మద్యం మత్తులో దారుణం.. నిద్రిస్తున్న కుమారుడిని హతమార్చిన తండ్రి

మద్యం మత్తు కన్న మమకారాన్ని చిదిమేసిన విషాద ఘటన మచిలీపట్నం ఉత్తర మండలం తాళ్లపాలెం పంచాయతీ పరిధిలోని బోట్లవానిపాలెంలో చోటుచేసుకుంది. కన్న కొడుకును కంటికి రెప్పలా కాపాడాల్సిన తండ్రే మద్యం మత్తులో అతని ప్రాణాలు తీసిన ఘటన స్థానికంగా తీవ్ర కలకలం రేపింది.

పోలీసులు తెలిపిన వివరాల ప్రకారం.. బోట్లవానిపాలెం గ్రామానికి చెందిన బొల్లా రామ్మోహనరావు తాపీ పని చేస్తూ జీవనం సాగిస్తున్నాడు. ఆయన కుమారుడు కల్యాణ చక్రవర్తి (31) మచిలీపట్నంలో ఉంటూ పెయింటింగ్‌ పనులు చేసేవాడు. తండ్రి, కుమారుడి మధ్య కొంతకాలంగా విభేదాలు ఉన్నట్లు తెలుస్తోంది.

రెండు రోజుల క్రితం జరిగిన గొడవలో కల్యాణ చక్రవర్తి తండ్రిపై చేయి చేసుకున్నట్లు పోలీసులు తెలిపారు. ఈ ఘటనను మనసులో పెట్టుకున్న రామ్మోహనరావు తీవ్ర ఆగ్రహంతో ఉన్నాడు. గురువారం రాత్రి కల్యాణ చక్రవర్తి మద్యం సేవించి స్వగ్రామంలోని ఇంటికి వచ్చి నిద్రపోయాడు.

అదే సమయంలో రామ్మోహనరావు కూడా మద్యం మత్తులో ఉన్నాడు. కుమారుడు తనను కొట్టిన విషయాన్ని గుర్తు చేసుకుని ఆవేశానికి లోనైన అతడు కర్రతో నిద్రిస్తున్న కల్యాణ చక్రవర్తి తలపై బలంగా కొట్టాడు. తీవ్ర గాయాల కారణంగా కల్యాణ చక్రవర్తి అక్కడికక్కడే కుప్పకూలిపోయాడు.

కుమారుడు ఇంకా బతికే ఉన్నాడనే ఆశతో కుటుంబ సభ్యులు, బంధువులు వెంటనే మచిలీపట్నం ప్రభుత్వ ఆసుపత్రికి తరలించారు. అయితే అప్పటికే అతడు మృతి చెందినట్లు వైద్యులు నిర్ధారించారు. దీంతో కుటుంబ సభ్యులు కన్నీరుమున్నీరయ్యారు.

కల్యాణ చక్రవర్తికి తండ్రి అంటే ఎంతో ప్రేమ ఉండేదని బంధువులు తెలిపారు. తండ్రి గురించి ఎవరైనా తప్పుగా మాట్లాడితే సహించేవాడు కాదని, అలాంటి వ్యక్తి మద్యం మత్తులో జరిగిన ఘటనకు బలయ్యాడని వారు ఆవేదన వ్యక్తం చేశారు.

ఘటనపై సమాచారం అందుకున్న పోలీసులు కేసు నమోదు చేసి దర్యాప్తు చేపట్టారు. నిందితుడు రామ్మోహనరావును అదుపులోకి తీసుకుని విచారిస్తున్నారు. కుటుంబ కలహాలు, మద్యం అలవాటు కారణంగా ఈ దారుణం చోటుచేసుకున్నట్లు పోలీసులు ప్రాథమికంగా భావిస్తున్నారు.

ఈ ఘటనతో బోట్లవానిపాలెం గ్రామంలో విషాద ఛాయలు అలుముకున్నాయి. చిన్న వివాదాలు, మద్యం అలవాటు కుటుంబాల్లో ఎంతటి విషాదానికి దారితీస్తాయో ఈ ఘటన మరోసారి గుర్తు చేసింది.