రివ్యూ: ‘ఇరుముడి’.. రవితేజ ఖాతాలో మరో హిట్‌!

ఇరుముడి’ కథలో తండ్రీకూతుళ్ల అనుబంధమే ప్రధాన బలం. కూతురిని ఎంతో ప్రేమగా పెంచే త్రినాథ్‌.. ఆమె ఎలాంటి పరిస్థితినైనా ధైర్యంగా ఎదుర్కోవాలని కోరుకుంటాడు. తనకు తెలిసిన ప్రతి విషయాన్ని తండ్రితో పంచుకునే మణికంఠ.. ఓ రోజు స్కూల్‌లో జరుగుతున్న అనుమానాస్పద ఘటన గురించి తెలుసుకుంటుంది. ఆ విషయాన్ని తండ్రికి చెప్పేలోపే పరిస్థితులు పూర్తిగా మారిపోతాయి. అక్కడి నుంచి కథలో ఉత్కంఠ మొదలవుతుంది.

సినిమా తొలి భాగంలో పాత్రల పరిచయం, గ్రామీణ నేపథ్యం, త్రినాథ్‌ కుటుంబం, అయ్యప్ప భక్తి వంటి అంశాలను దర్శకుడు నెమ్మదిగా పరిచయం చేశాడు. మొదట్లో కథ సాధారణంగా అనిపించినా.. హీరో అయ్యప్ప మాల ధరించిన తర్వాత కథనం ఆసక్తికరంగా మారుతుంది. ముఖ్యంగా త్రినాథ్‌, మణికంఠ మధ్య సన్నివేశాలు హృద్యంగా సాగుతాయి.

అదే సమయంలో గ్రామం చుట్టూ చోటుచేసుకునే అనుమానాస్పద పరిణామాలు కథకు థ్రిల్‌ను జోడిస్తాయి. అడవిలో తిరిగే ప్రమాదకరమైన ముఠా, అమ్మాయిల మృతులు, స్కూల్‌లో జరుగుతున్న ఘటనలు ఒక్కొక్కటిగా బయటకు రావడంతో అసలు సమస్య ఏంటనే ఆసక్తి ప్రేక్షకుల్లో పెరుగుతుంది. కథానాయకుడికి ఎదురయ్యే ఇబ్బందులు, అతడికి పెరుగుతున్న శత్రుత్వం కూడా కథనాన్ని ముందుకు నడిపిస్తాయి.

ద్వితీయార్ధం సినిమాకు ప్రధాన బలం. ఊహించని మలుపులతో కథ వేగం పెరుగుతుంది. ముఖ్యంగా ప్రీ క్లైమాక్స్‌ నుంచి వచ్చే సన్నివేశాలు ప్రేక్షకుల్లో భావోద్వేగాలను రేకెత్తిస్తాయి. సాయికుమార్‌తో రవితేజ సన్నివేశాలు ఆకట్టుకుంటాయి. క్లైమాక్స్‌లో తండ్రీకూతుళ్ల బంధాన్ని దర్శకుడు బలంగా చూపించడంతో సినిమా ప్రభావం మరింత పెరుగుతుంది.

సినిమా ద్వారా ఆడపిల్లలను భయంతో కాకుండా ధైర్యంగా పెంచాలి, వారి భద్రత విషయంలో కుటుంబంతో పాటు సమాజం కూడా బాధ్యత తీసుకోవాలనే సందేశాన్ని దర్శకుడు అందించాడు. ఈ సామాజిక అంశాన్ని కథలో భాగంగా మలచడం సినిమాకు ప్రత్యేకతను తీసుకొచ్చింది.

రవితేజ తనకు అలవాటైన మాస్‌ యాక్షన్‌ శైలిని పూర్తిగా పక్కనపెట్టకుండా.. పాత్రకు అవసరమైన మేరకే హీరోయిజాన్ని చూపించారు. త్రినాథ్‌గా ఆయన సహజమైన నటనతో ఆకట్టుకున్నారు. ముఖ్యంగా కూతురితో కలిసి వచ్చే భావోద్వేగ సన్నివేశాల్లో రవితేజ నటన బాగా పండింది. ద్వితీయార్ధంలో ఆయన పాత్రలో వచ్చే మార్పును కూడా చక్కగా ఆవిష్కరించారు.

ప్రియ భవానీ శంకర్‌ తన పాత్రకు తగ్గట్టుగా సహజంగా కనిపించారు. కూతురి పాత్రలో బేబీ నక్షత్ర ప్రత్యేకంగా ఆకట్టుకుంటుంది. రవితేజ, నక్షత్రల మధ్య వచ్చే సన్నివేశాలు సినిమాకు హార్ట్‌గా నిలుస్తాయి. సాయికుమార్‌, శ్వాసిక, అజయ్‌ ఘోష్‌ తదితరులు తమ పాత్రలకు న్యాయం చేశారు.

సాంకేతిక విభాగాల విషయానికి వస్తే జి.వి. ప్రకాశ్‌ కుమార్‌ సంగీతం సినిమాకు బాగా సరిపోయింది. అయ్యప్ప భక్తి నేపథ్యంలో వచ్చే పాటలు కథలో భాగంగానే అనిపిస్తాయి. నేపథ్య సంగీతం థ్రిల్లింగ్‌ సన్నివేశాలను మరింత ప్రభావవంతంగా మార్చింది. విష్ణు సినిమాటోగ్రఫీ మరో ఆకర్షణ. సీలేరు ప్రాంతంలోని ప్రకృతి అందాలను, అడవి నేపథ్యంలో వచ్చే ఉత్కంఠభరిత సన్నివేశాలను కెమెరాలో అందంగా చూపించారు.

అయితే కథలో ఇన్ని తీవ్ర పరిణామాలు జరుగుతున్నప్పటికీ పోలీసుల ప్రస్తావన పెద్దగా లేకపోవడం కొంత అసహజంగా అనిపిస్తుంది. కొన్ని చోట్ల లాజిక్‌ను పక్కనపెట్టి సినిమాటిక్‌ లిబర్టీ తీసుకున్న భావన కలుగుతుంది. అయినప్పటికీ బలమైన రచన, మంచి నటన, భావోద్వేగాలు, ద్వితీయార్ధంలోని థ్రిల్‌ ఆ లోటుపాట్లను చాలావరకు కవర్‌ చేస్తాయి.

మొత్తంగా ‘ఇరుముడి’ రవితేజ నుంచి వచ్చిన భిన్నమైన ప్రయత్నం. మాస్‌ ఎలిమెంట్స్‌ కంటే కథకు ప్రాధాన్యం ఇస్తూ.. తండ్రీకూతుళ్ల బంధం, సామాజిక అంశం, థ్రిల్‌ను మేళవించిన విధానం ఆకట్టుకుంటుంది. చాలా రోజుల తర్వాత రవితేజను సహజమైన పాత్రలో చూడాలనుకునే ప్రేక్షకులకు ఈ సినిమా మంచి అనుభూతిని అందించే అవకాశముంది.