ఎయిరిండియాకు పూర్వ వైభవం తెస్తాం

టాటా గ్రూప్‌ ఆధ్వర్యంలోని ఎయిరిండియా కొత్త నాయకత్వంలో కీలక మార్పుల దిశగా అడుగులు వేస్తోంది. సంస్థను తిరిగి పటిష్ఠమైన స్థితికి తీసుకురావడంతో పాటు ప్రయాణికుల విశ్వాసాన్ని మరింత పెంచడం, ఆర్థిక పరిస్థితిని బలోపేతం చేయడం ప్రధాన లక్ష్యాలని టాటా సన్స్‌ ఛైర్మన్‌, ఎయిరిండియా ఛైర్మన్‌ ఎన్‌. చంద్రశేఖరన్‌ తెలిపారు. సంస్థ ఉద్యోగులతో నిర్వహించిన టౌన్‌హాల్‌ సమావేశంలో ఆయన ఈ అంశాలను ప్రస్తావించారు.

ఈ సందర్భంగా క్యాంప్‌బెల్‌ విల్సన్‌ స్థానంలో ఎయిరిండియా కొత్త ఎండీ, సీఈఓగా బాధ్యతలు స్వీకరించనున్న టెవోల్డే గెబ్రెమరియంను చంద్రశేఖరన్‌ ఉద్యోగులకు పరిచయం చేశారు. కీలకమైన మార్పుల దశలో సంస్థకు కొత్త నాయకత్వం అందుబాటులోకి వస్తోందని తెలిపారు.

‘మళ్లీ గొప్పగా తీర్చిదిద్దుతాం’

ఎయిరిండియాకు పూర్వ వైభవాన్ని తీసుకురావడానికి ఉద్యోగులంతా కలిసికట్టుగా పనిచేయాలని టెవోల్డే గెబ్రెమరియం పిలుపునిచ్చారు. ‘మేం ఎయిరిండియాను మళ్లీ గొప్పగా తీర్చిదిద్దుతాం’ అని ఆయన స్పష్టం చేశారు. సంస్థకు గొప్ప చరిత్ర, బలమైన బ్రాండ్‌, అపారమైన సామర్థ్యం ఉన్నాయని పేర్కొన్నారు. ఈ బలాలను సమర్థంగా వినియోగించుకుని ఎయిరిండియాను మరింత ఉన్నత స్థాయికి తీసుకెళ్లాల్సిన అవసరం ఉందన్నారు.

విమానయాన రంగంలో సుమారు నాలుగు దశాబ్దాల అనుభవం ఉన్న గెబ్రెమరియం.. ఇథియోపియన్‌ ఎయిర్‌లైన్స్‌లో 11 ఏళ్లకు పైగా పనిచేశారు. సుమారు రెండు దశాబ్దాల కిందట ముంబయిలో పనిచేసిన సమయంలో ఎయిరిండియాతో తనకున్న అనుబంధాన్ని ఆయన గుర్తుచేసుకున్నారు. అప్పట్లో భారత విమానయాన రంగంలో ఎయిరిండియా అగ్రస్థానంలో ఉండేదని తెలిపారు.

భద్రతకు అత్యంత ప్రాధాన్యం

ఎయిరిండియా తిరిగి అగ్రస్థానాన్ని అందుకునేలా పనిచేసే అవకాశం తనకు లభించడం గొప్ప అవకాశమని గెబ్రెమరియం అన్నారు. విమానయాన సంస్థకు భద్రతే అత్యంత ముఖ్యమైన అంశమని స్పష్టం చేశారు. ప్రయాణికుల భద్రతతో పాటు ఉద్యోగుల అభిప్రాయాలకు కూడా ప్రాధాన్యం ఇవ్వాల్సిన అవసరం ఉందన్నారు. తమ ఆందోళనలు, సూచనలను స్వేచ్ఛగా వ్యక్తం చేసే వాతావరణం ఉద్యోగులకు కల్పించాలని పేర్కొన్నారు.

గతేడాది చోటుచేసుకున్న ఘోర విమాన ప్రమాదం అనంతరం ఎయిరిండియాపై భద్రతాపరమైన పరిశీలన మరింత పెరిగింది. మరోవైపు కార్యకలాపాల్లో అంతరాయాలు, ఆర్థిక ఒత్తిళ్లు సంస్థకు సవాళ్లుగా మారాయి. ఈ నేపథ్యంలో కొత్త ఎండీ, సీఈఓగా గెబ్రెమరియం బాధ్యతలు స్వీకరించనుండటం ప్రాధాన్యం సంతరించుకుంది.

కొత్త నాయకత్వం సంస్థ కార్యకలాపాలను మరింత సమర్థంగా నిర్వహించడం, ప్రయాణికుల అనుభవాన్ని మెరుగుపరచడం, భద్రతా ప్రమాణాలను బలోపేతం చేయడం, ఉద్యోగుల్లో నమ్మకాన్ని పెంచడం వంటి అంశాలపై దృష్టి సారించే అవకాశం ఉంది. ఎయిరిండియాకు ఉన్న చారిత్రక గుర్తింపును ఆధునిక విమానయాన అవసరాలకు అనుగుణంగా తీర్చిదిద్దడం కొత్త యాజమాన్యానికి ప్రధాన సవాలుగా నిలవనుంది.