పిల్లల ఫొటోలు సోషల్‌ మీడియాలో పెడుతున్నారా? ఈ జాగ్రత్తలు తప్పనిసరి!

ఇంట్లో చిన్నారి చేసే ప్రతి అల్లరి, ప్రతి ముద్దు నవ్వు తల్లిదండ్రులకు ఓ మధుర జ్ఞాపకమే. ఆ జ్ఞాపకాలను ఫొటోలు, వీడియోల రూపంలో భద్రపరచుకోవడం సహజం. అయితే వాటిని వెంటనే సోషల్‌ మీడియాలో పోస్ట్‌ చేయడం మాత్రం అంత సురక్షితం కాదు. డిజిటల్‌ ప్రపంచంలో ఒకసారి ఆన్‌లైన్‌లోకి వెళ్లిన ఫొటోను పూర్తిగా మన నియంత్రణలోకి తీసుకురావడం దాదాపు అసాధ్యం.

లైక్‌లు, కామెంట్లు, షేర్ల కోసం పెట్టిన ఓ సాధారణ ఫొటోను ఇతరులు డౌన్‌లోడ్‌ చేసుకోవచ్చు. స్క్రీన్‌షాట్‌ తీసుకోవచ్చు. మార్ఫింగ్‌ చేయవచ్చు. కృత్రిమ మేధ (ఏఐ) అందుబాటులోకి వచ్చిన నేపథ్యంలో సాధారణ చిత్రాలను కూడా మార్చి దుర్వినియోగం చేసే అవకాశాలు పెరిగాయి. అందుకే పిల్లల ఫొటోలను పంచుకునే విషయంలో తల్లిదండ్రులు మరింత అప్రమత్తంగా ఉండాలి.

ఫొటోను ఎందుకు పోస్ట్‌ చేస్తున్నాం? నిజంగా బిడ్డకు సంబంధించిన ముఖ్యమైన సందర్భాన్ని పంచుకోవాలనుకుంటున్నామా? లేక ఇతరుల ప్రశంసలు, లైక్‌లు, కామెంట్ల కోసమేనా? కారణం ఏదైనా.. ఫొటోను బహిరంగంగా పెట్టడం వల్ల భవిష్యత్తులో బిడ్డకు ఇబ్బంది కలిగే అవకాశం ఉందా అనేది ఆలోచించాలి.

పిల్లలు చిన్నవారిగా ఉన్నప్పుడు వారి తరఫున తల్లిదండ్రులే నిర్ణయాలు తీసుకుంటారు. కానీ వారు పెద్దయ్యాక తమ చిన్ననాటి ఫొటోలు, వీడియోలు అందరికీ కనిపించడం ఇష్టపడకపోవచ్చు. అందుకే వారి వ్యక్తిగత గోప్యతను కూడా తల్లిదండ్రులు గౌరవించాలి.

ఓ ఫొటోలో కనిపించేది కేవలం పిల్లల ముఖం మాత్రమే కాదు. దాని వెనుక ఎన్నో వివరాలు ఉండొచ్చు. స్కూల్‌ పేరు, యూనిఫాం, ఐడీ కార్డు, ఇంటి నంబర్‌, వీధి పేరు, వాహనం నంబర్‌, పిల్లలు తరచూ వెళ్లే ప్రదేశాలు వంటి వివరాలు ఫొటో ద్వారా బయటపడే అవకాశం ఉంది.

అందువల్ల ఫొటోను పోస్ట్‌ చేసే ముందు బ్యాక్‌గ్రౌండ్‌ను కూడా ఒకసారి పరిశీలించాలి. అవసరమైతే వ్యక్తిగత వివరాలు కనిపించకుండా ఫొటోను క్రాప్‌ చేయడం మంచిది.

ప్రతి ఫొటోను పబ్లిక్‌గా పోస్ట్‌ చేయాల్సిన అవసరం లేదు. కుటుంబ సభ్యులు, అత్యంత సన్నిహితులు మాత్రమే ఉన్న ప్రైవేట్‌ గ్రూపుల్లో పంచుకోవడం లేదా వ్యక్తిగతంగా పంపడం కొంతవరకు మెరుగైన ప్రత్యామ్నాయం.

అయితే ప్రైవేట్‌ గ్రూప్‌ అయినా ఫొటో పూర్తిగా సురక్షితమని భావించకూడదు. ఎవరైనా దాన్ని డౌన్‌లోడ్‌ చేసి ఇతరులకు పంపే అవకాశం ఉంటుంది. కాబట్టి ఎవరితో పంచుకుంటున్నామనే విషయంలోనూ జాగ్రత్త అవసరం.

పిల్లలు అర్థం చేసుకునే వయసుకు వచ్చిన తర్వాత వారి ఫొటోను సోషల్‌ మీడియాలో పెట్టే ముందు అనుమతి అడగడం మంచి అలవాటు. ‘ఈ ఫొటోను నేను సోషల్‌ మీడియాలో పెట్టొచ్చా?’ అని అడగడం ద్వారా వారి వ్యక్తిగత హద్దులు, నిర్ణయాధికారాన్ని గౌరవించినట్లవుతుంది.

ఇది కేవలం ఫొటోకు సంబంధించిన విషయం కాదు. చిన్నప్పటి నుంచే డిజిటల్‌ ప్రపంచంలో ఏది పంచుకోవాలి? ఏది వ్యక్తిగతంగా ఉంచుకోవాలి? అనే అవగాహన కూడా పిల్లలకు కలుగుతుంది.

పిల్లలు ఏడుస్తున్నప్పుడు, అనారోగ్యంగా ఉన్నప్పుడు, ఇబ్బందికరమైన పరిస్థితుల్లో ఉన్నప్పుడు లేదా భవిష్యత్తులో వారికి ఇబ్బంది కలిగించే సందర్భాల్లో తీసిన ఫొటోలను సోషల్‌ మీడియాలో పోస్ట్‌ చేయకపోవడం మంచిది.

తల్లిదండ్రులకు అది సరదాగా అనిపించినా.. పిల్లలు పెరిగిన తర్వాత అదే ఫొటోను చూసి ఇబ్బందిగా భావించవచ్చు. తోటి పిల్లలు దాన్ని చూసి ఎగతాళి చేసే అవకాశం కూడా ఉంటుంది.

ఫొటోతో పాటు రాసే క్యాప్షన్‌లోనూ వ్యక్తిగత వివరాలను వెల్లడించకూడదు. పిల్లల పూర్తి పేరు, స్కూల్‌ వివరాలు, రోజువారీ ప్రయాణ మార్గం, ఇంటి ప్రాంతం, వారు ఒంటరిగా ఉండే సమయాలు వంటి సమాచారాన్ని పబ్లిక్‌గా వెల్లడించడం మంచిది కాదు.

అలాగే ‘ప్రతిరోజూ ఈ సమయానికి ఇక్కడే ఉంటాం’ వంటి వివరాలు తెలియకుండానే పిల్లల భద్రతకు ముప్పుగా మారవచ్చు.

కృత్రిమ మేధ ఆధారిత సాధనాలు వేగంగా అభివృద్ధి చెందుతున్న కొద్దీ ఫొటోలను మార్చడం, కొత్త చిత్రాలను సృష్టించడం సులభమవుతోంది. ఆన్‌లైన్‌లో బహిరంగంగా అందుబాటులో ఉన్న చిత్రాలు దుర్వినియోగానికి గురయ్యే అవకాశం ఉన్నందున పిల్లల ఫొటోల విషయంలో అదనపు జాగ్రత్త అవసరం.

అందుకే ‘ఫొటో అందంగా ఉంది కాబట్టి పోస్ట్‌ చేద్దాం’ అనే ఆలోచన కంటే ‘ఈ ఫొటో బహిరంగంగా ఉంటే నా బిడ్డకు భవిష్యత్తులో ఏమైనా ఇబ్బంది కలుగుతుందా?’ అనే ప్రశ్నకు ప్రాధాన్యం ఇవ్వాలి

పిల్లల ప్రతి మధుర జ్ఞాపకాన్ని ప్రపంచంతో పంచుకోవాల్సిన అవసరం లేదు. కొన్ని జ్ఞాపకాలు కుటుంబం మధ్యే ఉంటే మరింత విలువైనవిగా ఉంటాయి. సోషల్‌ మీడియా మనల్ని ఇతరులతో అనుసంధానించే మంచి వేదికే అయినా.. పిల్లల భద్రత, గోప్యత, గౌరవం కంటే లైక్‌లు, కామెంట్లు ఎప్పటికీ ముఖ్యమైనవి కావు.