పాకిస్థాన్ వేదికగా అగ్రరాజ్యాల పవర్ పాలిటిక్స్: అణు మథనంలో తేలని తేడాలు..ట్రంప్ నెక్స్ట్ స్టెప్ ఏంటి?

అగ్రరాజ్యం అమెరికా, ఇరాన్ మధ్య దశాబ్దాల తర్వాత జరిగిన అత్యున్నత స్థాయి శాంతి చర్చలు ఆసక్తికర మలుపు తిరిగాయి. పాకిస్థాన్ రాజధాని ఇస్లామాబాద్ వేదికగా జరిగిన ఈ భేటీ దాదాపు సఫలమైందనుకున్న తరుణంలో, “అణు” పట్టుదల కారణంగా చర్చలు అర్ధాంతరంగా ఆగిపోయాయి.

విఫలానికి అసలు కారణం: 20 ఏళ్లు Vs 5 ఏళ్లు

అమెరికా-ఇరాన్ మధ్య ప్రధాన విభేదం యురేనియం శుద్ధి కాలపరిమితిపైనే వచ్చి ఆగిపోయింది.

అమెరికా డిమాండ్: ఇరాన్ తన అణు కార్యకలాపాలను, యురేనియం శుద్ధిని కనీసం 20 ఏళ్ల పాటు నిలిపివేయాలని అమెరికా ప్రతిపాదించింది. వాస్తవానికి ట్రంప్ యంత్రాంగం దీన్ని శాశ్వతంగా రద్దు చేయాలని కోరినప్పటికీ, చర్చల కోసం 20 ఏళ్లకు తగ్గించింది.

ఇరాన్ ససేమిరా: ఇరాన్ మాత్రం తాము కేవలం 5 ఏళ్లు మాత్రమే యురేనియం శుద్ధిని ఆపగలమని స్పష్టం చేసింది. ఈ 15 ఏళ్ల వ్యత్యాసం కారణంగానే కుదిరినట్టే కుదిరిన ఒప్పందం చివరి నిమిషంలో వీగిపోయింది

సమావేశంలో గూఢచారి జాగ్రత్తలు: ‘నో ఫోన్’ రూల్

1979 ఇస్లామిక్ విప్లవం తర్వాత ఇరు దేశాల మధ్య జరిగిన అత్యంత కీలక సమావేశం కావడంతో కట్టుదిట్టమైన భద్రత మధ్య చర్చలు జరిగాయి.

డిజిటల్ కట్టుబాట్లు: అమెరికా ఉపాధ్యక్షుడు జేడీ వాన్స్, ఇరాన్ స్పీకర్ ఘలీబఫ్ పాల్గొన్న ఈ గదిలోకి ఫోన్లను అనుమతించలేదు. మధ్యమధ్యలో విరామం తీసుకున్నప్పుడు మాత్రమే వారు బయటకు వచ్చి తమ సందేశాలను చెక్ చేసుకునేవారట.

20 గంటల మథనం: ఇస్లామాబాద్‌లోని హోటల్‌లో దాదాపు 20 గంటల పాటు సుదీర్ఘంగా సాగిన ఈ చర్చల్లో 80 శాతం అంశాలపై ఏకాభిప్రాయం కుదిరినా, అణు అంశం దగ్గర గది బయట వినపడేలా వాదోపవాదాలు జరిగాయి.

ముగియని ఆశ.. ఇరాన్ కోర్టులోనే బాల్!

ఈ చర్చలు విఫలమైనప్పటికీ, ఆశలు పూర్తిగా సన్నగిల్లలేదు.

జేడీ వాన్స్ స్పందన: భవిష్యత్తులో చర్చలు కొనసాగించాలా లేదా అనేది ఇరాన్ చేతుల్లోనే ఉందని అమెరికా ఉపాధ్యక్షుడు స్పష్టం చేశారు.

ట్రంప్ సంకేతాలు: డీల్ కుదుర్చుకోవడానికి ఇరాన్ సుముఖంగానే ఉందని, రెండో దశ చర్చల కోసం సన్నాహాలు జరుగుతున్నాయని అధ్యక్షుడు ట్రంప్ సూచనప్రాయంగా వెల్లడించారు.