టెక్ ప్రపంచంలో సంచలనం…అడోబ్ సీఈఓ పదవి నుంచి వైదొలగనున్న శంతను!!

ప్రపంచ ప్రఖ్యాత సాఫ్ట్‌వేర్ సంస్థ ‘అడోబ్‌ (Adobe)’లో త్వరలో నాయకత్వ మార్పు జరగనుంది. దాదాపు రెండు దశాబ్దాలుగా కంపెనీని విజయవంతంగా నడిపించిన శంతను నారాయణ్ సీఈఓ పదవి నుంచి తప్పుకోనున్నట్లు కంపెనీ ప్రకటించింది. కొత్త సీఈఓ ఎంపిక పూర్తైన తర్వాత ఆయన బాధ్యతల నుంచి వైదొలగనున్నట్లు తెలిపింది. అయితే, ఆయన పూర్తిగా కంపెనీ నుంచి దూరం కావడం లేదు. బోర్డు ఛైర్మన్‌గా కొనసాగుతూ సంస్థకు మార్గదర్శనం చేస్తారు.

సీఈఓ పదవి నుంచి తప్పుకోవాలన్న నిర్ణయాన్ని తానే బోర్డుకు తెలియజేశానని శంతను నారాయణ్ ఉద్యోగులకు పంపిన మెయిల్‌లో పేర్కొన్నారు. “ఇది గుడ్‌బై కాదు. అడోబ్‌తో నా ప్రయాణం కొనసాగుతూనే ఉంటుంది. బోర్డు ఛైర్మన్‌గా కంపెనీ అభివృద్ధికి నేను తోడ్పడతాను” అని తెలిపారు. అయితే ఈ నిర్ణయానికి కారణం ఏమిటన్న విషయాన్ని కంపెనీ గానీ, ఆయన గానీ వెల్లడించలేదు.

ఇక కొత్త సీఈఓ ఎంపిక కోసం అడోబ్ బోర్డు ప్రత్యేక కమిటీని ఏర్పాటు చేసింది. ఆ కమిటీ తగిన అభ్యర్థిని ఎంపిక చేసి కంపెనీకి తదుపరి నాయకత్వాన్ని నిర్ణయించనుంది.

భారతీయుడైన 62 ఏళ్ల శంతను నారాయణ్ హైదరాబాద్‌లోని ఉస్మానియా యూనివర్సిటీ నుంచి బ్యాచిలర్ డిగ్రీ పూర్తి చేశారు. అనంతరం అమెరికాలోని కాలిఫోర్నియా యూనివర్సిటీలో ఎంబీఏ చదివారు. సిలికాన్ గ్రాఫిక్స్, యాపిల్ వంటి సంస్థల్లో పనిచేసిన తర్వాత 1998లో అడోబ్‌లో చేరారు. 2007లో కంపెనీ సీఈఓగా బాధ్యతలు చేపట్టిన ఆయన, సంస్థను ప్రపంచంలో ప్రముఖ డిజిటల్ మీడియా మరియు క్రియేటివ్ సాఫ్ట్‌వేర్ దిగ్గజంగా తీర్చిదిద్దారు.

ఆయన నాయకత్వంలో అడోబ్ రికార్డు స్థాయి ఆదాయాలను నమోదు చేసింది. ఫోటోషాప్‌, ప్రీమియర్‌, అక్రోబాట్ వంటి సాఫ్ట్‌వేర్‌లతో క్రియేటివ్ రంగంలో సంస్థకు ప్రత్యేక గుర్తింపు వచ్చింది. వ్యాపార రంగంలో ఆయన చేసిన సేవలకు గానూ భారత ప్రభుత్వం పద్మశ్రీ పురస్కారంతో ఆయనను సత్కరించింది.