సుభాష్‌ చంద్ర దివాలా ప్రణాళికపై రుణదాతల అభ్యంతరాలు

ఎస్సెల్‌ గ్రూప్‌ వ్యవస్థాపకుడు సుభాష్‌ చంద్ర వ్యక్తిగత దివాలా పరిష్కార ప్రణాళికపై వివాదం మరింత ముదిరింది. దాదాపు రూ.22,006.57 కోట్ల మేర క్లెయిమ్‌లు ఉన్నప్పటికీ.. కేవలం రూ.6.50 కోట్ల చెల్లింపుతో పరిష్కరించేలా రూపొందించిన ప్రణాళికకు రుణదాతల కమిటీ (సీఓసీ) ఆమోదం లభించింది. అయితే ఈ ఆమోదంలో సుభాష్‌ చంద్ర కుటుంబంతో సంబంధం ఉన్న సంస్థల ఓట్లే కీలకంగా వ్యవహరించాయని పలువురు రుణదాతలు ఆరోపిస్తున్నారు.

ఈ ప్రణాళికకు సీఓసీలో 80.814 శాతం ఓట్ల మద్దతు లభించింది. ఇందులో సుభాష్‌ చంద్ర కుటుంబంతో సంబంధం ఉన్నట్లు ఆరోపణలు ఎదుర్కొంటున్న ఐదు ఆర్థిక సంస్థలకే 61.78 శాతం ఓటింగ్‌ వాటా ఉందని బ్యాంకర్లు పేర్కొంటున్నారు. వీణా ఇన్వెస్ట్‌మెంట్స్‌ ప్రైవేట్‌ లిమిటెడ్‌, డైరెక్ట్‌ మీడియా డిస్ట్రిబ్యూషన్‌ వెంచర్స్‌ ప్రైవేట్‌ లిమిటెడ్‌, వరల్డ్‌ క్రెస్ట్‌ అడ్వైజర్స్‌ ఎల్‌ఎల్‌పీ, లెమనేడ్‌ క్యాపిటల్‌ అడ్వైజర్స్‌ ఎల్‌ఎల్‌పీ, కార్ప్‌కాల్‌ క్యాపిటల్‌ అడ్వైజర్స్‌ ఎల్‌ఎల్‌పీ ఈ జాబితాలో ఉన్నాయని రుణదాతలు చెబుతున్నారు.

ఈ సంస్థలు దివాలా, దివాలా పరిష్కార కోడ్‌ (ఐబీసీ) నిబంధనల ప్రకారం ‘అసోసియేట్‌’ లేదా ‘రిలేటెడ్‌ పార్టీ’ పరిధిలోకి వస్తాయని బ్యాంకర్లు వాదిస్తున్నారు. అలాంటి సంస్థలకు సీఓసీలో ఓటు హక్కు కల్పించడం సరికాదని వారు అభ్యంతరం వ్యక్తం చేస్తున్నారు. ఈ ఓట్లను పరిగణనలోకి తీసుకోకుండా ఉంటే దివాలా పరిష్కార ప్రణాళికకు అవసరమైన మెజారిటీ వచ్చేదా? అన్నది ప్రధాన ప్రశ్నగా మారింది.

ఈ వ్యవహారంపై ఎన్‌సీఎల్‌టీ డివిజన్‌ బెంచ్‌లోనూ భిన్నాభిప్రాయాలు వ్యక్తమయ్యాయి. జ్యుడీషియల్‌ సభ్యుడు అశోక్‌ కుమార్‌ భరద్వాజ్, సాంకేతిక సభ్యురాలు రీనా సిన్హా పురి మధ్య స్ప్లిట్‌ తీర్పు వచ్చింది. రిజొల్యూషన్‌ ప్రొఫెషనల్‌ (ఆర్‌పీ) ఐబీసీ సెక్షన్‌ 106(4)తో పాటు పలు నిబంధనలను ఉల్లంఘించారని, ప్రక్రియలో తీవ్రమైన లోపాలు ఉన్నాయని సిన్హా పురి అభిప్రాయపడ్డారు.

దీంతో ఈ అంశాన్ని మూడో సభ్యుడైన జ్యుడీషియల్‌ సభ్యుడు నీలేష్‌ శర్మకు పంపించారు. ఆయన రుణదాతల అభ్యంతరాలను తిరస్కరిస్తూ దివాలా పరిష్కార ప్రణాళికకు అనుకూలంగా తీర్పు ఇచ్చారు. రుణగ్రహీతకు సంబంధిత సంస్థల్లో 51 శాతం లేదా అంతకంటే ఎక్కువ వాటా ఉన్నప్పుడే ఆ సంస్థను ‘అసోసియేట్‌’గా పరిగణించే అవకాశం ఉంటుందని ఆయన పేర్కొన్నట్లు సమాచారం.

ఎన్‌సీఎల్‌టీ తీర్పును సవాల్‌ చేస్తూ ఎన్‌సీఎల్‌ఏటీని ఆశ్రయించనున్నట్లు హెచ్‌డీఎఫ్‌సీ బ్యాంక్, కెనరా బ్యాంక్‌ ప్రకటించాయి. కెనరా బ్యాంక్, యూనియన్‌ బ్యాంక్, ఎల్‌ఐసీ హౌసింగ్‌ ఫైనాన్స్‌ సైతం రూ.6.50 కోట్ల చెల్లింపు ప్రణాళికకు వ్యతిరేకంగా ఓటు వేశాయి.

అదే సమయంలో క్లెయిమ్‌ల కేటాయింపు, పరిష్కార ప్రణాళిక సమగ్రతపై ఇండస్‌ఇండ్‌ బ్యాంక్, ఆర్‌బీఎల్‌ బ్యాంక్, ఐడీబీఐ ట్రస్ట్‌షిప్‌ వంటి రుణదాతలు కూడా ప్రశ్నలు లేవనెత్తారు. ఎడెల్‌వీజ్‌, ఫ్రాంక్లిన్‌ టెంపుల్టన్‌ ఫండ్స్‌ తరఫున ఐడీబీఐ ట్రస్ట్‌షిప్‌ ఈ అంశాలపై అభ్యంతరాలు వ్యక్తం చేసినట్లు తెలుస్తోంది.

మరోవైపు సుభాష్‌ చంద్ర మాత్రం రుణదాతల ఆరోపణలను తోసిపుచ్చుతున్నారు. తనపై ఉన్న అసలు క్లెయిమ్‌ సుమారు రూ.3,992 కోట్లు మాత్రమేనని ఆయన చెబుతున్నారు. తాను వ్యక్తిగత హామీదారుగా మాత్రమే ఉన్నానని, అసలు రుణగ్రహీతను కాదని ఆయన స్పష్టం చేస్తున్నారు. తనపై రూ.22,000 కోట్లకు పైగా క్లెయిమ్‌లు ఉన్నాయన్న వాదనను కూడా ఆయన ఖండిస్తున్నారు.

దీంతో ఒకవైపు కుటుంబ సంబంధిత సంస్థలకు ఓటు హక్కు కల్పించడంపై వివాదం, మరోవైపు అసలు బకాయిల మొత్తం ఎంత అన్న అంశం చర్చనీయాంశంగా మారాయి. ఎన్‌సీఎల్‌ఏటీలో బ్యాంకర్లు దాఖలు చేయనున్న అప్పీల్‌తో ఈ వ్యవహారంలో తదుపరి పరిణామాలపై ఆసక్తి నెలకొంది.