ఆసుపత్రి నుంచి జైలుకు తరలింపు సమయంలో తప్పించుకున్న ఖైదీ

ఆసుపత్రి నుంచి జైలుకు తరలింపు సమయంలో జీవిత ఖైదీ పరారైన ఘటన గూడూరు రైల్వే స్టేషన్‌లో తీవ్ర కలకలం రేపింది. పోక్సో కేసులో జీవిత ఖైదు శిక్ష అనుభవిస్తున్న నంద్యాల జిల్లా వాసి సాకే రాజ్‌కుమార్‌ను కడప కేంద్ర కారాగారం నుంచి మానసిక చికిత్స కోసం విశాఖపట్నంలోని ప్రభుత్వ మానసిక ఆసుపత్రికి తరలించిన విషయం తెలిసిందే. చికిత్స అనంతరం భద్రతా సిబ్బంది పర్యవేక్షణలో తిరిగి జైలుకు తీసుకొస్తుండగా ఈ ఘటన చోటుచేసుకుంది.

రైలు గూడూరు రైల్వే స్టేషన్‌కు చేరుకున్న సమయంలో భద్రతా సిబ్బంది అప్రమత్తత లోపాన్ని ఉపయోగించుకుని రాజ్‌కుమార్‌ పారిపోయినట్లు అధికారులు తెలిపారు. వెంటనే రైల్వే పోలీసులకు సమాచారం అందించగా స్టేషన్ పరిసర ప్రాంతాల్లో గాలింపు చర్యలు ప్రారంభించారు. సీసీటీవీ దృశ్యాలను పరిశీలిస్తూ అతడు ఎటువైపు పారిపోయాడన్న దానిపై పోలీసులు ఆరా తీస్తున్నారు.

ఈ ఘటనపై ఉన్నతాధికారులు సీరియస్‌గా తీసుకుని భద్రతా లోపాలపై విచారణకు ఆదేశించారు. విధుల్లో నిర్లక్ష్యం వహించిన సిబ్బందిపై చర్యలు తీసుకునే అవకాశముంది. మరోవైపు పరారైన ఖైదీపై లుక్‌ఔట్ నోటీసులు జారీ చేసి, జిల్లా సరిహద్దుల్లో చెక్‌పోస్టులను అలర్ట్ చేశారు. ప్రజలు అప్రమత్తంగా ఉండాలని, అతని గురించి సమాచారం తెలిసిన వారు సమీప పోలీస్‌స్టేషన్‌కు తెలియజేయాలని అధికారులు విజ్ఞప్తి చేశారు.

ఇక ఏడాది క్రితం నంద్యాలలో జరిగిన కానిస్టేబుల్ హత్య కేసులోనూ రాజ్‌కుమార్ ప్రధాన నిందితుడిగా ఉండటం వల్ల ఈ పరారీ ఘటనను పోలీసులు అత్యంత ప్రాధాన్యంతో విచారిస్తున్నారు. త్వరలోనే అతడిని అదుపులోకి తీసుకొస్తామని అధికారులు విశ్వాసం వ్యక్తం చేశారు.