హోంగార్డు బయ్యన్న ఆత్మహత్య..అధికారుల వేధింపులే కారణమా?

నాగర్‌కర్నూల్ జిల్లా కోడేరు పోలీస్ స్టేషన్‌లో హోంగార్డుగా పనిచేస్తున్న బయ్యన్నకు గత కొన్ని రోజులుగా విశ్రాంతి లేకుండా వరుస విధులు కేటాయించారు. మూడు రోజుల పాటు శిర్సనగండ్ల సీతారామచంద్ర స్వామి ఉత్సవాల బందోబస్తు ముగించుకుని మంగళవారం ఇల్లు చేరుకున్నారో లేదో.. వెంటనే సలేశ్వరం జాతర విధులకు హాజరు కావాలని ఎస్సై నుంచి ఆదేశాలు వచ్చాయి. అప్పటికే అలసిపోయి ఉన్న బయ్యన్న, అచ్చంపేటలో జరిగిన అవగాహన సదస్సుకు హాజరుకాలేకపోయారు.

అవమానం భరించలేక..: సదస్సుకు రాలేదన్న నెపంతో పైఅధికారులు బయ్యన్నను విధులకు గైర్హాజరైనట్లు (Absent) రికార్డుల్లో నమోదు చేశారు. ఈ విషయం తెలుసుకున్న ఆయన తీవ్ర మనస్తాపానికి గురయ్యారు. బుధవారం సలేశ్వరం విధులకు బయలుదేరిన బయ్యన్న, మార్గమధ్యలో అచ్చంపేట సమీపంలోని పశువుల సంత వద్ద పురుగుల మందు తాగారు. స్థానికులు గమనించి ఆసుపత్రికి తరలించినప్పటికీ, చికిత్స పొందుతూ ఆయన మృతి చెందారు.

వైరల్ ఆడియో.. ఎస్సైపై ఆరోపణలు: బయ్యన్న ఆత్మహత్యకు ముందు తన మిత్రుడితో మాట్లాడిన ఆడియో కాల్ ఇప్పుడు నెట్టింట వైరల్‌గా మారింది. కోడేరు ఎస్సై తనను కులం పేరుతో దూషించారని, పరుష పదజాలంతో అవమానించారని బయ్యన్న ఆవేదన వ్యక్తం చేశారు. ఆ మాటలు తన భార్య కూడా విన్నదని, తన మరణం తర్వాత ఎస్సైపై కేసు పెట్టాలని స్నేహితుడిని కోరడం విస్మయానికి గురిచేస్తోంది. ఈ ఆడియో కలకలం రేపుతుండటంతో బాధ్యులైన అధికారులపై చర్యలు తీసుకోవాలని కుటుంబ సభ్యులు డిమాండ్ చేస్తున్నారు.

కుటుంబంలో విషాదం: బయ్యన్నకు ఇది రెండో వివాహం. మొదటి భార్య గతంలోనే ఆత్మహత్య చేసుకోగా, ప్రస్తుతం రెండో భార్య చెన్నమ్మ, ఒక కుమారుడు ఉన్నారు. ఇంటికి పెద్ద దిక్కుగా ఉన్న బయ్యన్న మరణంతో ఆ కుటుంబం వీధిన పడింది. పోలీస్ శాఖలో పని ఒత్తిడి, అధికారుల ప్రవర్తన సామాన్య సిబ్బంది ప్రాణాల మీదకు తెస్తోందని ఈ ఘటన నిరూపిస్తోంది.