‘ఇరుముడి’లో రామ్‌చరణ్‌.. వైరల్‌ అవుతున్న వార్తలపై హీరో టీమ్‌ క్లారిటీ

ఇంటర్నెట్‌ డెస్క్‌: రవితేజ కథానాయకుడిగా శివ నిర్వాణ దర్శకత్వంలో తెరకెక్కుతోన్న చిత్రం ‘ఇరుముడి’. అయ్యప్ప దీక్ష నేపథ్యంలో సాగే ఈ సినిమాపై ప్రేక్షకుల్లో ఆసక్తి నెలకొంది. ఈ చిత్రంలో రామ్‌చరణ్‌ అతిథి పాత్రలో కనిపించనున్నారంటూ కొంతకాలంగా ప్రచారం జరుగుతోంది. తాజాగా ఈ వార్తలకు మరింత బలం చేకూర్చేలా సోషల్‌ మీడియాలో కొన్ని పోస్టులు వైరల్‌ అయ్యాయి.

‘ఇరుముడి’లోని ‘మల్లెపూల పల్లకి బంగారు పల్లకి’ పాటలో రామ్‌చరణ్‌ అయ్యప్ప మాలధారణలో కనిపిస్తారని ఆ పోస్టుల్లో పేర్కొన్నారు. దీంతో మెగా అభిమానుల్లోనూ ఆసక్తి పెరిగింది. అయితే ఈ ప్రచారంపై రామ్‌చరణ్‌ టీమ్‌ స్పందించింది. సోషల్‌ మీడియాలో వైరల్‌ అవుతున్న వార్తల్లో ఎలాంటి నిజం లేదని స్పష్టం చేసింది. అవాస్తవాలను ప్రచారం చేయొద్దని అభిమానులు, నెటిజన్లను కోరింది.

ఇటీవల ‘ఇరుముడి’ ప్రీ రిలీజ్‌ ఈవెంట్‌ను నిర్వహించారు. ఈ సందర్భంగా సినిమాలోని అయ్యప్ప పాట **‘మల్లెపూల పల్లకి’**ని విడుదల చేశారు. ఈ పాట గురించి సంగీత దర్శకుడు జీవీ ప్రకాశ్‌ కుమార్‌ మాట్లాడుతూ.. ఇందులో అదిరిపోయే సర్‌ప్రైజ్‌ ఉంటుందని చెప్పడంతో రామ్‌చరణ్‌ కనిపించనున్నారనే ప్రచారం మొదలైంది. అయితే తాజాగా హీరో టీమ్‌ ఇచ్చిన క్లారిటీతో ఆ వార్తలకు తెరపడింది.

అయ్యప్ప దీక్ష తీసుకున్న 41 రోజుల సమయంలో ఓ వ్యక్తి జీవితంలో చోటుచేసుకునే పరిణామాల చుట్టూ ఈ కథ సాగుతుందని దర్శకుడు శివ నిర్వాణ ఇప్పటికే వెల్లడించారు. సాధారణంగా వ్యసనాలకు అలవాటు పడిన ఓ వ్యక్తి అయ్యప్ప దీక్ష తీసుకుంటే.. 41 రోజుల పాటు మద్యానికి దూరంగా ఉండాల్సి వస్తుంది. అక్కడి నుంచే కథలో అసలైన సంఘర్షణ మొదలవుతుందని దర్శకుడు తెలిపారు.

ఈ సినిమాలో రవితేజకు జోడీగా ప్రియా భవానీ శంకర్‌ నటిస్తున్నారు. ఆధ్యాత్మికత, భావోద్వేగాలు, కుటుంబ అంశాలతో తెరకెక్కిన ఈ చిత్రం ఆగస్టు 21న ప్రేక్షకుల ముందుకు రానుంది.