అయోధ్య రామాలయం విరాళాల దుర్వినియోగంపై బీజేపీ క్షమాపణ చెప్పాలి: పొన్నం ప్రభాకర్‌

అయోధ్యలో రామాలయం నిర్మాణం కోసం భక్తులు ఇచ్చిన విరాళాలు, ఆస్తుల దుర్వినియోగంపై ఆరోపణలు రావడం బాధాకరమని మంత్రి పొన్నం ప్రభాకర్‌ అన్నారు. ఈ వ్యవహారంలో బీజేపీ నైతిక బాధ్యత వహించి దేశ ప్రజలకు క్షమాపణ చెప్పాలని ఆయన డిమాండ్‌ చేశారు.

సిద్దిపేట జిల్లా హుస్నాబాద్‌ మండలం జిల్లెలగడ్డ గ్రామంలో సోమవారం నిర్వహించిన విలేకరుల సమావేశంలో పొన్నం ప్రభాకర్‌ మాట్లాడారు. రాముడిపై భక్తి, విశ్వాసంతో దేశవ్యాప్తంగా కోట్లాది మంది ప్రజలు రామాలయ నిర్మాణానికి విరాళాలు అందించారని తెలిపారు. భక్తులు ఇచ్చిన సొమ్మును దుర్వినియోగం చేయడం హిందువుల మనోభావాలను దెబ్బతీసే చర్య అని వ్యాఖ్యానించారు.

రామజన్మభూమి ఉద్యమం, ఆలయ నిర్మాణం అంశాలను రాజకీయాలకు అతీతంగా చూడాల్సిన అవసరం ఉందని పొన్నం పేర్కొన్నారు. గతంలో రాజీవ్‌గాంధీ సెక్యులర్‌ భావాలతో వ్యవహరించి రామజన్మభూమి అంశంలో కీలక నిర్ణయాలు తీసుకున్నారని గుర్తు చేశారు.

“ప్రజల విశ్వాసంతో నిర్మిస్తున్న ఆలయానికి భక్తులు ఎంతో భక్తిశ్రద్ధలతో విరాళాలు అందించారు. ఆ సొమ్ము, ఆస్తుల విషయంలో ఎలాంటి అవకతవకలు జరిగినా వాటిపై పారదర్శకంగా సమాధానం ఇవ్వాలి” అని మంత్రి అన్నారు.

రామాలయం పేరును ఉపయోగించుకుని కొందరు రాజకీయ, ఆర్థిక ప్రయోజనాలు పొందేందుకు ప్రయత్నించారని పొన్నం ఆరోపించారు. రామజన్మభూమి ట్రస్టులో ఉన్న కీలక వ్యక్తులకు ప్రభుత్వ పెద్దలతో సంబంధాలు ఉన్నందున ఈ అంశంపై బాధ్యత తీసుకోవాలని డిమాండ్‌ చేశారు.

దేశంలోని హిందువుల విశ్వాసాలకు సంబంధించిన అంశాల్లో ఎలాంటి అనుమానాలకు తావు లేకుండా పూర్తి వివరాలను ప్రజలకు వెల్లడించాలని ఆయన కోరారు. ఆలయ నిర్మాణం కోసం వచ్చిన విరాళాల వినియోగంపై స్పష్టత ఇవ్వాల్సిన అవసరం ఉందన్నారు.

ఈ సందర్భంగా కేంద్ర ప్రభుత్వం, బీజేపీపై విమర్శలు చేసిన పొన్నం ప్రభాకర్‌.. దేవుడి పేరుతో రాజకీయ లబ్ధి పొందడం సరికాదని అన్నారు. ప్రజల విశ్వాసాలను గౌరవిస్తూ పారదర్శక పాలన అందించాల్సిన బాధ్యత ప్రభుత్వాలపై ఉందని పేర్కొన్నారు.