సర్కారు బడులకు ఆదర్శం.. చంద్రంపాలెం

విశాఖ జిల్లా చంద్రంపాలెం జిల్లా పరిషత్తు ఉన్నత పాఠశాల సరికొత్త రూపురేఖలు సంతరించుకుంది. రాష్ట్రంలోనే అత్యధిక మంది విద్యార్థులు చదువుతున్న సర్కారు పాఠశాలల్లో ఒకటిగా గుర్తింపు పొందిన ఈ విద్యాలయంలో రూ.10 కోట్లకు పైగా నిధులతో భారీగా అభివృద్ధి పనులు చేపట్టారు. విద్యార్థులకు నాణ్యమైన విద్యతో పాటు మెరుగైన మౌలిక వసతులు అందించాలనే లక్ష్యంతో పాఠశాల ప్రాంగణాన్ని ఆధునిక హంగులతో తీర్చిదిద్దారు. శనివారం ఐటీ, విద్యాశాఖల మంత్రి నారా లోకేశ్‌ చేతుల మీదుగా అభివృద్ధి పనులను ప్రారంభించనున్నారు.

దివీస్‌ లేబొరేటరీస్‌ సంస్థ పాఠశాల అభివృద్ధికి చేయూత అందించింది. రాష్ట్ర విద్యా విధానానికి అనుగుణంగా అత్యున్నత స్థాయి మౌలిక వసతులు కల్పించేందుకు ‘ప్రాజెక్టు చంద్ర’ పేరిట రూ.6.5 కోట్ల సీఎస్‌ఆర్‌ నిధులను వెచ్చించినట్లు సంస్థ మేనేజింగ్‌ డైరెక్టర్‌ డాక్టర్‌ మురళి కె.దివి తెలిపారు. విద్య అందరికీ సమానంగా అందుబాటులో ఉండాలనే లక్ష్యంతో ఈ కార్యక్రమాన్ని చేపట్టినట్లు పేర్కొన్నారు.

ప్రాజెక్టులో భాగంగా పాఠశాలలో డ్రైనేజీ వ్యవస్థను ఆధునికీకరించారు. అత్యాధునిక వసతులతో క్రీడా మైదానాన్ని అభివృద్ధి చేశారు. విద్యార్థులు, ఉపాధ్యాయుల రాకపోకలకు వీలుగా పాఠశాల చుట్టూ సీసీ ఫ్లోరింగ్‌తో దారులు ఏర్పాటు చేశారు. తాగునీటి అవసరాల కోసం మూడు ఆర్వో ప్లాంట్లు అందుబాటులోకి తెచ్చారు. సాంస్కృతిక కార్యక్రమాల కోసం ‘చంద్రవదన’ పేరుతో భారీ కళావేదిక నిర్మించారు.

పాఠశాల ప్రాంగణం ఆహ్లాదకరంగా కనిపించేలా ల్యాండ్‌స్కేపింగ్‌ చేపట్టడంతో పాటు భవనాలకు రంగులు వేశారు. విద్యార్థులకు అనుకూలమైన వాతావరణం కల్పించేలా పలు ఇతర అభివృద్ధి పనులు కూడా చేపట్టారు.

చంద్రంపాలెం పాఠశాలలో 6 నుంచి 10వ తరగతి వరకు మొత్తం 2,906 మంది విద్యార్థులు చదువుతున్నారు. 62 తరగతి గదులు ఉన్నాయి. బాలబాలికలకు ప్రత్యేకంగా సోలార్‌ సదుపాయాలతో కూడిన మరుగుదొడ్లు అందుబాటులో ఉన్నాయి. ఐఎఫ్‌పీ బోర్డులు, ఆడియో విజువల్‌ పరికరాల సాయంతో విద్యార్థులకు సులభంగా అర్థమయ్యే రీతిలో బోధన సాగుతోంది.

పాఠశాలలో 50కి పైగా కంప్యూటర్లతో ప్రత్యేక ల్యాబ్‌ ఉంది. సెయింట్‌ భాగస్వామ్యంతో కృత్రిమ మేధ (ఏఐ) ల్యాబ్‌ను కూడా ఏర్పాటు చేశారు. విద్యార్థుల్లో సాంకేతిక పరిజ్ఞానాన్ని పెంపొందించేందుకు ఇవి ఉపయోగపడుతున్నాయి. 4,800కు పైగా పుస్తకాలతో కూడిన గ్రంథాలయం విద్యార్థులకు అందుబాటులో ఉంది.

చంద్రంపాలెం విద్యార్థులు విద్యలో మంచి ప్రతిభ కనబరుస్తున్నారు. ఏటా ఇక్కడి నుంచి పదుల సంఖ్యలో విద్యార్థులు ట్రిపుల్‌ ఐటీ సీట్లు సాధిస్తున్నారు. చదువుతో పాటు క్రీడల్లోనూ విద్యార్థులు రాణిస్తున్నారు. కొత్తగా అభివృద్ధి చేసిన క్రీడా మైదానం వారికి మరింత ఉపయోగకరంగా మారనుంది.

చంద్రంపాలెం పాఠశాల జాతీయ రహదారిని ఆనుకుని ఉండటంతో విద్యార్థులు రహదారి దాటే సమయంలో ఇబ్బందులు ఎదుర్కొంటున్నారు. ప్రమాదాల ముప్పు ఉండటంతో పాఠశాల వద్ద వంతెన నిర్మించాలన్న డిమాండ్‌ చాలాకాలంగా ఉంది. గతంలో వంతెన నిర్మాణానికి శంకుస్థాపన జరిగినా పనులు ముందుకు సాగలేదు. ఈ సమస్యపై ‘ఈనాడు’లో వరుస కథనాలు ప్రచురితమయ్యాయి.

కూటమి ప్రభుత్వం అధికారంలోకి వచ్చిన తర్వాత భీమిలి ఎమ్మెల్యే గంటా శ్రీనివాసరావు సమస్య పరిష్కారంపై దృష్టి సారించారు. జీవీఎంసీ అధికారులతో సమన్వయం చేసి రూ.3.23 కోట్లతో వంతెన నిర్మాణ పనులు చేపట్టేలా చర్యలు తీసుకున్నారు. ప్రస్తుతం వంతెన నిర్మాణ పనులు తుది దశకు చేరుకున్నాయి.

విద్యార్థుల సంఖ్య, విద్యా ఫలితాలు, మౌలిక వసతులు, క్రీడా ప్రతిభ వంటి అంశాల్లో ప్రత్యేకత చాటుతున్న చంద్రంపాలెం పాఠశాల.. సర్కారు బడుల్లో అభివృద్ధికి ఒక ఆదర్శంగా నిలుస్తోంది.