ఆంధ్రా కాఫీ హౌస్‌.. సాగు నుంచి ఎగుమతుల దాకా దూసుకెళ్తున్న ఏపీ

ఆంధ్రప్రదేశ్‌ కాఫీ రంగం క్రమంగా విస్తరిస్తోంది. ఒకవైపు అల్లూరి సీతారామరాజు జిల్లాలో కాఫీ సాగు విస్తీర్ణాన్ని పెంచేందుకు ప్రభుత్వం చర్యలు చేపడుతుండగా.. మరోవైపు రాష్ట్రంలో కాఫీ ప్రాసెసింగ్‌, ఉత్పత్తి, ఎగుమతులకు ప్రోత్సాహం లభిస్తోంది. అరకు కాఫీకి అంతర్జాతీయ స్థాయిలో ప్రత్యేక గుర్తింపు ఉండగా.. రాష్ట్రాన్ని కేంద్రంగా చేసుకుని పలు ప్రైవేటు సంస్థలు కూడా కాఫీ ఉత్పత్తులను తయారు చేసి విదేశీ మార్కెట్లకు ఎగుమతి చేస్తున్నాయి.

అల్లూరి సీతారామరాజు జిల్లాలో సుమారు 2.45 లక్షల ఎకరాల్లో 1.50 లక్షల మంది గిరిజన రైతులు కాఫీ సాగు చేస్తున్నారు. ఇక్కడ ప్రధానంగా అరబికా రకం కాఫీని పండిస్తున్నారు. సహజ సిద్ధమైన, సేంద్రియ సాగు విధానాలకు ప్రాధాన్యం ఇవ్వడం వల్ల అరకు ప్రాంతంలో పండే కాఫీకి ప్రత్యేకమైన రుచి, సువాసనతో కూడిన ఫ్లేవర్డ్‌ ప్రొఫైల్‌ ఏర్పడింది. దీంతో అరకు కాఫీ ప్రీమియం బ్రాండ్‌గా అంతర్జాతీయ మార్కెట్లలో గుర్తింపు పొందుతోంది.

ప్రస్తుతం రాష్ట్రంలో ఏటా సుమారు 15 వేల టన్నుల కాఫీ గింజల ఉత్పత్తి జరుగుతోంది. కాఫీ సాగును మరింత విస్తరించేందుకు కొత్తగా మరో లక్ష ఎకరాల్లో తోటలను అభివృద్ధి చేయాలని ప్రభుత్వం లక్ష్యంగా పెట్టుకుంది. దీంతో రానున్న రోజుల్లో రాష్ట్రంలో కాఫీ గింజల ఉత్పత్తి గణనీయంగా పెరిగే అవకాశం ఉంది.

కాఫీ సాగుతో పాటు ప్రాసెసింగ్‌ రంగాన్ని కూడా ప్రభుత్వం ప్రోత్సహిస్తోంది. ప్రధానమంత్రి ఫార్మలైజేషన్‌ ఆఫ్‌ మైక్రో ఫుడ్‌ ప్రాసెసింగ్‌ ఎంటర్‌ప్రైజ్‌ స్కీమ్‌ కింద అల్లూరి జిల్లాలో కాఫీ క్లస్టర్‌ అభివృద్ధికి ప్రత్యేక ప్రోత్సాహకాలు అందిస్తున్నారు. ఇప్పటివరకు సుమారు రూ.11.98 కోట్ల వ్యయంతో 1,375 కాఫీ ప్రాసెసింగ్‌ యూనిట్లు ఏర్పాటు చేసినట్లు గణాంకాలు చెబుతున్నాయి. చిన్న, మధ్య తరహా వ్యాపారాలకు ఇవి అవకాశాలను పెంచుతున్నాయి.

రాష్ట్రంలో కాఫీ పొడి ఉత్పత్తి కూడా గణనీయంగా ఉంది. ఏటా సుమారు 23 వేల టన్నుల కాఫీ పొడి తయారవుతోంది. ఇందులో ఫ్రీజ్‌ డ్రైడ్‌ ఇన్‌స్టెంట్‌ కాఫీ ఉత్పత్తికి అధిక ప్రాధాన్యం ఉంది. కాంటినెంటల్‌ కాఫీ సుమారు 10 వేల టన్నులు, ఇండస్‌ కాఫీ 8 వేల టన్నులు, వైహాన్‌ కాఫీ 3 వేల టన్నులు, లావాజా వెయ్యి టన్నులు, ఇతర సంస్థలు మరో వెయ్యి టన్నుల వరకు కాఫీ ఉత్పత్తులను తయారు చేస్తున్నాయి.

రాష్ట్రంలో కాఫీ పరిశ్రమకు ఉన్న అవకాశాలను గుర్తించిన మరో రెండు ప్రముఖ ప్రైవేటు సంస్థలు కూడా ఏపీలో పెట్టుబడులు పెట్టేందుకు ఆసక్తి చూపుతున్నాయి. త్వరలో రాష్ట్ర ప్రభుత్వంతో అవి ఒప్పందాలు కుదుర్చుకునే అవకాశం ఉంది. ఈ సంస్థలు రాష్ట్రంలోకి వస్తే కాఫీ ప్రాసెసింగ్‌, ఉత్పత్తి సామర్థ్యం మరింత పెరగడంతో పాటు ఉపాధి అవకాశాలు కూడా పెరిగే అవకాశం ఉంది.

కాఫీ గింజల ఉత్పత్తిలో దేశవ్యాప్తంగా కర్ణాటక అగ్రస్థానంలో ఉంది. దేశీయ ఉత్పత్తిలో ఆ రాష్ట్రం 70 శాతం వాటాను కలిగి ఉండగా.. కేరళ 21 శాతం, తమిళనాడు 5 శాతం, ఆంధ్రప్రదేశ్‌ 3 శాతం, ఒడిశా ఒక శాతం వాటాను కలిగి ఉన్నాయి. కర్ణాటకలో అరబికాతో పాటు రోబస్టా రకం కాఫీ అధికంగా పండిస్తుండగా.. ఏపీలో ప్రధానంగా అరబికా రకాన్నే సాగు చేస్తున్నారు.

కాఫీ ఉత్పత్తితోపాటు వినియోగాన్ని పెంచేలా ప్రభుత్వం చర్యలు చేపడుతోంది. జాతీయ, రాష్ట్ర రహదారులతోపాటు ప్రధాన నగరాలు, పట్టణాల్లో కాఫీ కెఫెల ఏర్పాటును ప్రోత్సహిస్తోంది. ఇందుకోసం ప్రభుత్వం రాయితీలు అందిస్తోంది. స్థానికంగా తయారయ్యే కాఫీ ఉత్పత్తులకు మార్కెట్‌ కల్పించడంతోపాటు పర్యాటక రంగంతో కాఫీ పరిశ్రమను అనుసంధానించేందుకు ఇది దోహదపడే అవకాశం ఉంది.

ప్రపంచ కాఫీ వినియోగంలో అరబికా వాటా సుమారు 60 శాతం కాగా.. రోబస్టా వాటా 40 శాతంగా ఉంది. అరబికా సున్నితమైన సువాసన, రుచికి ప్రసిద్ధి చెందితే.. రోబస్టా గాఢమైన రుచిని కలిగి ఉంటుంది. ఏపీలో పండే అరబికా కాఫీకి ప్రత్యేకమైన ఫ్లేవర్డ్‌ ప్రొఫైల్‌ ఉండటం రాష్ట్రానికి అదనపు బలంగా మారుతోంది.

భారత్‌ ప్రపంచంలో అత్యధిక కాఫీ ఉత్పత్తి చేసే దేశాల్లో ఏడో స్థానంలో ఉంది. దేశంలో ఉత్పత్తయ్యే కాఫీలో సుమారు 70 శాతం వివిధ దేశాలకు ఎగుమతి అవుతోంది. దేశీయ కాఫీ వినియోగంలోనూ దక్షిణాది రాష్ట్రాల వాటా అధికంగా ఉంది. ఈ నేపథ్యంలో సాగు, ప్రాసెసింగ్‌, బ్రాండింగ్‌, ఎగుమతులను సమన్వయంతో ముందుకు తీసుకెళ్తే ఆంధ్రప్రదేశ్‌ కాఫీ రంగంలో మరింత కీలక కేంద్రంగా ఎదిగే అవకాశం ఉంది.