రాష్ట్రాలు కలిసి పనిచేస్తేనే జల సమస్యలకు శాశ్వత పరిష్కారం

అంతర్రాష్ట్ర జల వివాదాల పరిష్కారానికి రాష్ట్రాలు పరస్పర సహకారంతో ముందుకు రావాలని ప్రధాని నరేంద్ర మోదీ పిలుపునిచ్చారు. నదుల అనుసంధానం, జల సంరక్షణ, భూగర్భ జలాల రీఛార్జ్‌, సమర్థ సాగునీటి వినియోగం వంటి అంశాల్లో సమగ్ర ప్రణాళికలు రూపొందించాలని సూచించారు. కెన్‌-బెట్వా నదుల అనుసంధాన ప్రాజెక్టును దేశానికి ఆదర్శంగా తీసుకోవాలని పేర్కొన్నారు.

దిల్లీలో నిర్వహించిన ‘ప్రగతి’ 51వ సమావేశంలో ప్రధాని పలు కీలక మౌలిక సదుపాయాల ప్రాజెక్టుల పురోగతిని సమీక్షించారు. రైల్వేలు, రహదారులు, విద్యుత్‌ రంగాలకు చెందిన రూ.30 వేల కోట్లకు పైగా వ్యయంతో చేపట్టిన ప్రాజెక్టులపై అధికారులతో చర్చించారు. పనులు ఆలస్యమైతే ఖర్చు పెరగడమే కాకుండా ప్రజలకు సేవలు అందడంలో ఇబ్బందులు తలెత్తుతాయని హెచ్చరించారు.

దేశంలో సౌర విద్యుత్తు వినియోగాన్ని మరింత విస్తరించాలని ప్రధాని సూచించారు. ముఖ్యంగా నగరాలు, పట్టణాల్లో ఇళ్ల పైకప్పులపై సోలార్‌ ప్యానెల్స్‌ ఏర్పాటు చేయాలని చెప్పారు. నివాస సముదాయాలు, ప్రభుత్వ కార్యాలయాల్లో ఈ విధానాన్ని ప్రోత్సహిస్తే విద్యుత్‌ ఖర్చులు తగ్గడంతో పాటు శుద్ధ ఇంధన వినియోగం పెరుగుతుందని వివరించారు.

పంట కాలువలపై సౌర విద్యుత్‌ ప్యానెల్స్‌ ఏర్పాటు చేయడం ద్వారా విద్యుత్‌ ఉత్పత్తి పెరగడమే కాకుండా నీటి ఆవిరీభవనాన్ని కూడా తగ్గించవచ్చని ప్రధాని అభిప్రాయపడ్డారు.

ఓడరేవుల ఆధారిత అభివృద్ధికి ప్రాధాన్యం ఇవ్వాలని, మహారాష్ట్రలోని వధావాన్‌ పోర్టును దేశానికి ప్రధాన ప్రవేశ ద్వారంగా తీర్చిదిద్దాలని సూచించారు. స్వచ్ఛభారత్‌ మిషన్‌ 2.0లో ప్రజల భాగస్వామ్యం మరింత పెరగాలని, ఘన వ్యర్థాల నిర్వహణ ప్రాజెక్టులను వేగవంతం చేయాలని అధికారులను ఆదేశించారు.

బక్రీద్‌ సందర్భంగా దేశ ప్రజలకు ప్రధాని శుభాకాంక్షలు తెలిపారు. సమాజంలో సోదరభావం, ఆనందం మరింత పెరగాలని ఆకాంక్షించారు. అలాగే హిందూ మహాసభ ప్రముఖుడు వీర సావర్కర్‌ జయంతి సందర్భంగా నివాళులు అర్పించారు.