రామమందిర విరాళాల కుంభకోణంలో ఉద్యోగాల అమ్మకాలు బయటపడినట్లు ఆరోపణలు

అయోధ్య రామమందిర విరాళాల చోరీ కేసులో దర్యాప్తు కొనసాగుతున్న కొద్దీ కొత్త అక్రమాలు వెలుగులోకి వస్తున్నాయి. కీలక నిందితుడు అవినాష్ శుక్లాను విచారిస్తున్న పోలీసు బృందం ఆలయంలో నియామకాల పేరుతో పెద్ద ఎత్తున అవినీతి జరిగిందని గుర్తించినట్లు సమాచారం.

ఆలయంలో వివిధ పోస్టులకు డబ్బులు తీసుకొని సుమారు 125 మందిని నియమించినట్లు నిందితుడు విచారణలో వెల్లడించినట్లు పోలీసు వర్గాలు తెలిపాయి. వీరిలో కొందరి వద్ద నుంచి డబ్బులు వసూలు చేసిన ఆధారాలు ఉన్నాయని దర్యాప్తు అధికారులు భావిస్తున్నారు. అయితే ఇప్పటివరకు ఈ నియామకాలకు సంబంధించిన అపాయింట్‌మెంట్ లెటర్లు లేదా సర్వీస్ అగ్రిమెంట్లు పోలీసులకు లభించలేదు.

ఈ నియామకాలు ఎవరి ఆదేశాల మేరకు జరిగాయన్న కోణంలో దర్యాప్తు కొనసాగుతోంది. ట్రస్ట్‌లో కీలక సభ్యుల పాత్రపై కూడా అనుమానాలు వ్యక్తమవుతున్నాయి. అదే సమయంలో ఉద్యోగుల బ్యాంకు ఖాతాలు, లావాదేవీలను అధికారులు పరిశీలిస్తున్నారు.

ఇప్పటికే అరెస్టయిన అనుకల్ప్ మిశ్రా, లవ్ కుశ్ మిశ్రా ఈ అక్రమ నియామకాల్లో కీలక పాత్ర పోషించి ఉండొచ్చని అనుమానాలు వ్యక్తమవుతున్నాయి. గతంలో కుంభమేళా సమయంలో భారీగా విరాళాలు దోచుకున్నట్లు కూడా దర్యాప్తులో తేలినట్లు సమాచారం.

బుధవారం మరోసారి పోలీసులు నిందితుల ఇళ్లపై దాడులు నిర్వహించారు. ఈ సందర్భంగా ఓ యోగా కేంద్రంలో ‘రామరాజ్య కోశ్’ పేరుతో ఉన్న విరాళాల హుండీని స్వాధీనం చేసుకున్నారు. దానిపై పేటీఎం క్యూఆర్ కోడ్ ఉండటం గమనార్హం. అవినాష్ శుక్లా గత పదేళ్లుగా అదే యోగా కేంద్రంలో నివసిస్తున్నట్లు పోలీసులు తెలిపారు.

ఈ కుంభకోణంలో ఎస్‌బీఐ ఉద్యోగుల పాత్ర కూడా ఉండొచ్చన్న అనుమానాలతో, వారిపై దర్యాప్తు చేయాలని పోలీసులు ఈడీకి లేఖ రాసినట్లు సమాచారం.