సాగుభూముల హక్కుల రక్షణకు ‘భూభారతి’ పోర్టల్ అమలు త్వరలో: మంత్రి పొంగులేటి

సాగుభూముల యాజమాన్య హక్కుల పరిరక్షణ కోసం సమీకృత ‘భూభారతి’ పోర్టల్‌ను త్వరలో జిల్లాకు ఒక మండలంలో అమలు చేయనున్నట్లు రెవెన్యూ శాఖ మంత్రి పొంగులేటి శ్రీనివాసరెడ్డి తెలిపారు. రిజిస్ట్రేషన్, మ్యుటేషన్ ప్రక్రియలను పూర్తిగా పారదర్శకంగా నిర్వహించేందుకు ఈ వ్యవస్థను రూపొందించినట్లు ఆయన పేర్కొన్నారు.

విదేశీ పర్యటనలో ఉన్న మంత్రి సోమవారం రెవెన్యూ శాఖ అధికారులతో టెలికాన్ఫరెన్స్ ద్వారా సమీక్ష నిర్వహించి పలు కీలక అంశాలపై చర్చించారు. సాగు భూముల క్రయవిక్రయాల సమయంలో ఎలాంటి ఇబ్బందులు తలెత్తకుండా రిజిస్ట్రేషన్ సమయంలోనే సర్వే మ్యాప్ జతచేసే విధానాన్ని ప్రభుత్వం ఇప్పటికే అమలు చేస్తోందని ఆయన తెలిపారు.

ప్రస్తుతం రాష్ట్రంలోని ఐదు మండలాల్లో ప్రయోగాత్మకంగా ఈ విధానం అమలవుతుండగా, అక్కడి పరిస్థితులపై అధికారులు నివేదిక అందజేశారు. అన్ని చోట్లా ప్రక్రియ విజయవంతంగా కొనసాగుతోందని అధికారులు వివరించగా, మంత్రి సంతృప్తి వ్యక్తం చేశారు. రెండో దశలో భాగంగా ప్రతి జిల్లాలో ఒక మండలంలో ఈ విధానాన్ని విస్తరించేందుకు అవసరమైన కార్యాచరణ సిద్ధం చేయాలని ఆయన ఆదేశించారు.

2025 ఏప్రిల్ 14న భూభారతి చట్టం అమల్లోకి వచ్చినప్పటి నుంచి ఇప్పటివరకు రాష్ట్రవ్యాప్తంగా 3.65 లక్షల పాస్‌పుస్తకాలు జారీ చేసినట్లు అధికారులు తెలిపారు. గతంలో రైతులు పాస్‌పుస్తకాల కోసం నెలల తరబడి రెవెన్యూ కార్యాలయాల చుట్టూ తిరగాల్సి వచ్చేదని, ఇప్పుడు దరఖాస్తు చేసిన వెంటనే అందేలా వ్యవస్థను రూపొందించామని మంత్రి అన్నారు.

అలాగే పెండింగ్‌లో ఉన్న సాదాబైనామా దరఖాస్తుల పరిష్కారంపై ప్రత్యేక దృష్టి పెట్టాలని మంత్రి సూచించారు. రాష్ట్రంలో మొత్తం 9.25 లక్షల సాదాబైనామా దరఖాస్తులు రాగా, ఇప్పటివరకు 6 లక్షల దరఖాస్తుదారులకు నోటీసులు జారీ చేసినట్లు అధికారులు వివరించారు. మిగతా దరఖాస్తుదారులకు వచ్చే 15 రోజుల్లోగా నోటీసులు జారీ చేయాలని, అనంతరం 30 రోజుల గడువు ముగిసిన వెంటనే అర్హులైన దరఖాస్తులను త్వరగా పరిష్కరించేలా చర్యలు తీసుకోవాలని మంత్రి ఆదేశించారు.