చిరంజీవి పుట్టినరోజున పవన్‌ భావోద్వేగ పోస్టు.. ఆసక్తికర జ్ఞాపకాలు

మెగాస్టార్‌ చిరంజీవి పుట్టినరోజు సందర్భంగా ఆయన సోదరుడు, ఏపీ ఉప ముఖ్యమంత్రి పవన్‌ కల్యాణ్‌ భావోద్వేగపూరిత సందేశాన్ని పంచుకున్నారు. చిన్ననాటి జ్ఞాపకాలను గుర్తుచేసుకుంటూ అన్నయ్యతో తనకున్న అనుబంధాన్ని వివరించారు. చిరంజీవి హీరో కాకముందు నుంచే తనకు ఆయన హీరో అని, తాను ఆయనకు అభిమానినని పవన్‌ పేర్కొన్నారు.

కాలేజీ చదువు కోసం చిరంజీవి ఇంటికి దూరంగా ఉన్న రోజులను పవన్‌ గుర్తుచేసుకున్నారు. వేసవి సెలవుల్లో అన్నయ్య ఇంటికి వస్తే కుటుంబంలో పండగ వాతావరణం ఉండేదని తెలిపారు. ఆయన తిరిగి కాలేజీకి వెళ్లినప్పుడు తామంతా ఎంతో బాధపడేవాళ్లమని చెప్పారు. ఇంట్లో ఆయన లేని లోటు స్పష్టంగా కనిపించేదని పేర్కొన్నారు.

తాను స్కూల్లో చదువుతున్న సమయంలో చిరంజీవితో కలిసి నడవడం ఎంతో గర్వంగా అనిపించేదని పవన్‌ తెలిపారు. ప్రపంచంలోనే గొప్ప వ్యక్తి పక్కన నడుస్తున్నాననే భావన కలిగేదని చెప్పారు. షూటింగ్‌ల కోసం ఇతర దేశాలకు వెళ్లినప్పుడు అన్నయ్య తమ కోసం బహుమతులు తీసుకొచ్చేవారని, ఎప్పుడూ తమ సంతోషాన్నే కోరుకునేవారని గుర్తుచేసుకున్నారు.

చిరంజీవి వివాహం సమయంలో జరిగిన సంఘటనను కూడా పవన్‌ ప్రత్యేకంగా ప్రస్తావించారు. పెళ్లి తర్వాత అన్నయ్య తమకు దూరమవుతారేమోనని భయపడి ఓ గదిలో నిశ్శబ్దంగా ఏడ్చానని చెప్పారు. అది గమనించిన చిరంజీవి తన భార్యను పవన్‌ వద్దకు తీసుకువచ్చి పరిచయం చేసిన సందర్భాన్ని గుర్తుచేసుకున్నారు. అప్పటి నుంచి వారిద్దరూ తనపై చూపిన ప్రేమను మాటల్లో చెప్పలేనని పవన్‌ పేర్కొన్నారు.

చిరంజీవి సినిమా షూటింగ్‌ల కోసం ఎంతో కష్టపడేవారని పవన్‌ తెలిపారు. పలుమార్లు షూటింగ్‌లలో గాయపడినప్పటికీ పని కొనసాగించేవారని చెప్పారు. చెన్నైలోని వేడి, ఉక్కపోతలో 18 గంటల పాటు పనిచేసి.. అర్ధరాత్రి ఇంటికి చేరుకునే సమయానికి నిలబడటానికి కూడా ఓపిక లేని పరిస్థితిలో ఉండేవారని గుర్తుచేసుకున్నారు. అన్నయ్య కష్టంపై ఆధారపడి తాము జీవిస్తున్నామనే ఆలోచన తనను అప్పట్లో బాధించేదని తెలిపారు. అయినప్పటికీ చిరంజీవి తనను ఎప్పుడూ ఒక్క మాట కూడా అనలేదని పవన్‌ చెప్పారు.‘నాకు ఆయన మాత్రమే హీరో’ అంటూ చిరంజీవికి పవన్‌ కల్యాణ్‌ పుట్టినరోజు శుభాకాంక్షలు తెలిపారు.

పవన్‌ కల్యాణ్‌ భావోద్వేగ సందేశంపై చిరంజీవి కూడా స్పందించారు. తన తమ్ముడు గుర్తుచేసిన జ్ఞాపకాలు తమ జీవితంలోని విలువైన అధ్యాయాలను మరోసారి గుర్తు చేశాయని, అవి తనను భావోద్వేగానికి గురిచేశాయని తెలిపారు.

తాను అన్నయ్యగా చేసిన ప్రేమ, త్యాగాలు తన బాధ్యత, ఆప్యాయతల్లో భాగమేనని చిరంజీవి పేర్కొన్నారు. ప్రస్తుతం ప్రజల కోసం పవన్‌ చూపిస్తున్న ధైర్యం, పట్టుదల, దేశం పట్ల ఆయనకున్న ప్రేమ తనకు ఎంతో గర్వంగా ఉందన్నారు.

లక్షలాది మందికి పవన్‌ బలంగా, స్ఫూర్తిగా మారారని చిరంజీవి అన్నారు. పవన్‌ తనను హీరోగా భావిస్తున్నప్పటికీ.. ఆయన నిజాయతీ, పట్టుదల, నిస్వార్థ ప్రయాణం తనకు కూడా ఎన్నో విధాలుగా స్ఫూర్తినిచ్చాయని తెలిపారు.

పవన్‌ పంచుకున్న అందమైన జ్ఞాపకాలకు ధన్యవాదాలు తెలిపిన చిరంజీవి.. తన తమ్ముడి ప్రేమ తన జీవితంలో లభించిన గొప్ప ఆశీర్వాదాల్లో ఒకటని పేర్కొన్నారు. ఎప్పటికీ పవన్‌ను ప్రేమిస్తూనే ఉంటానని భావోద్వేగంగా స్పందించారు.