం కల్పించలేదు. దీంతో ప్రస్తుతం నరుహిటో తర్వాత ఆయన తమ్ముడు ప్రిన్స్‌ అకిషినో (60) వారసుడిగా కొనసాగనున్నారు. అకిషినో కుమారుడు ప్రిన్స్‌ హిసాహిటో కూడా భవిష్యత్‌ వారసుల జాబితాలో ఉన్నారు.

జపాన్‌ రాజ కుటుంబ సభ్యుల సంఖ్య తగ్గిపోతుండటం, వారసత్వ సంక్షోభం నేపథ్యంలో ఈ చట్ట సవరణకు ప్రాధాన్యం ఏర్పడింది. మహిళా వారసత్వంపై చర్చలు కొనసాగుతున్నప్పటికీ, సంప్రదాయాలను కొనసాగించాలనే వాదనతో ప్రస్తుత ప్రభుత్వం ఈ మార్పులను పరిమితం చేసింది.

జపాన్‌ చక్రవర్తి వ్యవస్థ ప్రపంచంలోనే అత్యంత పురాతన రాజవంశ సంప్రదాయాల్లో ఒకటిగా గుర్తింపు పొందింది. ఈ వారసత్వ చట్టంపై భవిష్యత్‌లో మరిన్ని చర్చలు జరిగే అవకాశం ఉందని రాజకీయ విశ్లేషకులు భావిస్తున్నారు.