గ్రీన్ టీ ఎప్పుడు తాగితే మంచిది..?

నేటి ఆధునిక కాలంలో “హెల్త్ ఈజ్ వెల్త్” అనే సూత్రం మరింత ప్రాధాన్యత సంతరించుకుంది. ఈ నేపథ్యంలో సాధారణ టీ, కాఫీలకు బదులుగా చాలామంది గ్రీన్ టీ వైపు మొగ్గు చూపుతున్నారు. బరువు తగ్గడం, చర్మ సౌందర్యం మెరుగుపరచడం వంటి ప్రయోజనాల కోసం గ్రీన్ టీని చాలామంది ఒక ఆరోగ్య పానీయంగా భావిస్తున్నారు. అయితే ఏదైనా ఆహారం లేదా పానీయం అధికంగా లేదా తప్పుడు విధంగా తీసుకుంటే దాని ప్రభావం ప్రతికూలంగా మారుతుందని నిపుణులు హెచ్చరిస్తున్నారు.

ఉదయం ఖాళీ కడుపుతో గ్రీన్ టీ తాగడం చాలామందికి అలవాటు. అయితే నిపుణుల ప్రకారం ఇది పూర్తిగా మంచిది కాదు. గ్రీన్ టీలో ఉండే టానిన్లు కడుపులో ఆమ్లత్వాన్ని పెంచి ఎసిడిటీ, మంట లేదా వికారం వంటి సమస్యలకు కారణమవుతాయి. కొంతమందిలో మలబద్ధకం కూడా వచ్చే అవకాశం ఉంది. అందుకే గ్రీన్ టీని ఖాళీ కడుపుతో కాకుండా తేలికపాటి ఆహారం తీసుకున్న తర్వాత తాగడం మంచిదని సూచిస్తున్నారు.

రాత్రి వేళల్లో గ్రీన్ టీ తీసుకోవడం కూడా జాగ్రత్తగా ఉండాలి. ఇందులో స్వల్ప మోతాదులో కెఫిన్ ఉండటం వల్ల నిద్రపై ప్రభావం పడే అవకాశం ఉంటుంది. నిద్రలేమి సమస్యలు ఎదురయ్యే ప్రమాదం ఉండటంతో, నిద్రకు కనీసం మూడు గంటల ముందే గ్రీన్ టీ తీసుకోవడం మంచిదని నిపుణులు చెబుతున్నారు.

భోజనం తర్వాత వెంటనే గ్రీన్ టీ తాగడం కూడా సరైన పద్ధతి కాదు. ఇది శరీరంలో ఐరన్ వంటి ముఖ్యమైన పోషకాలు శోషణను తగ్గించవచ్చు. అందుకే భోజనానికి గంట ముందు లేదా భోజనం తర్వాత కనీసం 45 నుండి 60 నిమిషాల గ్యాప్ ఇవ్వడం ఉత్తమం.

గ్రీన్ టీ తయారీలో కూడా కొన్ని జాగ్రత్తలు అవసరం. నీటిని ఎక్కువగా మరిగించకుండా, కొంత చల్లారిన తర్వాతే టీ ఆకులు లేదా టీ బ్యాగ్ వేయాలి. ఎక్కువ సేపు నానబెట్టితే రుచి చేదుగా మారడమే కాకుండా పోషకాలు కూడా తగ్గిపోతాయి.

నిపుణుల ప్రకారం రోజుకు 2 నుంచి 3 కప్పుల గ్రీన్ టీ తీసుకోవడం సరైన పరిమితి. అధికంగా తీసుకుంటే కాలేయంపై ఒత్తిడి పడే అవకాశం ఉందని కొన్ని అధ్యయనాలు సూచిస్తున్నాయి.

మొత్తంగా గ్రీన్ టీ ఆరోగ్యానికి మంచిదే అయినప్పటికీ, సరైన సమయం, సరైన మోతాదు, సరైన విధానం పాటిస్తేనే దాని పూర్తి ప్రయోజనాలు పొందవచ్చని నిపుణులు చెబుతున్నారు.