ప్రైవేటు పాఠశాలల ఫీజుల పెంపుపై పంజాబ్‌ సర్కార్‌ కఠిన నిర్ణయం

ప్రైవేటు పాఠశాలల్లో ఫీజుల పెంపును నియంత్రించేందుకు పంజాబ్‌ ప్రభుత్వం కీలక నిర్ణయం తీసుకుంది. ముఖ్యమంత్రి భగవంత్‌ మాన్‌ ఆదేశాల మేరకు రాష్ట్రంలోని అన్ని ప్రైవేటు పాఠశాలల ఫీజు వివరాలను పరిశీలించాలని విద్యాశాఖకు సూచించారు.

గత నాలుగేళ్లలో వసూలు చేసిన ఫీజుల పూర్తి రికార్డులను పది రోజుల్లోగా సమర్పించాలని అన్ని ప్రైవేటు పాఠశాలలను ప్రభుత్వం ఆదేశించింది. ఫీజుల పెంపులో పారదర్శకత తీసుకురావడంతో పాటు తల్లిదండ్రులపై అదనపు ఆర్థిక భారం పడకుండా చర్యలు చేపడుతున్నట్లు తెలిపింది.

గత మూడేళ్లుగా ఏటా 5 శాతానికి మించి ఫీజులు పెంచిన పాఠశాలలు, అదనంగా వసూలు చేసిన మొత్తాన్ని విద్యార్థుల తల్లిదండ్రులకు తిరిగి చెల్లించాలని ప్రభుత్వం స్పష్టం చేసింది. నిబంధనలకు విరుద్ధంగా ఫీజులు పెంచిన విద్యాసంస్థలపై కఠిన చర్యలు తీసుకుంటామని హెచ్చరించింది.

ఇకపై ప్రైవేటు పాఠశాలల ఫీజు రికార్డులను విద్యాశాఖ ప్రత్యేక పోర్టల్‌లో అందుబాటులో ఉంచనున్నట్లు ప్రభుత్వం వెల్లడించింది. దీని ద్వారా తల్లిదండ్రులు పాఠశాలల ఫీజు వివరాలను పరిశీలించుకునే అవకాశం కల్పించనున్నారు.

వార్షిక ఫీజులను 5 శాతానికి మించి పెంచకుండా పరిమితి విధిస్తూ ప్రభుత్వం ఆర్డినెన్సు జారీ చేసింది. ఈ నిబంధనలను ఉల్లంఘించే పాఠశాలలకు రూ.లక్ష వరకు జరిమానా విధించడంతో పాటు, అవసరమైతే ఆయా పాఠశాలల గుర్తింపును కూడా రద్దు చేసే అవకాశం ఉందని స్పష్టం చేసింది.

విద్యా రంగంలో ఫీజుల నియంత్రణ, తల్లిదండ్రుల ప్రయోజనాల పరిరక్షణ లక్ష్యంగా ఈ నిర్ణయం తీసుకున్నట్లు పంజాబ్‌ ప్రభుత్వం పేర్కొంది. అధిక ఫీజుల కారణంగా ఇబ్బందులు ఎదుర్కొంటున్న కుటుంబాలకు ఇది ఉపశమనం కలిగిస్తుందని తెలిపింది.

ఈ నిర్ణయం వల్ల రాష్ట్రంలోని 32 లక్షల మందికి పైగా విద్యార్థులు, వారి కుటుంబాలు ప్రయోజనం పొందుతాయని అంచనా వేస్తున్నారు. ప్రైవేటు విద్యాసంస్థల్లో ఆర్థిక పారదర్శకత పెరగడంతో పాటు విద్యార్థులకు నాణ్యమైన విద్య అందేలా చర్యలు తీసుకుంటామని ప్రభుత్వం వెల్లడించింది.