అర్హులెవరో గుర్తించిన మంత్రి సుబుద్ధి

కళింగ రాజ్యానికి కీర్తిసేనుడు అనే రాజు పాలకుడు. ఒక రోజు తన మంత్రి సుబుద్ధిని పిలిచి, “మన రాజ్యంలో పేదవారికి సహాయం చేయాలని ఉంది. కానీ నిజంగా అర్హులెవరో నువ్వే గుర్తించాలి” అని ఆదేశించాడు.మంత్రి రాజ్యమంతా దండోరా వేయించి, సాయం కావాల్సిన వారు కోటకు రావాలని ప్రకటించాడు. మరుసటి ఉదయం కోట వద్ద పెద్ద సంఖ్యలో ప్రజలు చేరుకున్నారు. వారిలో నిజమైన పేదలతో పాటు, అత్యాశతో వచ్చిన కొందరు ధనవంతులు, భూస్వాములు కూడా ఉన్నారు.

వచ్చిన వారందరినీ ఒక వరుసలో నిలబెట్టిన మంత్రి, “రాజుగారు ఇక్కడికి వచ్చిన ప్రతి ఒక్కరికీ ఒక్కో వరహా ఇవ్వమన్నారు” అని ప్రకటించాడు. ఇది విన్న కొందరు, “ఒక్క వరహాతో ఏమవుతుంది?” అంటూ నిరాశగా వెళ్లిపోయారు.

మరికొందరు, “ఇది మొదటిసారి మాత్రమే. తర్వాత ఇంకాస్త ఇస్తారేమో” అనుకుని అక్కడే ఉన్నారు. కొద్దిసేపటికి మంత్రి అక్కడ మిగిలిన వారందరికీ ఒక్కో వరహా ఇచ్చి, “ఇప్పుడు మీరు వెళ్లవచ్చు” అని చెప్పాడు. అయినప్పటికీ చాలామంది, “ఒక్కటే అయితే వద్దు” అంటూ వదిలేసి వెళ్లిపోయారు. అయితే కొందరు మాత్రం ఆ వరహాను గౌరవంగా స్వీకరించారు.

మంత్రి వారిని రాజు దగ్గరకు తీసుకెళ్లి, “మహారాజా! మీ సాయానికి నిజంగా అర్హులైనవారు వీరే” అని చెప్పాడు. వెంటనే రాజు వారి కుటుంబ పరిస్థితులను వివరంగా తెలుసుకుని, వారికి కొంత మూలధనం ఇచ్చి, మంచి ఆదాయం వచ్చే వ్యాపారం ప్రారంభించేందుకు సహాయం చేయమని ఆదేశించాడు.కొన్ని రోజుల్లోనే మంత్రి ఆ బాధ్యతను పూర్తిచేశాడు. రెండుమూడేళ్లలో కళింగ రాజ్యంలో పేదల సంఖ్య గణనీయంగా తగ్గిపోయింది. ప్రజలు ఆర్థికంగా బలపడటంతో రాజ్యమూ అభివృద్ధి మార్గంలో పయనించింది

సారాంశం: నిజమైన అవసరమున్నవారే చిన్న సహాయాన్ని కూడా విలువైనదిగా భావిస్తారు. సరైన వ్యక్తులను గుర్తించి, వారికి స్థిరమైన ఉపాధి కల్పిస్తే సమాజం మొత్తం అభివృద్ధి చెందుతుంది.