పోలవరం-బనకచర్ల పిటిషన్‌లో కీలక పరిణామం.. ప్రతివాదులకు సుప్రీంకోర్టు సమన్లు

పోలవరం-బనకచర్ల ప్రాజెక్టుకు సంబంధించి తెలంగాణ ప్రభుత్వం దాఖలు చేసిన పిటిషన్‌లో కీలక పరిణామం చోటుచేసుకుంది. ఈ వ్యవహారంలో ప్రతివాదులకు సుప్రీంకోర్టు సమన్లు జారీ చేసింది. పిటిషన్‌పై ప్రాథమిక విచారణ నిర్వహించిన మరుసటి రోజే సుప్రీంకోర్టు రిజిస్ట్రీ సమన్లు పంపించింది. సమన్లు అందుకున్న ప్రతివాదులు 28 రోజుల్లోగా సుప్రీంకోర్టు రిజిస్ట్రార్‌ ఎదుట హాజరై తమ వాదనలు లేదా కౌంటర్‌ అఫిడవిట్‌ను సమర్పించాలని ఆదేశించింది.

ఈ పిటిషన్‌లో తెలంగాణ ప్రభుత్వం మొత్తం 13 మందిని ప్రతివాదులుగా చేర్చింది. ఇందులో కేంద్ర ప్రభుత్వం, ఆంధ్రప్రదేశ్ ప్రభుత్వం, అలాగే కర్ణాటక, ఛత్తీస్‌గఢ్‌, ఒడిశా, మహారాష్ట్ర, మధ్యప్రదేశ్ రాష్ట్ర ప్రభుత్వాలు కూడా ఉన్నాయి. ప్రాజెక్టుకు సంబంధించిన నిర్ణయాలు, అనుమతులు, నదీజలాల వినియోగంపై ఈ రాష్ట్రాలకు సంబంధం ఉండటంతో వీరిని ప్రతివాదులుగా పేర్కొన్నట్లు తెలుస్తోంది.

తెలంగాణ ప్రభుత్వం తన పిటిషన్‌లో పోలవరం-బనకచర్ల ప్రాజెక్టు అమలుతో కృష్ణా, గోదావరి నదీ జలాల పంపిణీపై ప్రభావం పడే అవకాశం ఉందని ఆందోళన వ్యక్తం చేసింది. నదీ జలాల పంపిణీకి సంబంధించిన ట్రైబ్యునల్‌ అవార్డులు, చట్టబద్ధ అనుమతులు, పర్యావరణ మరియు సాంకేతిక అంశాలను పూర్తిగా పరిశీలించకుండా ప్రాజెక్టు ముందుకు తీసుకెళ్లరాదని కోరింది. అలాగే ప్రాజెక్టు అమలుపై తగిన ఆదేశాలు జారీ చేయాలని సుప్రీంకోర్టును ఆశ్రయించింది.

ఇక సుప్రీంకోర్టు సమన్లతో ఈ వ్యవహారం న్యాయపరంగా మరింత ప్రాధాన్యం సంతరించుకుంది. ప్రతివాదుల నుంచి కౌంటర్‌ దాఖలైన అనంతరం కేసుపై తదుపరి విచారణ జరగనుంది. అన్ని పక్షాల వాదనలు విన్న తర్వాత సుప్రీంకోర్టు తదుపరి ఆదేశాలు జారీ చేసే అవకాశం ఉంది. ఈ కేసు ఫలితం దక్షిణాది రాష్ట్రాల మధ్య నదీజలాల పంపిణీ, అంతర్రాష్ట్ర జల ప్రాజెక్టుల అమలుపై ప్రభావం చూపే అవకాశముందని నిపుణులు భావిస్తున్నారు.