పీఎన్‌జీ ఉన్నచోట ఎల్‌పీజీ నిలిపివేతకు కేంద్రం నిర్ణయం

దేశంలో ఎల్‌పీజీ కొరత సమస్యను ఎదుర్కొనేందుకు మరియు గ్యాస్ పంపిణీ వ్యవస్థను మరింత సమర్థవంతంగా మార్చేందుకు కేంద్ర ప్రభుత్వం కీలక నిర్ణయం తీసుకుంది. పైప్డ్ నేచురల్ గ్యాస్ (PNG) అందుబాటులో ఉన్న ప్రాంతాల్లో గృహ వినియోగదారులు తప్పనిసరిగా పీఎన్‌జీకి మారాలని సూచించింది. ఇందుకోసం మూడు నెలల గడువు ఇచ్చి, ఆ తర్వాత ఎల్‌పీజీ సిలిండర్ల సరఫరాను నిలిపివేయనున్నట్లు స్పష్టం చేసింది.

పీఎన్‌జీ కనెక్షన్ ఇవ్వడంలో సాంకేతిక సమస్యలు ఉన్న ఇళ్లకు మాత్రం సంబంధిత కంపెనీ నుంచి అనుమతి (NOC) పొందితే ఎల్‌పీజీ కొనసాగించే అవకాశం ఉంటుంది. పట్టణ ప్రాంతాల్లో ఇప్పటికే పీఎన్‌జీ అందుబాటులో ఉండటంతో వినియోగదారులు సులభంగా మారే అవకాశముందని ప్రభుత్వం భావిస్తోంది.

పీఎన్‌జీకి మారడం వల్ల సిలిండర్ బుకింగ్ అవసరం లేకుండా నిరంతర గ్యాస్ సరఫరా లభిస్తుంది. దీనికి ప్రోత్సాహకాలు ఇవ్వడానికి రాష్ట్ర ప్రభుత్వాలు కూడా సిద్ధమవుతున్నాయి. పైప్‌లైన్ నిర్మాణానికి అనుమతులు త్వరగా ఇవ్వాలని కేంద్రం ఆదేశాలు జారీ చేసింది.ఇక ఎల్‌పీజీ సిలిండర్ బుకింగ్ గడువు విషయంపై వచ్చిన వార్తలను కేంద్రం ఖండించింది. ప్రస్తుతం ఉన్న నిబంధనల ప్రకారం పట్టణాల్లో 25 రోజులు, గ్రామీణ ప్రాంతాల్లో 45 రోజుల గడువు కొనసాగుతుందని తెలిపింది.

అదేవిధంగా, గ్యాస్ కొరత పేరుతో హోటళ్లు, రెస్టారెంట్లు అదనపు ఛార్జీలు వసూలు చేస్తే అది శిక్షార్హమని కేంద్ర వినియోగదారుల రక్షణ సంస్థ హెచ్చరించింది. మెనూలో పేర్కొన్న ధరలకు పన్నులు మాత్రమే వర్తిస్తాయని, అదనపు ‘గ్యాస్ ఛార్జీలు’ వసూలు చేయడం నేరమని స్పష్టం చేసింది.