ఆసియా దేశాలతో పోలిస్తే భారత్‌కు మెరుగైన స్థానం

భారత్–అమెరికా మధ్య కుదిరిన వాణిజ్య ఒప్పందం (ట్రేడ్ డీల్‌) అనంతరం ఆసియాలో భారత్‌ స్థానం మరింత మెరుగుపడిందని పెట్టుబడి బ్యాంకింగ్ సంస్థ JM Financial తన తాజా నివేదికలో వెల్లడించింది. ఈ ఒప్పందం భారత మార్కెట్లకు సానుకూలంగా పనిచేస్తుందని, ముఖ్యంగా కరెన్సీ బలపడటానికి దోహదం చేస్తుందని పేర్కొంది.

భారత్–అమెరికా మధ్య కుదిరిన మధ్యంతర వాణిజ్య ఒప్పందం నేపథ్యంలో, భారత ఉత్పత్తులపై ఉన్న సుంకాలు 50 శాతం నుంచి 18 శాతానికి తగ్గాయి. ఇది పాకిస్థాన్‌, చైనా, శ్రీలంక, బంగ్లాదేశ్ వంటి పలు ఆసియా దేశాలపై అమెరికా అమలు చేస్తున్న సుంకాలతో పోలిస్తే చాలా తక్కువ కావడం గమనార్హం.

నివేదిక ప్రకారం, సుంకాల తగ్గింపుతో భారత ఎగుమతులు పుంజుకునే అవకాశం ఉంది. దీని వల్ల అమెరికాతో భారత వాణిజ్య మిగులు (ట్రేడ్ సర్‌ప్లస్‌) తిరిగి పెరగడానికి మద్దతు లభిస్తుంది. ఎగుమతులు పెరగడం వల్ల దేశంలోకి డాలర్ ప్రవాహం ఎక్కువయ్యే అవకాశం ఉండగా, డాలర్‌తో పోలిస్తే రూపాయి మారకం విలువ బలపడనుంది.ఈ పరిణామాలు భారత ఈక్విటీ మార్కెట్లకు, ముఖ్యంగా ఎగుమతులపై ఆధారపడిన రంగాలకు అనుకూలంగా ఉంటాయని జేఎం ఫైనాన్షియల్ పేర్కొంది. అధిక సుంకాలు ఎదుర్కొంటున్న ఇతర ఆసియా దేశాలతో పోలిస్తే భారత్‌ ప్రస్తుతం మెరుగైన స్థితిలో ఉందని నివేదిక స్పష్టం చేసింది. అయితే, ఈ పరిణామాల కారణంగా విదేశీ సంస్థాగత పెట్టుబడులు ఒక్కసారిగా భారీగా కాకుండా, క్రమంగా పెరిగే అవకాశం ఉందని అంచనా వేసింది.

ఇదిలా ఉండగా, భారత్–అమెరికా మధ్య తాత్కాలిక వాణిజ్య ఒప్పందానికి సంబంధించిన ఫ్రేమ్‌వర్క్‌ ఖరారైనట్లు కేంద్ర ప్రభుత్వం ఇప్పటికే వెల్లడించింది. ఈ ఒప్పందం ద్వారా భారత ఎగుమతిదారులకు సుమారు 30 ట్రిలియన్‌ డాలర్ల విలువైన అమెరికా మార్కెట్‌ అందుబాటులోకి వస్తుందని కేంద్ర వాణిజ్య, పరిశ్రమల శాఖ మంత్రి Piyush Goyal తెలిపారు.ఈ ట్రేడ్ డీల్‌ వల్ల భారత్‌లోని రైతులు, ఎంఎస్‌ఎంఈలు, స్టార్టప్‌ ఆవిష్కర్తలు, మత్స్యకారులకు కొత్త అవకాశాలు ఏర్పడతాయని కేంద్రం స్పష్టం చేసింది. మొత్తం మీద, ఈ ఒప్పందం భారత ఆర్థిక వ్యవస్థకు దీర్ఘకాలికంగా లాభదాయకంగా మారుతుందని విశ్లేషకులు భావిస్తున్నారు.