కులగణనలో ప్రతి కులానికీ ప్రత్యేక కోడ్‌

దేశంలో సామాజికంగా, ఆర్థికంగా వెనుకబడిన వర్గాలకు న్యాయం జరగాలంటే జనగణనలో కులగణనను తప్పనిసరిగా చేపట్టాలని ఓబీసీ నేతలు డిమాండ్‌ చేశారు. కులగణన సందర్భంగా ప్రతి కులాన్ని ప్రత్యేకంగా నమోదు చేసేలా పారదర్శక విధానాన్ని రూపొందించాలని కోరారు. ప్రతి కులానికి ప్రత్యేకమైన ‘యూనిక్‌ కోడ్‌’ కేటాయించడం ద్వారా లెక్కింపులో ఎలాంటి గందరగోళానికి, తప్పిదాలకు అవకాశం లేకుండా చూడవచ్చని అభిప్రాయపడ్డారు.

ఆదివారం దిల్లీలోని తెలంగాణ భవన్‌లో ఓబీసీ జాతీయ సదస్సు నిర్వహించారు. బీసీ ఇంటెలెక్చువల్‌ ఫోరం ఛైర్మన్‌ టి.చిరంజీవులు, ఓబీసీ స్టూడెంట్స్‌ అసోసియేషన్‌ అధ్యక్షుడు జి.కిరణ్‌కుమార్‌ అధ్యక్షతన జరిగిన ఈ సదస్సులో కులగణన, ఓబీసీ రిజర్వేషన్లు, సామాజిక న్యాయం తదితర అంశాలపై చర్చించారు.

జనగణనలో కులాల వివరాలను కచ్చితంగా నమోదు చేయాల్సిన అవసరం ఉందని సదస్సులో పాల్గొన్న వక్తలు పేర్కొన్నారు. కులాల వారీగా జనాభాను శాస్త్రీయ పద్ధతిలో లెక్కించకపోతే ప్రభుత్వ విధానాల రూపకల్పనలో లోపాలు ఏర్పడే అవకాశం ఉందన్నారు. అంతేకాకుండా సరైన సమాచారం లేకుండా చేపట్టే ప్రక్రియకు ప్రజాధనం భారీగా ఖర్చయినా ఆశించిన ప్రయోజనం ఉండదని అభిప్రాయపడ్డారు.

ప్రతి కులాన్ని నమోదు చేసే విధానం స్పష్టంగా, పారదర్శకంగా ఉండాలని కోరారు. ఒకే కులానికి వివిధ పేర్లు, ఉపవర్గాలు ఉండే సందర్భాల్లో గందరగోళం తలెత్తకుండా ప్రత్యేక గుర్తింపు కోడ్‌ ఉపయోగించాలని సూచించారు. కులానికి కేటాయించిన కోడ్‌ ఆధారంగా వివరాలను నమోదు చేస్తే భవిష్యత్తులో గణాంకాలను విశ్లేషించడం, ప్రభుత్వ పథకాలు రూపొందించడం మరింత సులభమవుతుందని పేర్కొన్నారు.

దేశంలో ఓబీసీల జనాభాకు అనుగుణంగా విద్య, ఉద్యోగ, ఉపాధి రంగాల్లో అవకాశాలు కల్పించాలని నేతలు డిమాండ్‌ చేశారు. జనాభా గణాంకాల ఆధారంగా రిజర్వేషన్లను పునఃపరిశీలించాల్సిన అవసరం ఉందన్నారు. సామాజికంగా వెనుకబడిన వర్గాలకు సముచిత ప్రాతినిధ్యం కల్పించేందుకు కులగణన కీలక ఆధారంగా నిలుస్తుందని పేర్కొన్నారు.

సదస్సులో భారాస నేత, మాజీ మంత్రి వి.శ్రీనివాస్‌గౌడ్‌ మాట్లాడుతూ ఓబీసీ రిజర్వేషన్లను సమర్థంగా అమలు చేస్తే ప్రధానమంత్రి నరేంద్ర మోదీ చరిత్రలో నిలిచిపోతారని అన్నారు. దేశంలో మెజారిటీ వర్గాలకు ఇప్పటివరకు తగిన న్యాయం జరగలేదని పేర్కొన్నారు. రాజకీయ, విద్య, ఉద్యోగ, ఉపాధి రంగాల్లో ఓబీసీలు అణచివేతకు గురయ్యారని ఆరోపించారు.

జనాభాకు అనుగుణంగా రిజర్వేషన్లు కల్పించాలని గతంలో డిమాండ్‌ చేసిన కాంగ్రెస్‌ అగ్రనేత రాహుల్‌ గాంధీ ప్రస్తుతం ఈ అంశంపై నోరు మెదపడం లేదని శ్రీనివాస్‌గౌడ్‌ విమర్శించారు. ఓబీసీల హక్కుల కోసం రాజకీయాలకు అతీతంగా అన్ని వర్గాలు కలిసి పోరాడాల్సిన అవసరం ఉందన్నారు.

సదస్సులో ఎంపీ విల్సన్, మాజీ మంత్రి వి.శ్రీనివాస్‌గౌడ్, ఏఐసీసీ ఓబీసీ విభాగం ఛైర్మన్‌ అనిల్‌ జైహింద్‌ తదితరులు పాల్గొన్నారు. కులగణనను సమగ్రంగా, లోపరహితంగా నిర్వహించి.. దాని ఆధారంగా సామాజిక న్యాయం, సమాన అవకాశాల దిశగా ప్రభుత్వాలు చర్యలు తీసుకోవాలని నేతలు కోరారు.