పరీక్ష పోతే ప్రాణం తీసుకోవాలా? ఫలితాల ఒత్తిడిలో ప్రాణాలు కోల్పోయిన నలుగురు విద్యార్థులు!

ఇంటర్మీడియట్ ఫలితాలు విద్యార్థుల జీవితాల్లో తీరని విషాదాన్ని నింపాయి. పరీక్షల్లో ఫెయిలయ్యామన్న మనస్తాపంతో రాష్ట్రవ్యాప్తంగా నలుగురు విద్యార్థులు క్షణికావేశంలో బలవన్మరణానికి పాల్పడ్డారు. కన్నవారికి కడుపుకోత మిగిల్చిన ఈ హృదయ విదారక ఘటనలు సిద్దిపేట, నిర్మల్, సంగారెడ్డి జిల్లాల్లో చోటుచేసుకున్నాయి.

ఘటనల వివరాలు:

సెల్ఫీ వీడియోతో ఆఖరి వీడ్కోలు: సిద్దిపేట శివారులోని రంగనాయకపురానికి చెందిన ఓ విద్యార్థిని (17) ఫలితాల్లో ఫెయిల్ కావడంతో తట్టుకోలేకపోయింది. సోమవారం మధ్యాహ్నం ఇంట్లో ఎవరూ లేని సమయంలో “అమ్మానాన్న టాటా.. బైబై” అంటూ సెల్ఫీ వీడియో రికార్డ్ చేసి మరీ ఉరివేసుకుంది.

నల్లావాగు గురుకుల విద్యార్థి: మనూరు మండలం ఎన్‌జీహోక్రాన్ గ్రామానికి చెందిన విద్యార్థి (17) మొదటి సంవత్సరం ఫలితాల్లో ఉత్తీర్ణత సాధించలేకపోయాడు. తీవ్ర బాధతో పొలం దగ్గరకు వెళ్లి చెట్టుకు ఉరేసుకుని తన జీవితాన్ని ముగించాడు.

హైదరాబాద్‌లో చదువుతున్నా.: సంగారెడ్డి జిల్లా కారాముంగికి చెందిన మరో విద్యార్థిని (17) హైదరాబాద్‌లోని ఓ ప్రైవేట్ కళాశాలలో ఇంటర్ చదువుతోంది. రిజల్ట్స్ నెగటివ్‌గా రావడంతో మనస్తాపం చెంది తన ఇంట్లోనే ఫ్యాన్‌కు ఉరేసుకుని ఆత్మహత్య చేసుకుంది.

నిర్మల్‌లో మరొకరు: నిర్మల్ జిల్లా గొల్లమాడకు చెందిన విద్యార్థి (17) కూడా ఫలితాలు చూసుకున్న తర్వాత తీవ్ర ఒత్తిడికి గురై సోమవారం బలవన్మరణానికి పాల్పడ్డాడు

క్షణికావేశం.. జీవితాంతం విషాదం

ఓటమి అనేది జీవితంలో ఒక భాగం మాత్రమే అని, పరీక్షలు మళ్లీ రాసుకోవచ్చని పెద్దలు చెబుతున్నా.. ఈ విద్యార్థులు ఆ క్షణంలో ఆవేదనను తట్టుకోలేకపోయారు. మొన్నటి వరకు సందడిగా ఉన్న ఆ ఇళ్లలో ఇప్పుడు శవాల మీద ఏడుపులు మిన్నంటుతున్నాయి.

పరీక్షల ఫలితాలు లేదా ఇతర కారణాలతో ఒత్తిడికి లోనవుతున్న వారు దయచేసి క్షణికావేశంలో నిర్ణయాలు తీసుకోవద్దు. మీ బాధను పంచుకోవడానికి ‘ఆసరా’ (040-23354141) లేదా ‘ప్రేమవాహిని’ వంటి హెల్ప్‌లైన్ నంబర్లను సంప్రదించండి. జీవితం పరీక్ష కంటే చాలా విలువైనది.