గుడివాడ పోలీస్ గోదాములో మంటలు.. స్వాధీనం చేసిన వస్తువులు బూడిద

గుడివాడ సీసీఎస్ పోలీస్ స్టేషన్ గోదాములో చోటుచేసుకున్న అగ్నిప్రమాదం తీవ్ర నష్టాన్ని మిగిల్చినట్లు తెలుస్తోంది. వివిధ కేసుల్లో సీజ్ చేసిన వాహనాలు, మద్యం సీసాలు, ఇతర స్వాధీనం చేసిన వస్తువులు గోదాములో నిల్వ ఉంచగా, మంటలు చెలరేగడంతో అవి పూర్తిగా దగ్ధమయ్యాయి.

మంటలు ఒక్కసారిగా ఎగిసిపడటంతో సమీప ప్రాంతాల్లో భయాందోళనలు నెలకొన్నాయి. సీసీఎస్ పోలీస్ స్టేషన్ పక్కనే తహసీల్దార్ కార్యాలయం, ట్రెజరీ, ఇతర ప్రభుత్వ కార్యాలయాలు ఉండటంతో అగ్నిప్రమాదం మరింత ఆందోళనకు గురిచేసింది. అదృష్టవశాత్తూ మంటలు ఇతర భవనాలకు వ్యాపించకముందే అగ్నిమాపక సిబ్బంది అదుపులోకి తెచ్చారు.ఘటనాస్థలికి చేరుకున్న డీఎస్పీ ధీరజ్ వినిల్ పరిస్థితిని సమీక్షించి పూర్తి స్థాయి విచారణకు ఆదేశాలు జారీ చేశారు. అగ్నిప్రమాదానికి కారణాలపై స్పష్టత రాకపోయినప్పటికీ, విద్యుత్ షార్ట్ సర్క్యూట్ లేదా నిర్లక్ష్యం కారణమై ఉండొచ్చని ప్రాథమికంగా అనుమానిస్తున్నారు.

సీజ్ చేసిన వస్తువులు దగ్ధం కావడంతో సంబంధిత కేసులపై ప్రభావం ఉంటుందా అన్న ప్రశ్నలు కూడా తలెత్తుతున్నాయి. నష్టం ఎంత మేరకు జరిగిందన్న దానిపై అధికారులు లెక్కలు వేస్తున్నారు.ఈ ఘటనతో ప్రభుత్వ గోదాముల భద్రత, అగ్నిప్రమాద నివారణ చర్యలపై మరింత జాగ్రత్త అవసరమనే అభిప్రాయాలు వ్యక్తమవుతున్నాయి. భవిష్యత్తులో ఇలాంటి సంఘటనలు జరగకుండా అవసరమైన భద్రతా చర్యలు చేపడతామని అధికారులు తెలిపారు.