ఒకే తరహా హెచ్చరిక వద్దు.. ఆహార పదార్థాలపై భిన్నమైన లేబుళ్లు ఉండాలి: సుప్రీంకోర్టు

ప్యాకేజ్డ్‌ ఆహార పదార్థాలపై ఒకే తరహా హెచ్చరికలను ముద్రించడం కంటే.. వాటిలో ఉండే ఉప్పు, చక్కెర, కొవ్వు పరిమాణం, ఆరోగ్యంపై వాటి ప్రభావం ఆధారంగా భిన్నమైన హెచ్చరికలు ఉండాలని సుప్రీంకోర్టు అభిప్రాయపడింది. అధికంగా ప్రాసెస్‌ చేసిన ఆహారం, సాధారణ ప్రాసెస్డ్‌ ఫుడ్‌, పరిమిత స్థాయిలో ఉండే ఉత్పత్తులు, మెరుగైన పోషక విలువలున్న ఆహార పదార్థాల మధ్య స్పష్టమైన తేడా వినియోగదారులకు తెలిసేలా లేబుళ్లను రూపొందించాలని సూచించింది.

దేశంలో ప్రాంతీయ భాషలు, అక్షరాస్యత, ప్రజల అవగాహన స్థాయిలు భిన్నంగా ఉన్న నేపథ్యంలో.. ప్యాకెట్ల ముందు భాగంలో ముద్రించే పోషక సమాచారం కేవలం అక్షరాల రూపంలో కాకుండా చిత్రాల ద్వారా కూడా సులభంగా అర్థమయ్యేలా ఉండాలని జస్టిస్‌ జె.బి. పార్దీవాలా, జస్టిస్‌ కె. వినోద్‌చంద్రన్‌ ధర్మాసనం పేర్కొంది. ఆన్‌లైన్‌లో ఆహార ఉత్పత్తులను కొనుగోలు చేసే వినియోగదారులకు కూడా ఈ హెచ్చరికలు స్పష్టంగా కనిపించేలా చూడాలని తెలిపింది.

తొలి దశలో ఉప్పు, చక్కెర, కొవ్వు పదార్థాల్లో ఏవైనా రెండింటి పరిమాణం అధికంగా ఉన్న ప్యాకేజ్డ్‌ ఆహార ఉత్పత్తులు, తీయటి పానీయాలపై పోషక విలువల సమాచారాన్ని ముద్రించనున్నట్లు ఎఫ్‌ఎస్‌ఎస్‌ఏఐ తెలిపింది. రెండో దశలో ఈ మూడు పోషకాలలో ఏ ఒక్కటి అధికంగా ఉన్న ఉత్పత్తులనూ హెచ్చరికల పరిధిలోకి తీసుకురావాలని ప్రతిపాదించింది. దీనిని అమలు చేసేందుకు ఎంత సమయం పడుతుందో స్పష్టత ఇవ్వాలని ధర్మాసనం కోరింది.

మరోవైపు.. చిన్నారులు అధికంగా ప్రాసెస్‌ చేసిన ఆహారం, ఎక్కువ చక్కెర, ఉప్పు, కొవ్వు కలిగిన పదార్థాలకు అలవాటు పడుతున్నారనే ఆందోళనను సుప్రీంకోర్టు వ్యక్తం చేసింది. పాఠశాలల్లో విద్యార్థులకు ఆరోగ్యకరమైన ఆహారపు అలవాట్లపై అవగాహన కల్పించేందుకు చేపట్టే పాఠ్యప్రణాళికలు, వర్క్‌షాప్‌లు, ఇతర కార్యక్రమాల వివరాలను సమర్పించాలని కేంద్ర ప్రభుత్వాన్ని ఆదేశించింది. ఎఫ్‌ఎస్‌ఎస్‌ఏఐ తన అఫిడవిట్‌లోని అంశాలను పునఃపరిశీలించి పది రోజుల్లోగా మరింత స్పష్టత ఇవ్వాలని సూచించింది. తదుపరి విచారణను సెప్టెంబర్‌ 28కి వాయిదా వేసింది.