కేజ్రీవాల్‌కు హైకోర్టు షాక్: 'ముఖ్యమంత్రి హామీ ఇస్తే సరిపోదు..జీవో ఉండాల్సిందే!'

కరోనా లాక్‌డౌన్ సమయంలో నిరుపేద అద్దెదారులు ఎవరూ అద్దె చెల్లించాల్సిన అవసరం లేదని, వారి తరపున ప్రభుత్వమే ఆ ఖర్చు భరిస్తుందని అరవింద్ కేజ్రీవాల్ 2020లో ఇచ్చిన హామీపై హైకోర్టు స్పష్టత ఇచ్చింది. కేవలం ముఖ్యమంత్రి హోదాలో మీడియా ముందు చేసిన ప్రకటన చట్టపరంగా అమలు చేయదగినది కాదని ధర్మాసనం తీర్పునిచ్చింది. ఏదైనా హామీ అమలు కావాలంటే అది ఖచ్చితంగా ప్రభుత్వ ఉత్తర్వు (GO), నోటిఫికేషన్ లేదా అధికారిక సర్క్యులర్ రూపంలో ఉండాలని జస్టిస్ సి. హరిశంకర్ నేతృత్వంలోని ధర్మాసనం స్పష్టం చేసింది. ఈ తీర్పుతో గతంలో ఏకసభ్య ధర్మాసనం ఇచ్చిన తీర్పును కోర్టు కొట్టివేసింది, ఇది ఉచిత హామీల విషయంలో రాజకీయ నాయకులకు ఒక హెచ్చరికగా మారింది.

న్యాయమూర్తి వైదొలగాలన్న విజ్ఞప్తిపై రచ్చ

మద్యం కుంభకోణం కేసులో తనపై వచ్చిన ఆరోపణలను విచారిస్తున్న జస్టిస్ స్వర్ణకాంతా శర్మ ఈ కేసు నుంచి తప్పుకోవాలని కేజ్రీవాల్ చేసిన విజ్ఞప్తి హైకోర్టులో తీవ్ర దుమారానికి దారితీసింది. సోమవారం జరిగిన విచారణలో కేజ్రీవాల్ స్వయంగా హాజరై తన వాదనలు వినిపించారు. అయితే, దీనిపై కేంద్ర ప్రభుత్వం తరపున హాజరైన సొలిసిటర్ జనరల్ తుషార్ మెహతా తీవ్రంగా స్పందించారు. కేజ్రీవాల్ కోర్టులో “నాటకాలు” ఆడుతున్నారని, వ్యవస్థపై నమ్మకం లేని వారిపై కఠిన చర్యలు తీసుకోవాలని కోరారు. విచారణను కావాలనే జాప్యం చేస్తున్నారని మండిపడ్డారు. దీనిపై స్పందించిన న్యాయమూర్తి, ఈ అంశంపై ఏవైనా అభ్యంతరాలు ఉంటే లిఖితపూర్వకంగా దరఖాస్తు చేయాలని సూచిస్తూ విచారణను ఏప్రిల్ 13కి వాయిదా వేశారు.