చమురు ధరలపైనే మార్కెట్‌ చూపు

ముడి చమురు ధరల దిశపై స్పష్టత వచ్చే వరకు దేశీయ స్టాక్‌ మార్కెట్లు పరిమిత శ్రేణిలోనే కదలాడే అవకాశం ఉందని విశ్లేషకులు అంచనా వేస్తున్నారు. పశ్చిమాసియాలో పరిణామాలు, అంతర్జాతీయంగా చమురు సరఫరాపై నెలకొన్న అనిశ్చితి మార్కెట్‌ సెంటిమెంటుపై ప్రభావం చూపుతున్నాయి. ముడిచమురు బ్యారెల్‌ ధర 90 డాలర్లకు చేరడం దేశీయంగా ద్రవ్యోల్బణం, కంపెనీల వ్యయాలపై ఆందోళనలను పెంచుతోంది.

ఈ వారం మార్కెట్‌కు దేశీయ ఆర్థిక గణాంకాలు కూడా కీలకం కానున్నాయి. ప్రస్తుత ఆర్థిక సంవత్సరం తొలి త్రైమాసిక వృద్ధిరేటు గణాంకాలు ఈ నెల 31న విడుదల కానున్నాయి. తయారీ, సేవల రంగాల పీఎంఐ, జీఎస్‌టీ వసూళ్ల గణాంకాలపైనా మదుపర్లు దృష్టి పెట్టనున్నారు. అమెరికా ఫెడరల్‌ రిజర్వ్‌ ఛైర్మన్‌ కెవిన్‌ వార్ష్‌ కీలక వడ్డీ రేట్ల పెంపు దిశగా సంకేతాలు ఇవ్వడం కూడా మన మార్కెట్లపై ప్రభావం చూపే అవకాశం ఉంది.

ఇదిలా ఉండగా, ఆగస్టులో ఇప్పటివరకు విదేశీ పోర్ట్‌ఫోలియో మదుపర్లు భారత ఈక్విటీ మార్కెట్లలో రూ.30,919 కోట్ల పెట్టుబడులు పెట్టారు. విదేశీ నిధుల ప్రవాహం మార్కెట్‌కు కొంత మద్దతు ఇస్తున్నప్పటికీ, అంతర్జాతీయ పరిణామాల కారణంగా భారీగా ముందుకు వెళ్లేందుకు సూచీలు ఇబ్బంది పడవచ్చని నిపుణులు భావిస్తున్నారు.

సాంకేతికంగా చూస్తే నిఫ్టీ-50కి 24,050 వద్ద బలమైన మద్దతు కనిపిస్తోంది. ఈ స్థాయి దిగువకు వెళితే మరింత దిద్దుబాటు చోటుచేసుకునే అవకాశం ఉంది. పైవైపు 24,200–24,350 వద్ద నిరోధం ఎదురుకావచ్చని సాంకేతిక విశ్లేషకులు చెబుతున్నారు.

ఇటీవల ఉక్కు ధరలు పెరగడంతో ఫెర్రస్‌ లోహ కంపెనీల షేర్లకు కొంత ఊతం లభించవచ్చు. అయితే అల్యూమినియం ధరలు పుంజుకునే వరకు ఈ రంగంలోని కొన్ని కంపెనీల షేర్లపై ఒత్తిడి కొనసాగొచ్చు. నిఫ్టీ మెటల్‌ సూచీకి తొలుత 13,220, ఆ తర్వాత 12,700 స్థాయిల వద్ద మద్దతు లభించే అవకాశం ఉంది.

ముడిపదార్థాల ధరలు అధికంగా ఉండటం వల్ల కంపెనీల మార్జిన్లపై ఒత్తిడి కొనసాగవచ్చు. కొన్ని షేర్ల అధిక విలువలు కూడా లాభాల స్వీకరణకు కారణం కావడంతో ఈ రంగం పరిమిత శ్రేణిలోనే కదలాడే అవకాశం ఉంది. ఆటో సూచీ 20 రోజుల చలన సగటు కంటే దిగువన కొనసాగుతున్న నేపథ్యంలో స్థిరీకరణ ధోరణి కనిపించవచ్చు. ఆగస్టు వాహన విక్రయాల గణాంకాల నేపథ్యంలో టీఎమ్‌పీవీ, టాటా మోటార్స్, టీవీఎస్, ఎస్కార్ట్స్‌ షేర్లు మెరుగ్గా రాణించే అవకాశం ఉందని నిపుణులు భావిస్తున్నారు.

అమెరికా ఫెడ్‌ ఛైర్‌ వ్యాఖ్యలు ఐటీ షేర్లపై ప్రభావం చూపవచ్చు. కృత్రిమ మేధ కారణంగా ఆదాయాల్లో ఒత్తిడి వస్తుందన్న ఆందోళనలు ఉన్నప్పటికీ, ఏఐ పరిణామాల వల్ల కొన్ని దేశీయ ఐటీ కంపెనీలకు కొత్త అవకాశాలు కూడా లభించవచ్చని విశ్లేషకులు చెబుతున్నారు.

బలమైన ప్రాథమిక అంశాలు, రక్షణాత్మక కొనుగోళ్ల మద్దతు ఉన్నప్పటికీ లాభాల స్వీకరణ, బలహీన మార్కెట్‌ పరిస్థితులు ఫార్మా షేర్లను పరిమితం చేయవచ్చు. ఫార్మా సూచీకి 23,800 వద్ద మద్దతు, 24,400 వద్ద నిరోధం ఉండొచ్చని అంచనా.

టెలికాం రంగంలో మొత్తం మీద మిశ్రమ ధోరణి కనిపించవచ్చు. ఎంపిక చేసిన షేర్లలో కొనుగోళ్లు కొనసాగే అవకాశం ఉంది. బీఎస్‌ఈ టెలికాం సూచీకి 3,640 వద్ద మద్దతు, 3,790 వద్ద నిరోధం ఉండొచ్చు. ఈ స్థాయులను దాటితే 3,550, 3,880 స్థాయిలు తదుపరి మద్దతు, నిరోధాలుగా పనిచేయవచ్చు.

అధిక వ్యయాల కారణంగా కంపెనీల మార్జిన్లపై ఒత్తిడి కొనసాగే అవకాశం ఉంది. దీంతో సిమెంటు షేర్లు పరిమిత శ్రేణిలో ట్రేడయ్యే అవకాశముంది. అయితే సమీప కాలంలో సిమెంటుకు గిరాకీ స్థిరంగా ఉంటుందన్న అంచనాలు నష్టాలను కొంతమేర పరిమితం చేయవచ్చు.

ముడి చమురు ధరల పెరుగుదల, ద్రవ్యోల్బణ ఒత్తిళ్లు ఎఫ్‌ఎంసీజీ కంపెనీల విక్రయాల వృద్ధి, లాభదాయకతపై ప్రభావం చూపవచ్చు. బలహీన వర్షాలు గ్రామీణ ప్రాంతాల్లో గిరాకీని దెబ్బతీసే అవకాశం ఉంది. నిల్వల వ్యయాలు పెరగడం, ఇటీవల ఉత్పత్తుల ధరలు పెరగడంతో డిమాండ్‌ తగ్గడం ఈ రంగంపై ప్రతికూల ప్రభావం చూపవచ్చు.

ముడి చమురు ధరలు పెరుగుతున్న నేపథ్యంలో నిఫ్టీ చమురు-గ్యాస్‌ సూచీ పరిమిత శ్రేణిలోనే కదలాడవచ్చు. అంతర్జాతీయ చమురు ధరల కదలికలు ఈ రంగంలోని షేర్లకు ప్రధాన దిశానిర్దేశకంగా మారనున్నాయి.

ప్రభావం చూపే కీలక వార్తలు తక్కువగా ఉండటంతో నిఫ్టీ బ్యాంక్‌ సూచీ చాలా స్వల్ప శ్రేణిలో కదలాడే అవకాశం ఉంది. మొత్తం మీద 57,000–58,000 స్థాయిల మధ్య కదలికలు ఉండొచ్చని అంచనా. పోటీ బ్యాంకులతో పోలిస్తే కోటక్‌ మహీంద్రా బ్యాంక్‌ షేరు మెరుగ్గా రాణించే అవకాశం ఉందని విశ్లేషకులు భావిస్తున్నారు.