పాస్‌పోర్టు విదేశీ ప్రయాణ పత్రమే.. పౌరసత్వ గుర్తింపు కాదు: కేంద్రం స్పష్టత

పాస్‌పోర్టు ఉద్దేశ్యం, దాని చట్టపరమైన ప్రాముఖ్యతపై కేంద్ర ప్రభుత్వం మరోసారి స్పష్టత ఇచ్చింది. దేశ పౌరుల విదేశీ ప్రయాణాలను క్రమబద్ధీకరించేందుకు జారీ చేసే అధికారిక పత్రమే పాస్‌పోర్టు అని విదేశీ వ్యవహారాల మంత్రిత్వశాఖ వెల్లడించింది.

పాస్‌పోర్టును జారీ చేసే ముందు దరఖాస్తుదారుడి వివరాలను నిర్దిష్ట విధానంలో పరిశీలించి, ధ్రువీకరణ ప్రక్రియ పూర్తిచేస్తామని కేంద్రం తెలిపింది. ప్రస్తుతం దేశ జనాభాలో 8 శాతం కంటే తక్కువ మందివద్ద మాత్రమే పాస్‌పోర్టులు ఉన్నాయని పేర్కొంది.

పాస్‌పోర్టును పౌరసత్వ గుర్తింపు పత్రంగా పరిగణించవచ్చా? లేదా? అనే అంశంపై ఇటీవల చర్చ జరుగుతున్న నేపథ్యంలో విదేశీ వ్యవహారాలశాఖ అధికార ప్రతినిధి రణ్‌ధీర్‌ జయస్‌వాల్‌ ఈ విషయంపై వివరణ ఇచ్చారు.

1967 నాటి పాస్‌పోర్టు చట్టం, 1980 నాటి పాస్‌పోర్టు నిబంధనల ప్రకారం భారతీయ పాస్‌పోర్టులను జారీ చేస్తున్నట్లు ఆయన తెలిపారు. విదేశాలకు వెళ్లే భారతీయుల ప్రయాణాన్ని నియంత్రించడం, వారికి అంతర్జాతీయ ప్రయాణానికి అవసరమైన అధికారిక గుర్తింపును కల్పించడం పాస్‌పోర్టు ప్రధాన ఉద్దేశమని వివరించారు.

పాస్‌పోర్టు పొందేందుకు దరఖాస్తు చేసుకున్న వ్యక్తుల వివరాలను సంబంధిత సంస్థలు పరిశీలించిన అనంతరం మాత్రమే జారీ చేస్తామని కేంద్రం తెలిపింది. భారతీయ పౌరులతో పాటు, నిబంధనలకు అనుగుణంగా అర్హత కలిగిన విదేశీయులకు కూడా కొన్ని రకాల పాస్‌పోర్టు పత్రాలను అందించే అవకాశం ఉందని వివరించింది.

అంతర్జాతీయ ప్రయాణ సమయంలో పాస్‌పోర్టు ఒక ముఖ్యమైన పత్రంగా పనిచేస్తుందని, దేశాల మధ్య ప్రయాణ అనుమతులు, వీసా ప్రక్రియల్లో ఇది కీలక పాత్ర పోషిస్తుందని అధికారులు తెలిపారు. అయితే పాస్‌పోర్టు ఒక్కటే పౌరసత్వానికి తుది ఆధారమని భావించరాదని స్పష్టం చేశారు.

పాస్‌పోర్టు జారీ విధానంలో భద్రతా ప్రమాణాలు, గుర్తింపు ధ్రువీకరణ ప్రక్రియలకు ప్రభుత్వం అత్యంత ప్రాధాన్యం ఇస్తుందని విదేశాంగ శాఖ వెల్లడించింది.