డేవిడ్‌ వార్నర్‌ డ్రంకెన్‌ డ్రైవ్‌ కేసు.. కోర్టు తీర్పుతో కెప్టెన్సీపై చర్చ

ఆస్ట్రేలియా స్టార్‌ క్రికెటర్‌ డేవిడ్‌ వార్నర్‌కు డ్రంకెన్‌ డ్రైవ్‌ కేసులో సిడ్నీ కోర్టు షాక్‌ ఇచ్చింది. మద్యం సేవించి వాహనం నడిపిన కేసులో వార్నర్‌ను దోషిగా నిర్ధారించిన కోర్టు.. 1,500 ఆస్ట్రేలియన్‌ డాలర్ల జరిమానా విధించింది. భవిష్యత్‌లో వాహనం నడపాలంటే కారులో ఆల్కహాల్‌ ఇంటర్‌లాక్‌ పరికరాన్ని తప్పనిసరిగా అమర్చుకోవాలని ఆదేశించింది.

39 ఏళ్ల వార్నర్‌ ఏప్రిల్‌ 5న సిడ్నీలో వాహనం నడుపుతూ పోలీసుల ర్యాండమ్‌ బ్రీత్‌ టెస్టింగ్‌ వద్ద పట్టుబడ్డాడు. పరీక్షలో అతడి శరీరంలో చట్టబద్ధ పరిమితికి రెండింతలకుపైగా ఆల్కహాల్‌ ఉన్నట్లు తేలింది. దీంతో పోలీసులు కేసు నమోదు చేశారు. ఈ కేసులో వార్నర్‌ గత నెలలోనే తన నేరాన్ని అంగీకరించాడు.

డ్రంకెన్‌ డ్రైవ్‌ చేసిన సమయంలో వార్నర్‌ వాహనంలో పిల్లలు కూడా ఉన్నారని కోర్టు గుర్తించింది. ఈ అంశం నేరాన్ని మరింత తీవ్రంగా చేసిందని జడ్జి పేర్కొన్నారు. ప్రజల భద్రతకు మద్యం సేవించి వాహనం నడపడం తీవ్రమైన ముప్పుగా మారుతుందని స్పష్టం చేశారు.

అయితే వార్నర్‌పై పూర్తిస్థాయి డ్రైవింగ్‌ నిషేధం విధించలేదు. తిరిగి వాహనం నడపాలంటే ఇంటర్‌లాక్‌ లైసెన్స్‌ కోసం దరఖాస్తు చేసుకుని, కారులో ఇంటర్‌లాక్‌ పరికరాన్ని ఏర్పాటు చేసుకోవాలని ఆదేశించారు.

ఈ పరికరం డ్రైవర్‌ శ్వాసలోని ఆల్కహాల్‌ స్థాయిని పరీక్షిస్తుంది. మద్యం సేవించినట్లు గుర్తిస్తే కారు స్టార్ట్‌ కాకుండా నిరోధిస్తుంది.

కోర్టు తీర్పు నేపథ్యంలో రాబోయే బిగ్‌ బాష్‌ లీగ్‌ సీజన్‌లో సిడ్నీ థండర్‌ జట్టుకు వార్నర్‌ కెప్టెన్‌గా కొనసాగుతాడా అనే చర్చ మొదలైంది. పాకిస్థాన్‌ సూపర్‌ లీగ్‌లో కరాచీ కింగ్స్‌కు కెప్టెన్‌గా వ్యవహరించిన వార్నర్‌.. ఈస్టర్‌ విరామ సమయంలో ఆస్ట్రేలియాకు తిరిగి వచ్చినప్పుడు ఈ ఘటన జరిగింది.

కేసు నమోదైన తర్వాత కూడా వార్నర్‌ పాకిస్థాన్‌కు వెళ్లి తన పీఎస్‌ఎల్‌ బాధ్యతలను పూర్తి చేశాడు. ఇప్పుడు కోర్టు తీర్పు వెలువడటంతో అతడి టీ20 లీగ్‌ అవకాశాలపై, ముఖ్యంగా సిడ్నీ థండర్‌ కెప్టెన్సీపై ఎలాంటి ప్రభావం పడుతుందన్నది ఆసక్తికరంగా మారింది.