విజిలెన్స్‌ నివేదికను అడ్డంపెట్టుకొని ఫిరాయింపులను ప్రోత్సహించారు: రేవంత్‌

తెలంగాణలో విద్యా రంగాన్ని బలోపేతం చేయడమే తమ ప్రభుత్వ ప్రధాన లక్ష్యమని సీఎం రేవంత్‌రెడ్డి స్పష్టం చేశారు. విద్యార్థులకు నాణ్యమైన విద్య, మెరుగైన మౌలిక వసతులు, ఉపాధి అవకాశాలు కల్పించేలా ప్రభుత్వం పలు సంస్కరణలు చేపడుతోందన్నారు. ఫీజు రీయింబర్స్‌మెంట్‌ పథకాన్ని కొనసాగిస్తామని, అయితే అక్రమాలకు పాల్పడే కళాశాలలకు ప్రభుత్వ నిధులు చెల్లించబోమని తేల్చిచెప్పారు.

గత ప్రభుత్వ హయాంలో ఫీజు రీయింబర్స్‌మెంట్‌ బకాయిలు పేరుకుపోయాయని రేవంత్‌రెడ్డి తెలిపారు. ప్రభుత్వం మారే సమయానికి రూ.5,435 కోట్ల బకాయిలు ఉన్నాయని, వాటిలో రూ.1,410 కోట్లను తమ ప్రభుత్వం చెల్లించిందన్నారు. తమ హయాంలోని బకాయిలను కూడా చెల్లిస్తున్నామని చెప్పారు. ఫీజు రీయింబర్స్‌మెంట్‌ కోసం ఏడాదికి సుమారు రూ.2,400 కోట్లు అవసరమవుతున్నాయని వెల్లడించారు.

కొన్ని ప్రైవేటు కళాశాలలు విద్యార్థుల నుంచి ఫీజులు వసూలు చేస్తూనే.. అదే విద్యార్థుల పేర్లతో ప్రభుత్వం నుంచి మరోసారి ఫీజు రీయింబర్స్‌మెంట్‌ పొందుతున్నట్లు తమ దృష్టికి వచ్చిందని సీఎం పేర్కొన్నారు. ఇలాంటి అక్రమాలకు పాల్పడే కళాశాలలపై చర్యలు తప్పవన్నారు.

ప్రభుత్వ పాఠశాలల్లో విద్యార్థుల సంఖ్య పెంచేందుకు తమ ప్రభుత్వం ప్రత్యేక చర్యలు చేపట్టిందని రేవంత్‌రెడ్డి తెలిపారు. గత రెండేళ్లలో ప్రభుత్వ పాఠశాలల్లో విద్యార్థుల నమోదు 87 వేలు పెరిగిందన్నారు. 10,600 ఉపాధ్యాయ పోస్టులను భర్తీ చేశామని, విద్యార్థి-ఉపాధ్యాయ నిష్పత్తిని మెరుగుపరిచామని చెప్పారు.

పేద కుటుంబాలు సైతం తమ పిల్లలను ప్రైవేటు పాఠశాలలకు ఎందుకు పంపుతున్నాయనే అంశంపై అధ్యయనం చేశామని సీఎం వివరించారు. నర్సరీ, ఎల్‌కేజీ స్థాయి నుంచే ఇంగ్లిష్‌ విద్యపై తల్లిదండ్రుల్లో ఆసక్తి పెరిగిందన్నారు. అందుకే ప్రభుత్వ పాఠశాలల్లోనూ పూర్వ ప్రాథమిక విద్యను అందుబాటులోకి తెస్తున్నామని తెలిపారు.

4,100కు పైగా పాఠశాలల్లో సుమారు 64 వేల మంది పిల్లలకు పూర్వ ప్రాథమిక విద్య అందిస్తున్నామని చెప్పారు. విద్యార్థుల పోషకాహారంపై కూడా ప్రభుత్వం దృష్టి సారించిందన్నారు. నర్సరీ నుంచి 12వ తరగతి వరకు విద్యార్థులకు బ్రేక్‌ఫాస్ట్‌, లంచ్‌ అందించే కార్యక్రమాలు చేపట్టామని, ఈ ఏడాది పేద పిల్లల పోషకాహారం కోసం రూ.927.39 కోట్లు ఖర్చు చేస్తున్నట్లు తెలిపారు.

పాలిటెక్నిక్‌ కళాశాలలను ప్రైవేటీకరించే ఆలోచన తమ ప్రభుత్వానికి లేదని రేవంత్‌రెడ్డి స్పష్టం చేశారు. యంగ్‌ ఇండియా స్కిల్స్‌ యూనివర్సిటీ పరిధిలోకి తీసుకురావడం ద్వారా విద్యార్థులకు ఆధునిక సాంకేతిక శిక్షణ, నిపుణుల పర్యవేక్షణ, మెరుగైన ఉద్యోగ అవకాశాలు కల్పించాలన్నదే ఉద్దేశమన్నారు.

పాలిటెక్నిక్‌ కళాశాలల సిబ్బందికి ఉద్యోగ భద్రత ఉంటుందని, విద్యార్థులపై అదనపు ఫీజుల భారం ఉండదని సీఎం హామీ ఇచ్చారు. జీవో 97పై ఏమైనా అపోహలు ఉంటే వాటిని పరిశీలిస్తామని, అవసరమైతే సవరణలు చేస్తామని వెల్లడించారు.

అడ్వాన్స్‌డ్‌ టెక్నాలజీ సెంటర్ల తరహాలో పాలిటెక్నిక్‌లలోనూ ఆధునిక నైపుణ్య శిక్షణ అందించేందుకు చర్యలు తీసుకుంటున్నామని తెలిపారు. టాటా సంస్థ అందిస్తున్న భారీ సహాయాన్ని సద్వినియోగం చేసుకుంటే రాష్ట్రంలోని విద్యార్థులకు నైపుణ్యాభివృద్ధి, ఉపాధి అవకాశాలు మరింత మెరుగుపడతాయని రేవంత్‌రెడ్డి పేర్కొన్నారు.