భార్యపై అనుమానంతో హత్య కుట్ర..టాస్క్‌ఫోర్స్‌కు చిక్కిన వ్యాపారి!!

భార్య చేసిన ద్రోహాన్ని భరించలేక ఒక వ్యక్తి ఆమెను, ఆమెతో సన్నిహితంగా ఉన్న వ్యక్తిని హత్య చేయాలని కుట్ర పన్నిన ఘటన నగరంలో వెలుగుచూసింది. అయితే నగర టాస్క్‌ఫోర్స్‌ పోలీసులకు ముందస్తుగా సమాచారం అందడంతో ఆ పథకం అమలు కాకముందే భగ్నమైంది. ఈ కేసులో ప్రధాన నిందితుడితో పాటు మరో ముగ్గురు అనుమానితులను పోలీసులు అదుపులోకి తీసుకున్నారు.

పోలీసుల వివరాల ప్రకారం… నగర శివారు ప్రాంతానికి చెందిన ఓ వ్యాపారి భార్య తీవ్రమైన అనారోగ్యంతో బాధపడుతోంది. ఆమె ఆరోగ్యం క్షీణించడంతో కోలుకునే అవకాశాలు లేకపోవడంతో ఆమె చెల్లెలిని రెండో వివాహం చేసుకున్నాడు. ప్రారంభంలో వారి దాంపత్య జీవితం సవ్యంగా సాగింది. అయితే కొంతకాలం తర్వాత రెండో భార్య ప్రవర్తనలో మార్పులు కనిపించాయి. ఆమె మరో వ్యక్తితో సన్నిహితంగా మెలుగుతున్నట్టు భర్తకు తెలిసింది.

ఈ విషయం తెలిసిన భర్త పలుమార్లు హెచ్చరించినా ఆమె ప్రవర్తనలో మార్పు రాకపోవడంతో పరిస్థితి మరింత ఉద్రిక్తంగా మారింది. ఈ విషయం బంధువులు, స్నేహితుల మధ్య చర్చకు రావడంతో తన పరువు పోయిందనే భావనతో అతడు తీవ్రంగా మనస్తాపానికి గురయ్యాడు. దీంతో రెండో భార్యను, ఆమెతో సంబంధం ఉన్న వ్యక్తిని హతమార్చాలని నిర్ణయించుకున్నాడు.

దీనికోసం బిహార్‌కు వెళ్లి దేశవాళీ పిస్తోలు, బుల్లెట్లు కొనుగోలు చేశాడు. నగరానికి తిరిగి వచ్చిన తర్వాత నిర్మానుష్య ప్రాంతాల్లో పిస్తోలు కాల్చుతూ సాధన కూడా చేసినట్లు పోలీసులు గుర్తించారు. అలాగే ఆ ఇద్దరిని చంపేందుకు సుపారీ గ్యాంగ్ కోసం పాత నేరస్తుల గురించి ఆరా తీస్తూ తిరిగాడు.

ఈ క్రమంలో అతని కదలికలపై అనుమానం వచ్చిన టాస్క్‌ఫోర్స్‌ పోలీసులు గూఢచర్యం నిర్వహించారు. చివరకు పక్కా సమాచారం ఆధారంగా నిందితుడిని అదుపులోకి తీసుకొని విచారణ ప్రారంభించారు. అతడితో పాటు కుట్రలో పాత్ర ఉన్న మరో ముగ్గురిని కూడా పోలీసులు అదుపులోకి తీసుకున్నారు. కేసుకు సంబంధించిన పూర్తి వివరాలను త్వరలో వెల్లడిస్తామని పోలీసులు తెలిపారు.