ఎమ్మెల్యే రమణారెడ్డి క్యాంప్ ఆఫీస్ వద్ద ఉద్రిక్తత

కామారెడ్డిలో జరిగిన ఈ ఘటన రాజకీయ వర్గాల్లో తీవ్ర చర్చనీయాంశంగా మారింది. అరోరా భూముల వ్యవహారం నేపథ్యంలో రెండు పార్టీల మధ్య మాటల యుద్ధం గత కొద్ది రోజులుగా కొనసాగుతున్నట్లు సమాచారం. ఈ వివాదం ఎమ్మెల్యే రమణారెడ్డి క్యాంప్ ఆఫీస్ వరకు చేరుకోవడంతో ఉద్రిక్తత మరింత పెరిగింది.

కాంగ్రెస్ నేత మహేందర్ రెడ్డి ఎమ్మెల్యేను కలిసేందుకు ఇంట్లోకి వెళ్లేందుకు ప్రయత్నించగా బీజేపీ కార్యకర్తలు అడ్డుకోవడంతో వాగ్వాదం ప్రారంభమైంది. కొద్ది సేపట్లోనే అది తోపులాటకు దారి తీసింది. ఇరు వర్గాల కార్యకర్తలు ఒకరిపై ఒకరు ఆరోపణలు చేసుకుంటూ దాడులకు దిగినట్లు తెలుస్తోంది. ఈ క్రమంలో మహేందర్ రెడ్డిపై దాడి జరిగిందని కాంగ్రెస్ వర్గాలు ఆరోపిస్తుండగా, తమపై ప్రేరేపణ జరిగిందని బీజేపీ నేతలు చెబుతున్నారు.

ఘర్షణ సమయంలో మహేందర్ రెడ్డి వాహనానికి నిప్పుపెట్టిన ఘటన అక్కడ కలకలం రేపింది. మంటలు చెలరేగడంతో స్థానికులు భయాందోళనకు గురయ్యారు. వెంటనే సంఘటనా స్థలానికి చేరుకున్న పోలీసులు పరిస్థితిని అదుపులోకి తీసుకువచ్చేందుకు ప్రయత్నించారు. అయితే తోపులాటలో కొంతమంది పోలీసులకు స్వల్ప గాయాలు అయినట్లు సమాచారం.ప్రస్తుతం ఆ ప్రాంతంలో పోలీసులు భారీగా మోహరించి పరిస్థితిని నియంత్రిస్తున్నారు. ఉద్రిక్తతలు మళ్లీ చెలరేగకుండా నిరోధక చర్యలు చేపట్టారు. ఘటనపై కేసులు నమోదు చేసి దర్యాప్తు ప్రారంభించినట్లు తెలుస్తోంది. రాజకీయంగా ఈ సంఘటనకు మరిన్ని పరిణామాలు చోటుచేసుకునే అవకాశం ఉందని స్థానిక వర్గాలు భావిస్తున్నాయి.