చిన్నారులపై లైంగిక వేధింపుల కంటెంట్‌.. భారత్‌కు నేరుగా రిపోర్ట్‌ చేయనున్న మెటా

సామాజిక మాధ్యమాల్లో చిన్నారుల భద్రతను మరింత పటిష్ఠం చేసే దిశగా మెటా కీలక నిర్ణయం తీసుకుంది. చిన్నారులపై లైంగిక వేధింపులకు సంబంధించిన కంటెంట్‌ (CSAM)ను ఇకపై భారత దర్యాప్తు సంస్థలకు నేరుగా రిపోర్ట్‌ చేసేందుకు మెటా అంగీకరించినట్లు కేంద్ర ప్రభుత్వ వర్గాలు వెల్లడించాయి. ఇప్పటివరకు ఇలాంటి సమాచారాన్ని అమెరికాకు చెందిన నేషనల్‌ సెంటర్‌ ఫర్‌ మిస్సింగ్‌ అండ్‌ ఎక్స్‌ప్లాయిటెడ్‌ చిల్డ్రన్‌ (NCMEC)కు నివేదించేది.

కేంద్ర ప్రభుత్వం సోషల్‌ మీడియా ప్లాట్‌ఫామ్‌లతో జరుపుతున్న వరుస సంప్రదింపుల నేపథ్యంలో ఈ నిర్ణయం వెలువడింది. ఆన్‌లైన్‌ వేదికల్లో పిల్లలను లక్ష్యంగా చేసుకునే లైంగిక వేధింపులు, దోపిడీ, ఇతర హానికర కంటెంట్‌ను గుర్తించి తొలగించడంతో పాటు, అవసరమైనప్పుడు దర్యాప్తు సంస్థలకు సమాచారం అందించాల్సిన బాధ్యత ప్లాట్‌ఫామ్‌లపై ఉందని కేంద్రం స్పష్టం చేసింది.

భారత్‌లోని మెటా ప్రతినిధులకు ఈ అంశంపై కేంద్రం గతంలో నోటీసులు జారీ చేసింది. కంటెంట్‌ను గుర్తించేందుకు ఉపయోగిస్తున్న అల్గారిథమ్స్‌, కంటెంట్‌ మోడరేషన్‌ వ్యవస్థలు, డీప్‌ఫేక్‌ కంటెంట్‌ను అరికట్టే విధానం, భారత చట్టాలకు అనుగుణంగా తీసుకుంటున్న చర్యలపై అధికారులు వివరాలు కోరారు.

కేంద్రం ఒత్తిడి నేపథ్యంలో మెటా తన విధానంలో మార్పుకు అంగీకరించినట్లు ప్రభుత్వ వర్గాలు తెలిపాయి. ఇకపై చిన్నారులపై లైంగిక వేధింపులకు సంబంధించిన కేసులు, అనుమానాస్పద కంటెంట్‌కు సంబంధించిన వివరాలను మధ్యవర్తి సంస్థ ద్వారా కాకుండా భారత దర్యాప్తు సంస్థలకు నేరుగా అందించే అవకాశం ఏర్పడనుంది.

ఇప్పటివరకు మెటా NCMECకు నివేదికలు అందించేది. NCMEC వాటిని ప్రపంచవ్యాప్తంగా సంబంధిత దర్యాప్తు సంస్థలతో పంచుకునేది. ఈ విధానంలో భాగంగానే భారత సంస్థలకు కూడా సమాచారం చేరేది. తాజా నిర్ణయంతో భారత్‌కు సంబంధించిన కేసుల్లో సమాచార మార్పిడి మరింత ప్రత్యక్షంగా జరిగే అవకాశం ఉంది.

పిల్లలకు సురక్షితమైన డిజిటల్‌ వాతావరణం కల్పించేందుకు ఇది తొలి అడుగు మాత్రమేనని కేంద్ర ప్రభుత్వ వర్గాలు పేర్కొన్నాయి. హానికర కంటెంట్‌ను గుర్తించడం, వేగంగా తొలగించడం, నేరాలకు పాల్పడే వ్యక్తులపై దర్యాప్తుకు సహకరించడం వంటి అంశాల్లో సోషల్‌ మీడియా సంస్థలు మరింత బాధ్యతాయుతంగా వ్యవహరించాలని కేంద్రం స్పష్టం చేసింది.